رواية :- وجه البوم شبيهة امي

البارت الاول

.
.
.
.

اليوم الخميس

بعد عيد الاضحى بخمس ايام وصلنا من مكة بعد ماحجيت مع جدي

واليوم والكل مجتمعين

نزلت برقعي على وجهي

وتعوذت من الشيطان ودخلت بكل قوة قلب

لازم أكون قوية وأطنش كل اللي أسمعه

المفروض اني تعودت ماهو شي جديد

:السلام عليكم

المجلس مليان بحريم عماني وبنات عماني وحريم عيالهم

ملياان المجلس لعينه

مليان بالزين

مليان بالجمال

مليان بالرقة والانوثه

مليان بالاناقة

مليان بكل شي يحرق الاعصاب

:هلا وغلا

ماتقولها الا زوجة اخوي ام فارس

هي اللي فعلا ماقد جرحتني بكلمة

تبادلنا السلام بحراره :

ياهلا والله اشتقت لس مررره

ابتسامتي من اقصى قلبي لها

تستاهل هي الوحيده اللي تحبني واحبها هي الوحيده اللي تشوفني

انسانه لها مشاعر واحاسيس

:يابعد قلبي يا ام فراس انا اللي اشتقت لكم

الله لايخليني منكم

:كملي سلام وتعالي جنبي لا تطلعين خلي البنات

يشتغلن عنس

كملت سلامي على باقي المجلس

اللي محد كلف نفسه يقوم

كلن يمد طرف يده يرد مصافحتي وسلامي

ورجعت عند ام فراس وهمست بإذنها

:دقايق وراجعه لس بشوف يمكن جدي يبي شي

ام فراس وهي تبسم

:روحي روحي عارفه ياقلبي مابتطلعين من المطبخ

هربت من المجلس للمكان اللي احبه ويحبني مطبخ بيت جديظ

..

.

.

:ياولد جدي يقول جددو القهوه

ودف صينية الفناجيل والدله الصفرا الكبيره لداخل المطبخ

رحت اخذت الصينيه وغسلت الفناجيل وزليت القهوة

بالدلة ونزلت غطاي على عيوني

ورحت متوجهه للمجلس بنزل الصيينيه عند الباب

واسمع اصوات عماني

وعيال عمي وجدي

اول مررره اسمع اصواتهم طالعه كذا

جدي من الناس اللي له هيبه بحضوره كلن يسكت

بس الوضع الحين غريب وش اللي مطلع اصواتهم

داخل المجلس الكبير بسقفه الخشبي ومسانده الحمرا

وزوليته الصوف اللي مرت عليها السنين

وهونفسه ماتغير

جالس بصدر مجلسه ببشتة البني

وشماغة البرتقالي وعصابة راسة البيضاء

ولحيتة الكثة المحناه وعصاة بيمناه

رفعها وخبط فيها بقوه على الارض

واصطدمت بصينة الشاهي واحدثت الصوت المطلوب

عشان يوقف الهرج وتخرس الاصوات

وتوجهت له انظار عياله واحفاده

:اسمع انت واياه اخر الكلام

وزبدة الهرج (الجادل )بالغصب بالطيب بتكون زوجة حداكم

سكوت مع نظرات امتعاض ورفض من الكل

قطع الصمت ابو فراس وهويحاول تدارك الموضوع

:ياجدي الله يخليك لنا ماتجي الامور كذا

مايجي شي بالغصب واختي نصيبها ما جاء للان

وكمل ولد عمه بغيض مكتوم : يعني بتغصبنا ياجدي وعلى من !!!

على جادل ؟!

رد الثاني :انا زواجي بعد شهر مالي فيها

شف اللي ماتزوجوا

رد الثالث :انا اصغر منها ب15سنه

ردالرابع :ياجدي والله لو مابقى الاهي ماخذتها انتفض الشايب :وش يعيب بنت عمكم يومكم عايفينها

رداصغرهم بهمس واضح :ابد ياجدي شيينه شيييينه وكبيره

سمعه الجد ونهره :قم تقلع الله يشين حظك

اطلع من المجلس

وفجأه قطع كلامهم صوت طق الباب

وصينية القهوة تنزل بالارض

.

.

ــــــــــــــــــــــــــــــــــــــــــــــــــ ـــــــــ

.

رجعت للمطبخ وفيني غصة

لاتتعب نفسك ياجدي مستحيل اللي تبيه

قبل مايرفضوني انا ارفضهم

غصة تحجرت بحلقي لا ني قادرة ابكي ولا اني قادرة ابلعها

لحظات وامتلى المطبخ من بنات عمي

يساعدن في تجهيز السفر مع ان كل شي مجهزته من قبل

بس حب الترزز واظهار النفس قدام جدي وعماني

>

>

>

خلص العشا وانتهت معه طاقتي الجسديه والعاطفيه

خلاص عيوني تحرقني ابيهم يطلعون كلهم ماعدت طايقه وجودهم

لا من خيرهم ولا كفاية شرهم

وقفت بالمطبخ اللي تحول الى ساحة حرب

قدور الذبيحه

وصحونها والدلال والاباريق والصنايا

فوق بعض بمنظر يسدالنفس

والرز متناثر يملي الارض والسفر مجمعه ومرميه

تنهدت بتعب وفيني الصيحه

بس دخل علي جدي بالمطبخ :

يمة الجادل مشوا عمانتس واخوانتس

لاتنسين يايمه

تحطين عند راسي ماء

اذا جيتي تنامين

هزيت راسي وغمضت عيوني بالموافقه

وقلت له بصوت مبحوح :ابشر ياجدي

ناظر بي نظره متفحصة :علامتس تونسين شي ؟

ايه اونس كلي قهر اونس الغبن ليه تسوي بي كذا

هالكلام يتصارع بقلبي بس ماقلته

قلت وانا امرر اصابعي على حلقي

:شربت بارد وعورني حلقي

عطاني نظرته الحنونه

اشربي حليب مع فلفل اسود ونامي

وان شاء الله تقومين تنقزين العرفج

قلت :ان شاء الله

وطلع جدي من المطبخ

متوجه لغرفته بينام

في ذيك اللحظه انهرت تثنت رجولي تحتي

ماعاد فيني ورميت برقعي عن وجهي

وابتدت دموعي وشهقاتي

.

.

.

:بوم والله صدق من سماها البوم

:بس تراقب وساكته

:والله اني اخاف منها

كان هذا كلام بنات عمي واقفت معي

ويقال انهن يساعدني

ويحشن فيني وانا اسمع

بس تعلمت من سنين ان كلام الجهال ماينرد عليه

اسوي نفسي ماسمعت اتنزه عنهم

بس كلام عيال عمي وعرض جدي عليهم

هو اللي جاب الاول والتالي

تعوذت من الشيطان بعد ماصفى راسي من البكاء

واتنبهت لمكاني وانا وين ووش حولي

(المطبخ بحوسته )

حطيت يدي على عيوني مثل الاطفال وانفجرت ابكي من اول وجديد

:يارب كن بعوني

اصيح واشاهم وافرك بالقدورواحط حرتي بالمواعين

خلصت كل المطبخ وفرغت كل غضبي فيه

وطلعت للحوش اللي يتوسط بيت جدي

والا القمر طالع كأنه يواسيني

والسماءصافيه والنسمه البارده

واتوضى وافرش سجادتي بالحوش وتحت ضو النجوم

واصلي الوتر

ركعات خفيفات

سلمت وانسدحت على سجادتي منهاره خلاص ابي النوم

واناام ذيك النومه الهنيه

يالله لك الحمد

.

.

.

.

البارت الثاني

-

مع الصبح اللي يتنفس حتى النفسيه تنفس وتطرد كل ما يعكرها

صفاء وحلاوة نفس وروح ورضا باللي يكتبه الله

ياربي تزين صباحنا ومسانا باللي يرضيك عنا

سمعت جدي وتهليلاته الصباحية

:لا إله الا الله اصبحنا واصبح الملك لله

جيت عنده وحبيت راسه مثل كل صباح

:والله يا بنتي ان صباحي مبارك بشوفة

عويناتس

:صبحك الله بالخير ياجدي

كيف ممساك البارح عساها نومة هنية

ردعلي :اللهم لك الحمد

قلت:ها يبه وين تبي فطورك هنا والا بالمزرعة

:بالمزرعه ان الله اراد

بعد ساعه ألحقيني فيه

الحين بروح اشوف العامل وش سوى

:زين اجيبه لك بعد ساعه ان شاء الله

.

.

.

بعد ساعة

وتحت ظل الاثلة الكبيره الجادل تمد كاسة الحليب لجدها

:سم ياجدي

: الله يرضا عليس يا الجادل

يازينتس ويازين سنعتس

نزلت راسي واتلهى عن نظرة جدي

كل ما قال هالكلمة يتفحص عيوني

كنت اول ارد عليه واقول

:لاتضحك عليّ انا عارفه ان ماهنا زين فيني

وهو كان يرد علي :الا انتي منبع الزين

ارجع ارد عليه بحدة :لاتكذب لاتكذب

انا شينه ومنحوسه

ومحد يحبني الا انت

حتى جدتي ماتحبني

يزعل علي جدي من كلامي

:انا ولد ابوي

من هو اللي قايلس انتس

شينة ومنحوسة ؟؟ استغفري هذاالكلام مايجوز

ارد عليه بدموع حراقه :كلهم يقولون

غير انه محد يلعب معي

و يهربون مني ولا يتكلمون معي

يرد علي جدي وهو يشيلني على كتوفه

:علميني من هو اللي ما لعب معتس

وانا امحطه باالخيزرانه

.

.

.

:جادل الجاااادل

وانتبهت لجدي يناديني

:وين سرحتي

قلت: قريب ما ابعدت

سألني:هو انتي البارح سمعتي كلامي

قلت ببساطه :ايه سمعت وما اعجبني اللي سمعته

قال بنرفزه :خايبين الرجا

والله ان مافيهم الرجال

رديت بهدوء وحطيت عيوني بعيونه

: زعلي ماهو عليهم

لأني ما أرجي منهم شي

زعلي عليك انت ياجدي ارخصتني لهم تكفى ياجدي خلاص قفل على هذا

الموضوع عرس وماني بمعرسه

خلاص هذي قسمة الله لي

انا راضيه بحالي

وعاجبني وضعي والا انت تبي فرقاي

وتبسمت له بعيون دامعه

رد علي وهو يستعطفني بنظراته

:يا بنتي انا ابي اشوف ضناتس

انا واخوتس ماحنا بدايمين لتس

سكت ماقدرت اناقشه دايم يختم نقاشنا

في هالموضوع بهذا الرد

.

.

.

ابو فراس:شلون جادل ماشفتها البارح ابد

ام فراس:ماعليها طيبه زي العاده دخلت

سلمت وقعدت بمطبخها

شاريتن راسها من الكلام اللي يغثها

ابو فراس :ليه فيه احد قايلن لها شي ؟!

علميني

ام فراس : تخبر اللمز والغمز

ما جد شي جديد

والله اني خجلت منها ماقدرت اساعدها طلعت وهي تحلف ما أمسك شي

بالله اقنع جدك يجيب لها شغاله تساعدها

ابو فراس : ياحليلتس جدي مرره رافض يقول اجيب لها الشغاله في بيت زوجها بس عندي وشعندها شغل انا وهي بس

ام فراس :كل ها الشغل عليها المزرعه والغنم والبيت وضيوف جدك ومايشوفه كثير

ابو فراس : هي راضيه بحالها صدقيني

اخذ الفنجال من يدها وقال: خلينا منهم

شلونس كيف اصبحتي ماعندس طاري ؟

ماتبين نروح للمستشفى ؟؟

ضحكت ام فراس :لا بدري توني بالثامن

صبحنا بخييير خليني اكمله على خير

ابو فراس :الله يقومس بالسلامة ويعوض صبرنا خير ويجي فراس ينور دنيتنا

وقام يتلمس جيوب ثوبه يتأكد من مفاتيحه ومحفظته

:يالله استودعتس الله انا طالع

تبين اجيب معي شي وانا راجع الظهر

ردت : بحفظ الله

وشكرا اذا بغيت شي دقيت عليك

انا بألبس عباتي وبطلع وراك

طلع وهو يقول: مع السلامه وصك الباب وراه

.

.

.

انتهى فطوري مع جدي وشغلي بالمزرعه

وبعد ماحلبت المعزه

ركبت (ددسني) الغماره القديمة

اللي مالها ابواب (((كثير من بنات القرى تسوق )))

رجعت للبيت

الي مايبعد كثير عن المزرعه

بيت جدي بعيد عن العمران

بأطراف قرية صغيرة

والبر والجبال البعيده

واشجار مزرعة جدي البسيطه

اهم مايميز المكان

اقرب جار لنا يبعد عنا تقريبا ثلاثة كيلو

من احب اللحظات عندي

هاللحظه اني لحالي محد يقدر يشوفني

رفعت برقعي لفوق واخذت نظرة سريعه

للمراية القديمة بقدم السيارة اللي اسوقها

وصاحبت نظرتي

ذكرى نظرة جدتي لي الله يرحمها

اذكر نبرة صوتها وهي تقولي :

الله يزين حظتس يا وليدي

هذي دعوة جدتي لي الله يرحمها

كل ما شافت وجهي

وانا صغيره ماكنت افهم هالدعوه

لين كبرت وصرت اعرف ليش هالدعوه بالذات تنقال لي ماتنقال لبنات عمي

من الذكريات المبهمة اللي استمرت معي

ولمن كبرت بعد استوعبتها

"تكبر وتزين ...

"تكبر وتواسى خشتها ....

" البنات بسبع وجيه

الا ذي بوجه واحد .....

"الحمد لله على خلقة ربي

"على من طالعه ؟؟

"مافي احد بالعايله شبهه وشين مثلها؟؟

" اصصصص جت البوم

"بومه

ليييش بومه ؟؟؟؟

ماهو ذنبي وفاة أمي وهي تولدني

ولاهو ذنبي وفاة ابوي وعمتي وبنفس اليوم

وهم راجعين بي من المستشفى

هم الله اراد يتوفون وانا لا

التفكير بذا الموضوع يقلب علي المواجع

تنهدت

استغفرالله استغفر الله استغفر الله

تنفست بعمق

وتعوذت بالله من الشيطان الرجيم

لاح لي البيت وسياره عائلية واقفه عنده

نزلت برقعي على وجهي وتأكدت من غطى عيوني ووصلت

سيارة من ذي ؟؟

وقفت بمكاني المعتاد ونزلت : انفتح شباك السيارة اللي ورى السواق

:السلام عليكم

رديت :وعليكم السلام ورحمة الله وبركاته

قالت :حنا جينا ندور مدرسة الهجره

اللي هنا وضيعنا

حطيت يدي على عيوني اتضلل بها من نور

شمس الضحى

واناظر في السياره

حريم مع ولد شباب صاد عني وانا اكلم

اللي معه

قلت : وينكم وين المدرسه انتم عكستم

الطريق المفروض ما تلفون

من المفرق الاول من المفرق الثاني

بتلقونها جنب قصر الامير

يمكن حول ظ،ظ كيلو من هنا

ردت علي اللي تكلمني

:شكرا لك ياخاله يعني نرجع من طريقنا ومع المفرق الثاني بنشوف قصرالامير صح كذا

قلت: الله الله

قالت :طيب في لوحه في علامة

قلت: اية المدرسة بيوت جاهزه ماهي مبنيه وعليها لوحة مكتوب عليها

قالت : الله يجزاك بالخير

وشكرا مرره شكرا

وشغل السياره سواقهم بيمشي

قلت وانا احط يدي على شباك السياره

:والله ماتمشون تقهووا اول

قالت :شكرا ياخاله والله مستعجلين

بنحط اوراقنا وبندور بيت بعد عشان السكن

قلت ابد والله ما تمشون

يختي فنجال واحد و تلينوا عقب السياره والدوجه والشمس

ناظرت باللي معها بالسياره

تكلم الحرمه اللي قدام

:ها ياجده شرايك ننزل الحرمه ملزمه

قالت الجدة : ايه خل ننزل والله صقعتني الشمس وتيبست عظامي

رد الولد اللي يسوق بهمس مسموع :ووووين ترا ماانا بنازل

فتحت الجده الباب ونزلت عصاها

وركظ الولد لها يساعدها بالنزول ويكلمها وهو كاتم غيضه :ياجده وين الله يخليك لنا

قالت : ياالدحمي تعبت بنريح شوي

ونمشي قبل صلاة الظهر ان شاء الله

وحنا خالصين

رفع عيونه لفوق بتأفف وهو يسند جدته

السبعينيه

دخلت البيت وانا ارحب واهلي

ياهلا ياالله حي ضيوف الرحمن

وردت الجده :يالله يحييتس ويبقيتس

وفتحت باب الغرفه الحديد

ومع ضوء الشمس القوي وضألة ضوء لمبة الغرفه كانت مظلمة هلا تفضلووا

قولي للولد اللي معكم يقلط للمجلس

من الباب الثاني مفتوح

بس يدفه ويدخل

رفعت البنت جوالها واتصلت :دحمي ادخل مع الباب الثاني قدامك المجلس

طلعت وانا شبه اركظ بجهز القهوة وطلعت جوالي البسيط من جيب ثوبي

واتصلت على جدي : السلام عليكم ياجدي اقول ترى جاك ضيوف لقيتهم عند الباب وقلطتهم

رد علي جدي :الله يحييهم انا هالحين جاي ولمي الغدا

وقفل

جهزت قهوتين للحريم ولجدي مع ضيفه في صينيتين و رحت غرفتي وغيرت ثوبي عقب الغنم والمزرعه

ولبست منديل نظيف وبرقع نظيف ورشيت بخة عطر واخذت القهوة

رايحه بها لعند ضيوفي بالمجلس

ام فياض تنهر لمياء

: بس يابنت عيب تصورين في بيت الناس

ردت لميا ءوهي مشغوله تصور :جده خليني اصور دايم نسمع عن

البيوت القديمه ولا شفناها الااليوم

غرفه صغيره بسقف خشبي

وشباك واحد ولمبة وحده

وزولية حمرا صوف ومساندحمرا

مزينه بدنتيل ابيض خفيف

وعلى الجدار معلقه لوحة كبيرة سوداء ومكتوب بالذهبي آية الكرسي

لمياء لقت كنز صور : كلها بنزلها بالانستقرام

بتشوفوون كيف اللايكات بتهل بالالاف

ام فياض :لمياء يابنت خلاص وقفي لا اكسر الكاميرا على راسك

قفلت الكاميرا وجلست :اقول يا جده اشوف طلعت لهجتك

اتس واتس

تبسمت ام فياض بحيافطري :هذا الهرج الزين لوألقى احد اسولف معه بلهجتي

ماخليتها مير ياكافي كلن خلى هرجته وهرجة اهله واجداده

تركية: ابوي يا جده هو الوحيد اللي يكلمك

فيها

ردت ام فياض : ابوتس يحب يسوي اللي

يونسني ويسعدني الله يرضا عليه

مافي مثل ابوكن عسى عيني ماتبكيه

مع دخلت الجادل بالقهوة

وقلت : الله يحييكم

ونزلت الصينيه وبديت اقهوي الجده مديت لها الفنجال: سمي يا خالة

قالت ام فياض :وهي تناول مني :سم الله عدوتس

انا ام فياض وهذلي بنات ولدي

هذي تركيه جاها التعيين عندكم هنا وهذا لميا اختها الوسطى

وهذي فرح الصغيره والوليد اللي معنا ولد بنتي جايبنا

قلت وامد لها التمر ماشاء الله يخليهم لتس

دق علي جدي : هاتي القهوة

قمت ولقيته جايب معه الذبيحه الله الله بغدا الضيوف

ورجعت لضيوفي

قلت: ترى واجبكم حضر والله انها ابرك

الساعات

قالت ام فياض بتتعذر عن قبول العزيمة : يابنتي الا انتي ام من ؟؟

تبسمت وقلت :انا الجادل سمي

قالت ام فياض: ماقصرتي يابنتي جعل خيركم كثيير

بس بنمشي بنلحق على مدرسة تركيه

قلت : دقايق

ورفعت جوالي ادق :

المديره مرت اخوي اقولها عنكم تنتظركم




.
.
.

البارت الثالث

.
.
.

وش اجمل من يوم ينتهي بصحبه جميله

صحبه ما تبي منك إلا الدعاء

صحبه تقول بعد ما يروحون ليتهم ما راحوا



اذن الظهر

وضيوفي ام فياض وبناتها عندي
والأحلى ان اخوي وزوجته الحبيبه جونا تغدوا عندنا بعد ما اتصل جدي على ابو فراس وخلاهم يجون

دخلت ام فراس وهي راسمه نفسها ومعطيه وضعية المديره
بس ما تقدر تستمر
طيبه قلبها تخليها تطلع بشخصيتها الحقيقيه الحنونة المعطاءة
ابلا فاطمة

جلستنا كانت عفويه ما فيها تكلف
حسيت ان ام فياض دخلت قلبي
ما ودي انها تسكت من زين كلامها
كنت اروح للمطبخ اركض اخلص شغلي بسرعة
عشان ارجع اجلس معهم
من زمان ما حسيت بلهفتي على الجلسة مع احد مثلهم
تركيه واضح انها رزينه وكلامها محسوب

فرح منعكفة على جوالها ما كأنها معنا بالغرفة

اما لميا تهبل خفيفة دم
اخذت قلبي استأذنتي تصور في مجلسنا
: يازينك يا خالة جادل ويازين جلستك
ماشاء الله عايشين في متحف عادي اصوره
قلت :خذي راحتس ومديت يدي اتحسس الزوليه
ها لمجلس مجلس جدتي الله يرحمها
وانا ما غيرت فيه شي
ام فياضوهي منحرجه
:السموحه منتس يا بنتي
فشلتنا هالخبله تمشي وتصور
وقرصت لميا زين استأذنت منتس
تأوهت لميا وهي تفرك مكان القرصة وقالت بإمتعاض
: آي عورتيني

تبسمت لها وقلت : عادي والله خليها
قالت لميا وهي تضحك وترفع حواجبها لجدتها :
ههههههه جده روحوا وخلوني عند خاله الجادل

قالت ام فراس بيني وبينها وهي تضحك : يازينها تستأذن ماشافت بعض الناس اللي يجون هنا دايم
ويصورون من دون استئذان
قلت بهمس :بالله لاتقلبين مزاجي
قالت تركيه مقاطعه كلامنا
:ابلا فاطمه متى ابدأ الدوام
قالت فاطمه : عادي يا قلبي الاحد ان شاءالله

هنا ناداني ابو فراس
قمت له يستعجلني بالغدا

تغدوا ضيوفنا و بسرعة مر الوقت
مثله مثل كل الاوقات الحلوة
والله ما كان ودي يمشون

ام فياض دخلت قلبي هي وبناتها



.
.



طلعنا بعد ما توادعنا مع اطيب انسانه مرت علي
جدتي مررررره انبسطت معها
حسيت كأنها لقت احد من اهلها
قبل ما نطلع عطتنا الجادل
اكياس شي مضير وشي زبده وشي سمن وتمر
قالت : هذا طعمه يا ام فياض كلها من مزرعة جدي
ام فياض جعل خيرس كثيير يا بنتي
طلعنا وحنا نتشكر منها


الله يسعد الجادل ماقصرت

.
.
.
اختي فرح بس قلنا يالله بنمشي فزت تركض فرحانه برجعتنا راحت معنا بعد ما اصريت اني اخذها بالغصب
بس ماكان لها اي صوت
او تفاعل كل تركيزها كان على جوالها
عايشه معنا جسم بس
عقلها وقلبها في جوالها

لو ما تغصبها جدتي على الاكل وتسحبها بالكلام
كان ما شفناها ولا سمعنا لها صوت
ايييهه اختي ذي لازم اشوف لها حل
مع وضعها ذا ضروري



نادتني جدتي :تركيه
رديت :سمي يا جده
: عسى اخذتي رقم الجادل
قربت من جدتي بمقعدها الامامي بالسياره : طبعا
اخذته
قالت جدتي للدحمي: عساك ما طفشت
رد الدحمي : الا والله بس استحيت من الشايب وولده

والشايب بس يسأل شلونك وشلون عربانك

حسسني اني بمسلسل بدوي
تقدمت لميا بين الكراسي

: لا تقول ما صورته ؟!؟!

رد الدحمي : لاااا استحيت وجهي ماهو مغسول بمرق مثلك
قالت جدتي : عفيه عليك حبيبي
اللهم يا كافي اختك فشلتنا

مع الحرمه
رد الدحمي وهو يضحك : ههههههه تعلميني فيها ذي مجنونة تصوير حتى النمل ما يسلم منها
ردت لميا :عداال ياللي ما يصور ابد اصلا منين تعلمت انا الا منك هوسك بالتصوير انتقل لي


في هالوقت كنا نمشي وراء سيارة ابو فراس عشان يدلنا على المدرسه

ولما وصلنا للقريه اصر ابو فراس الا يقهوينا

بس جدتي تعذرت منه
وطلبنا منه يشوف لنا بيت عشان بنسكن هنا فترة تدريسي هنا

ووعدنا خير وبعدها توادعنا
وهو راح لبيته وحنا بنمشي خلاص راجعين للبيت

رن الجوال وحنا واقفين ننتظر الدحمي
يعبي بنزين عشان نمسك خط الرجعه
كان ابوي هو المتصل

:جده هذا ابوي خذي انتي كلميه


فتحت الخط لها:هلا والله
رد عليها: هلا والله بالغاليه
وينكم فيه دخلت لقيت البيت فاضي
ردت جدتي : رحت مع الدحمي نشوف مدرسة تركيه
انا مكلمتك قبل كم يوم وراك نسيت
رد فياض : معليش يمه والله نسيت من كثر الشغل
وعسى لقيتوها وخلصتوا شغلكم
ام فياض: اي الحمد لله خلصنا وراجعين
انت لا تروح لين اشوفك
فياض :طيب انا موجود قاعد انتظركم
بجلس معكم هالاسبوع ان شاء الله

....
على صلاة المغرب وصلنا
للمجمع السكني اللي نسكنه مع اعمامي
اللي بناه جدي الله يرحمه له ولحريمه وعيالهم

جدتي ام فياض هي اول حريمه وماعندها الا فياض وعمتي فلوة
اما مرت جدي الثانيه ام محمد فعندها 4 اولاد محمد وسلطان وعبدالله وبندر وكلهم متزوجين وكل واحد ساكن في فيلته الخاصه مع زوجته واطفاله
بنفس المجمع
عمتي فلوه ساكنه معنا مع ولدها الدحمي اللي رضع من امي الله يرحمها
وصار اخونا بالرضاعه ومحرمنا الدائم
اول ما نزلنا من السياره جت خدامة جدتي ام محمد تقول : ماما يقول قهوة جاهز في الحوش
وماما فلوه هناك

قالت ام فياض : طيب قولي لها بس نغير ونجي ان شاء الله ونصلي المغرب
قالت لميا :انا جايه معك
فرح بدون كلام توجهت لغرفتها
وتركيه مع جدتها تسندها وتشيل عنها عباتها
الدحمي اتصل على امه
:سلام وينك
فلوه :قريبه حبيبي هالحين جايتك
ووصلت عند ولدها الدحمي
نزل من السياره وسلم على يدها وراسها

:هلا وغلا بالفلوه ليتك رحتي معنا هالمشوار
حضنت ولدها بشوق : ليته بس تخبر عندي شغلي ما اقدر اخليه واغيب
تمغط شوي وقال: مكسسسر والله بس مواعد الشباب بطلع ساعه وارجع ان شاءالله
تبين شي اجيب لك شي
رددت امه :لا يا قلبي مشكور بس انتبه على نفسك
توجه لبيت الشعر وهو يقول : بصلي المغرب وامشي
ناظرت فيه امه بحب : استودعتك الله الذي لا تضيع ودائعه

في مكان ثاني بنفس البيت

دخل فياض على امه لقاها تصلي
وانتظر لين سلمت ونزل يسلم على رجلها ويدها وراسها
: الحمد لله على السلامه يمه
:الله يسلمك ويعافيك فكت شرشف الصلاه وبان ثوبها الروز الاخضر والازرق مطعم بشوية شالكي اصفر

تأمل امه بإعجاب : يه يه ماشاء الله وش هالزين
يمه غطيتي على كل البنات

استحت ام فياض وضحكت : أي وش على بالك هذا
ابسط شي عندي
ضحك فياض وهو ياخذ بيدها ويجلسها على القعده الصغيرة اللي بغرفتها
: بشري يمه عسى ما اتعبتس هالمشوار
ردت : الاوالله الله يعين هالمدرسات على الطريق

بس اللي هون علي الطريق
المكان اللي رحنا له يازينه
فياض:أي عاد انت تحبين أي شي يذكرس بجداني الله يغفر لهم
ام فياض :اليوم زي ما تقول كان مغامره
ضعنا الا شوي بس ربي ساقنا لبيت اجواد
ماقصروا معنا
والحمد لله طلعت مديرة تركيه زوجة ولدهم
وساعدتنا

: زين الحمد لله

دق تلفون السنترال
رفع السماعه : هلا يا يمه تبسم وقال :
أي انا ماسكها عنكم دقايق واجي انا واياها نتقهوى معكم
يالله فأمان الله

وقام وقامت امه معه وتوجهوا لحوش
ام محمد خالته مرة ابوه

على القهوة والسوالف الحلوة كانت لمتهم

تتوسط جلستهم ام محمد وام فياض
واللي تقهويهم لميا
فياض عن يمين امه واخوانه محمد وعبد الله
وبندر وسلطان وفلوة
كلهم جالسين ويسمعون سوالف ام فياض
عن رحلتهم اليوم وماشافوه فيها
جت تركيه شايله صينيه
فيها المضير والسمن والتمر المكنوز والزبده
ونزلتها بين الجالسين
قال فياض : وش هالكلام الكببير تمر ومضير
وبدوا لشباب يتلذذون بالتمر والمضير
مدت ام محمد يدها واخذت من الاقط
وذاقتها وش هالزين يا ام فياض
شارينه من الديره اللي رحتوا لها ؟
قالت ام فياض :لا والله هذا هديه
من اللي كنا عندهم اليوم
سواة يدينها باجعل ربي يسلم يدها


قال فياض : بالله وش يحرمنا من هالشي الطيب غنم وعندنا وبعارين وعندنا ومزارع وعندنا ورى ما تسوون سواة هالاجوديه
ضحكت فلوة وقالت :خلاص حنا تحضرنا وتطورنا والله ماعاد ندبر شي وليش نتعب انفسنا ونلقاه بالسوق
قالت ام فياض : والله صحيح ذبحتنا البيوت المكيفه واعتمدنا على الخدم ونسينا سنع امهاتنا وجداتنا

نطت لميا وقعدت قدام عمتها فلوة :الله ياعمه لو تشوفين بيتهم يهبل كل شي تراثي والا خاله الجادل ما كأنها في زمنا هذا والا طبخها اممم لين الحين طعم الغدا بفمي من كثر ما هو لذيذ
وفتحت الكاميرا توري عمتها: شوفي شوفي
هذا بيتهم من برى وهذا الحوش وهذي الغرفه اللي جلسنا فيها شوفي بالله
فلووة شدتها الصور :ماشاء الله صحيح قديم بس باين النظافة والاهتمام
ودارت الكاميرا بينهم يشوفون الصور والتعليقات على جمال تصوير لميا واللقطات
انتهت الجلسه وكلن قام لبيته


........

صلى الوتر وقام يتفقد بناته
أتجه اول شي لغرفة فرح
لقى الغرفه باارده والنورمفتوح
وفرح نايمه والجوال بيدها

اخذ الجوال وقفله وحطه على المكتب

وقرأ ايةالكرسي والمعوذات ونفث عليها

شعور بالذنب سيطر عليه
وهو يتأمل بنته الصغيره ام 13سنه
عز المراهقه والحساسيه والنفسيه المتذبذبه
وهو دايم بعيد او مشغول
ومع هالشي يتيمة ام
صحيح امه ماتقصر ولاخته
بس مافي مثل الام
تحتوي بنتها وتراعيها

مع بنته فرح شعور الفقد يتعاظم عنده
واحتياجه لزوجته يتزايد
تنهد بحسرة
الله يغفر لك يا عفاف

قفل نور الغرفة وطلع راح لتركية
لقاها نايمة
وبعدها راح لغرفة لميا

لقاها سهرانه
تحمل الصور على اللاب
تبي تعدل فيها وتضيف الحقوق
عشان تشارك فيها بمسابقه تصوير


مانمتي :
اشغلتس هالصور
ردت وهي تقفل اللاب :خلاص خلصت ياحيالله فياض
شلونك يا ابو البنات :
لوني اسمر :

انسدح على سرير لميا : انتم شلونكم وانا بعيد عنكم هالمره طولت عليكم

لفت كرسيها عشان تقابل ابوها
:والله كانت الايام ممله جامعه بيت بيت جامعه بس صار معنا احداث واكشن اليوم غير الروتين شوي
ابتسم ابتسامه هاديه : احمدي ربك يا لموش هالايام المملة اللي تقولين عنها غيرك يتمناها امن وامان ودراسه مجانيه ومكافأه
حنا غرقانين بالنعم عسى ربي يرزقنا شكرها
خجلت من نفسها لميا وقالت :استغفر الله واتوب إليه والله انك صادق يبه اللهم لك الحمد

اسمع يبه شهر وبيكون الجو برد وتكون اجازة الربيع على الابواب حضر نفسك تكون معنا ما تقولي مااقدر اترك شغلي ونياقي
ضحك : هههه والله وانا صادق ما اقدر ابعد عن نياقي بس بحاول ان مارحت معكم الدحمي او واحد من عمانك ينوبون عني
بس وين تبون تقضون اجازتكم

قالت لميا وهي تتبسم لاشعوريا من طاري الاجازه:امممم خليني افكر واشاور خواتي وجدتي وبعدين نبلغك عشان تحجز لنا اوكي

قام من السرير وهو يتمغط بكسل :خلاص تم يا بنت فياض


:::::::

فكيت شعري من ضفيرته ابي انسدح وانام
وتبسمت يوم تذكرت محاولات ام فراس اني انزل برقعي اليوم

واقفين بالمطبخ نجهز الغدا
قالت بنرفزه :ياشيخه فكي برقعتس وخذي راحتس
تراهم ماهم ربعنا تندسين عنهم
قلت : لا خليني كذا ما اقدر
ماتعودت احد يشوف وجهي
فاطمة وهي توزع الايدام بصحون
: انتي بس مكبره الموضوع
ترا بس اول مره بتحسين الموضوع صعب وبعد كذا بتعودين

رديت برفض : لا مره ما اقدر وقطعت الكلام يوم شلت الصحن رايحه فيه عند ضيوفي

ما عندي الجرأه ابدا ان احد يشوف وجهي

يكفيني ماجاني من كلام ونظرات

لبسته وانا صغيرة وتعلقت فيه يوم لقيت الراحة معه
ماانتهت مشكلتي معه بس خفت كثيير

الوحيد اللي ممكن ارفع برقعي عنده هو جدي

هواكثر انسان أمنه على نفسي ومشاعري
عساني ما خلى منك با جدي




.
.
.



البارت الرابع




.
.
.


الصلاة خير من النوم
فزيت بسرعة
من اول وأنا اتكاسل شدني دفى اللحاف وظلام الغرفة
قمت اتوضأ اليوم برررد
اتراجف من بعد الوضوء لبست اثقل جلابيه عندي ادور الدفى
صليت وبديت اجهز الفطور والقهوة لجدي

مديت يديني اتدفى بنار الغاز
تحت ابريق القهووة
الله يستر احس البرد بعظامي


شديت شالي الصوف علي اكثر ابي ادفى خلصت فطور جدي وحطيته بسلة القهوة
بسرعه ابي ألحق جدي قبل لايروح للمزرعه مافيني اوديه
شافني جدي :صبحتس بالخير
:كنت متلثمه بشالي نزلته عن فمي صبحك بالنور جدي
هذا قهوتك وفطورك
اليوم ما اقدر اروح للمزرعه احس اني تعبانه

اخذ مني السله ونزلها وتحسس جبيني : الله يحفظتس يابنتي روحي انسدحي وخذي مره
ان شاء الله تقومين احسن
طيب ياجدي :
اول ما طلع جدي رحت بسرعه اندسيت بفراشي وبطانيتي ادور الدفى
ذبحني البرد


*********
بسم الله توكلنا على الله
ولا حول ولا قوة الا بالله
سبحان الذي سخر لنا هذا وماكنا له
مقرنين وإنا الى ربنا لمنقلبون


يارب تهون علينا سفرنا وتطوي عنا بعده

اليوم الجو بارد مع هوا شديد
والسحب رمادية اتفقت مع ابوي انه هو اللي بيوديني لدوامي اليوم
ابوي هالاسبوع جالس معنا خليني استغل وجوده
عشان يسنعني ويروح يشرف على سكني هناك
من قبل صلاة الفجر وانا وابوي بالسيارة مسكنا الطريق

الطريق مره شين طريق رايح جاي وقديم من عادتي ما انام بالسياره
اخاف انام واقوم على كابوس
اي حركة بالسيارة تخلني اشد اعصابي واثبت نفسي بالكرسي غصب عني
عيني دايم على ابوي اخاف انه ينعس او يسرح ويتشتت انتباهه


اليوم صادني وانا مركزه فيه

مد يده وطبطب على يدي بحنيه
: امي انتي اهدي واسترخي بإذن الله ما يصيبنا الا ماكتب الله لنا
اهتز صوتي فيني رهبه وخوف : غصب عني الله يخليك لي والله احاول استرخي بس بلحظه يرجع لي كل شي واتذكر الحادث
تنهد ابوي وضغط على يدي اكثر : انا ما اطلب انك تنسين بالعكس شي طبيعي انك ماتنسين حدث صعب مريتي فيه
سكت لحظة كأنه يرتب كلامة اللي بيقوله
:تركية حبيبتي لازم وضروري تحاولين خصوصا انك بتداومين وكل اسبوع بتمشين على هالطريق
قلت: الله يعيين عشان كذا اصريت ألقى سكن يخفف علي المشوار
فياض: بس نوصل ان شاء الله بدور واشوف الديره اذا فيها بيوت للايجار


********

دق جوال فلوة برقم غريب
فتحت الخط
السلام عليكم
ام عبد الرحمن
: اي نعم
:انا طلال
اففف وش يبي ذا داق علي من صبح العالمين
:نعم يا ابو عبد الرحمن خير متصل هالوقت
سكت شوي وجبر نفسه يتكلم
: انا مع عبد الرحمن بالمستشفى
شهقت من خوفي على ولدي: وش فيه ليه بالمستشفى
قال بنبره هادية : طيب طيب الحمد لله
بس سوى حادث وانكسرت رجله
بصوت باكي ترجيت : بالله عليك يا طلال وش فيه

:والله انه طيب وخذي كلميه انا بس قلت اكلمك اول اعرفك تخافين عليه خذيه
:يمه
بصوت باكي: دحمي حبيبي ابوي انت وانهرت ابكي
دحمي : يمه والله اني طيب حتى الكسر بسيط الحمد لله
هذا جزاة اللي مايسمع كلام الفلوة
رديت بعصبيه وخوف ورحمه كل المشاعر تضاربت عندي: كنت راكب الدباب !؟!
قلي قلي وشلون تعورت ؟
ضحك الدحمي : زي ماقلتي
قلت بسرعه ولهفة : وينك بأي مستشفى
رد الدحمي بسرعه: تو طلعنا من المستشفى وهذانا بالطريق ابوي جايبني للبيت بيني وبينكم ربع ساعة

قلت بعصبيه ولهفه : طيب طيب بتلقاني عند الباب
قال الدحمي : لا يمه مايحتاج وماقدر يكمل كنت قفلت الجوال وركض لغرفتي ألبس عباتي


وبسرعه نزلت تحت انتظر الدحمي

وبعد الانتظار الطويل وصلت سيارة طلال وفتح له الحارس
ودخل لين وصل قدام باب ع¤يلا امي

وانفتح الباب اللي جنب السواق وشفت الدحمي حبيبي
طيب هاا !!
واتحسس وجهه
جنبه اليمين كله خدوش وكدمه وش كبرها ويده ملفوفة ورجلة اليمين مجبره
قعدت ابكي وهو لامني بيده اليسار : يمه حبيبتي والله اني طيب
بصوت مكتوم : حرام عليك والله ما اتحمل يصيبك شي خاف الله فيني
قال طلال: اذكري الله يا فلوة الرجال طيب الحمد لله جته سلامة من الله

تنبهت لوقفة طلال بجنبي وخرت واضفيت عباتي على يديني ونزلت نقابي اكثر ابعدت شوي عنهم
وبقلبي اقول : الحمد لله اللي حفظه لي

مد الدحمي يده لابوه يساعده بالوقفه وتسند على عكازه ومشى مع ابوه لداخل البيت
وانا اسبقهم قال طلال :ها يا بطل وين اوديك تبي غرفتك
قال الدحمي: لا خلني هنا بالصاله بعدين اروح غرفتي
وناظر فيني يبي يطمني : يمه والله اني طيب
سكت تجمعت العبرة بحلقي
ان تكلمت انهرت وبكيت اكثر
مدري انا ابكي على فجعتي بولدي وسلامته والا ابكي على شوفة طلال عقب هالسنين كلها

ناظر طلال فيني
: ماعندكم قهوة
قلت ابشر دقايق وتجيك

ورحت للمطبخ وكلمت الخدامة تجهز القهوة وطلعت لامي لقيتها منسدحه تسبح على سجادتها

: يمة طلال تحت تكفين انزلي له


***********

في داخل مدرسة القرية
المتواضع
اجتمعت ابلا فاطمة بالمعلمات الستة والسابعة كانت تركية اللي وصلت الساعه ظ§ الصباح وانتظرت الى ان انتهت الحصة الثالثة ودق جرس الفسحة
مجتمعات المعلمات على سفرة الفطور البسيطه مع الشاهي والقهوة
قالت ابلا فاطمة :
اعرفكم على زميلتنا الجديدة تركية الفياض
اليوم اول دوام لها
اليوم بنعرفها على مدرستنا وعلى نظامنا
ومن بكره بنكرفها
تبسمت تركيه واستقبلت ترحيبات زميلاتها لها كان الجو العام لطيف وفيه محبه بين المديره ومعلماتها
**************

على الساعة عشر انشغل جد الجادل عليها من النادر انها تمرض او يطيح حيلها دايم وهي شعلة نشاط ترك شغله ورجع لها للبيت
ودخل عليها غرفتها لقاها نايمة ومتلحفة ومتكوره على نفسها وتنافض من السخونه
نزل عند راسها وتحسسس جبينها لقاه زي النار حار
حست الجادل بيد جدها : جدي برررد زيدني ببطانيه من الدولاب
قال جدها : لا انتي مسخنه وماينفع تلحفين
وشد بطانيتها عنها
تمسكت فيها بيدين واهنه
وكحت بوهن : لا جدي برررد غطني

وصارت سنونها تتكتك وتصك ببعض من البرد اخذتها الرجفه بعظامها
قام الجد وراح للمطبخ واخذ من الثلاجة بنادول وعبى بغضارة مويه ومنشفة ورجع للجادل
:قومي يمه قومي خذي هالحبه يمكن تنزل حرارتس
وبجهد قدر يسندها وجلسها
شدت البطانيه عليها
واخذت الحبه من جدها وياله بلعتها

رجعت انسدحت
وصار يقرأ عليها وينفث
مرت ساعه وهي تتنافض من السخونه
الى ان دق جوال الجادل
رفع الجد الجوال ورد على ام فراس
هلا فطيم:
هلا جدي :
وين الجادل عن جوالها
الجد يتنهد: بنيتي تعبانه
من السخونه تراعد تحت اللحف
قالت فاطمة : بسم الله عليها
جدي هالحين اقول لابو فراس يجي يشيلها للمستوصف قبل مايقفلون الظهر
قال الجد: زين يالله انا انتظره اخاف تتعب اكثر


******* *
ماشاء الله الديره باين عليها واعده
واهلها ان شاء الله ناس اجواد
ركب سيارته عقب ما طلع من مكتب مدير مدرسة الاولاد ابو فراس اللي دخلها يسأل عن الاوضاع في هالديره وما طلع من عند ابو فراس الا وهم متواعدين على الغدا بشرط ان ابو فراس مايتكلف والوعد بعد صلاة الظهر

وكعادة القرى واهلها
كان فياض وسيارته الجيب محط انظار القرية واهلها
ايش تسوي سيارة جيب اخر موديل وبلوحة مميزه في مثل هالمكان المتواضع


اغلب الناس على قد حالهم بيوت متواضعه
وسياراتهم اكثر تواضع كلهم يعرفون بعض دايم الغريب مكشوف

مشى فياض يستكشف المكان و منه يقضي وقت الى ان تطلع تركيه من دوامها
ومنه يشوف البر والفياض القريبه
وكل تفكيره انا ويني عن هالمكان من زمان



تجول بالمكان وبعدها رجع ثاني للقرية
ولفت نظره مزرعه مهجوره
وقف سيارته ونزل يشوف
المكان

ارض محوطه بعقوم من التراب ومسوره باشجارالاثل
وبواقي جذوع النخل
وبيت من الطين المهدم اجزاء كثيره
منه بفعل الامطار والزمن
فتح كاميرا الجوال وصور البيت والبير والمزرعه من الخارج
وكتب بالملاحظات مزرعة الفياض الجديده بإذن الله
وحرك سيارته متجه للقريه بيسأل عن هالمكان وش قصته
ومنهو راعيه

******
سبحان الله من البارح الجادل في بالي
ابي اكلمها االصبح ما فضيت
بس على الساعه 10 ونص
ماقدرت اصبر اتصلت عليها
ورد علي جدي وعلمني انها تعبانه الحين انا واياها بالمستوصف
فكت الممرضه الهندية المغذي من يد الجادل اناظر الساعه الا 12
الان المفروض يدق الجرس انصراف الطالبات وكلت المهمة لوحدة من المعلمات وطلعت للجادل
تسندت علي الجادل بوهن
قلت :يالله ياقلبي الغدا عندنا
جدي ينتظرنا بالبيت
بس دقايق بمر المدرسه اخذ اغراضي وملفاتي
ابوفراس كلمني الصباح يقول ان عندنا ضيف
فياض الفياض ابو تركيه حلف عليه بالغدا
والحمد لله ابو فراس كفاني شر الطبخ
بيطبخه عند المطبخ
كانت الجادل واهنه مافيهاحيل حتى ترد على كلامي

تغطينا وطلعنا من المستوصف
والجادل معي خطوة بخطوة
يدي بيدها اخاف تدوخ وتطيح
فجأه وقفت الجادل بنص الطريق بين المستوصف وبيتي
وضحكت بوهن
: المفروض انا اساندتس واساعدتس بالمشي انتي وكرشتس
قلت مستغربه منها وانا اضحك :هههههه امشي الصخونه لاعبه فيتس يالله تعالي وسحبتها معي لداخل مبنى المدرسه
لقيت تركية واقفه وماسكة عباتها ومعها المستخدمه بتقفل المدرسه ما بقي الا هن
قالت تركية : ابلا فاطمة ابوي كلمني قالي انتظرك واروح معك للبيت
قلت لتركية : يالله ثواني بدخل مكتبي اجيب اغراضي ونروح جميع لبيتي


دخلت وانا اسمع المستخدمة تقول
وهي تناظر الجادل بتفحص
: من انتي؟
رفعت الجادل الغطاء عن عيونها وعرفتها المستخدمة : الجادل
وسلمت عليها
قالت تركية متفاجأه :خالة الجادل
واقبلت تسلم عليها بفرح
بان على الجادل الوهن صوتها مبحوح والتعرق من اثر المغذي
حست تركيه فيها
:سلامات سلامات وش فيك يا خالة
قالت الجادل : الله يسلمتس
وتسندت على الكرسي اللي وراها وجلست
: شوي تعبانه وتوني راجعه من المستوصف

رجعت فاطمة وقومت الجادل وتركيه وطلعوا لبيت فاطمة

قبل البيت بخطوات
وقف جيب ذهبي يجيب العافيه
قدام باب بيتي

ونزل منه ذاك اللي بارك الله ماوودكم العين القشرا تشوفه
بثوبة الابيض وغترته البيضا
امير امير
حسيت على نفسي وغضيت البصر
قلت : تركية هذا الوالد ؟
قالت تركية بفخر : اي هذا ابوي
قالت فاطمة : ماشاء الله الله يخليه لكم
اتجهنا لباب الحريم اناوالجادل وتركيه
وفتحت الباب ودخلنا وانا ارحب واهلي : ياهلا الله يحييكم تفضلو ا ياهلا والله

بسرعه نزلت عباتي
ابي احضر مع الخادمه للغدا
كان جاهز بس ينتظر نقلط عليه الرجال
الحمد لله خدامتي متعوده على العزايم وتعرف وش تسوي

**************
:في مجلس الرجال
يبه هذا فياض الفياض صاحب مزارع الفياض
سلم فياض على الجد واقبل عليه بكل احترام
الله يحييك ويبيقك :
ناظر الجد نظره متفحصه لفياض
: شلونك وشلون شيبانك
رد الفياض : بخير الله يجعلك بخير

ودار ابو فراس بالقهوة
والقدوع اللي دايم موجودة بمجلسه ومشبه

قال ابو فراس : يبه هذا فياض ولد العرب اللي جونا قبل كم يوم
اسفهل الشايب
:ياهلا يالله تحييك شلونك وشلون امك
والولد وش اسمه مع نظره لابو فراس
رد فياض : عبد الرحمن

:
طيبيبن الله يرضى عليك
:
دارت السوالف والاخبار
لين وصلت السوالف الى عشق فياض وغرامه الابل عطايا الله

قال الجد : ماشاء الله عندك نياق
رد فياض بعد ماعدل جلسته وفك ازرار ياقته
الله الله :
واليوم اخذت نظره على منطقتكم
وجازت لي
وشفت لي مزرعه مهجورة مدري راعيها يبيعها او لا؟؟
ووصف طريقها ومكانها
قال الجد :هذي المزرعه لولدي الله يغفر له وصارت ورث لبنته
وماأظن انها تبيعها

قطع الحوار ابو فراس وهو يقول : الله يحييكم على الغداء
تفضل يا فياض الله يحيك والله ماهو بحقك ولاقدرك بس السموحه
وقلطوا على الغدا اللي كان ذبيحة محمره على رز عربي مع السلطات والفواكهة واللبن


***************
اول ما دخلت بيت اخوي
توجهت للمغاسل ابي اتوضاء
نزلت عباتي وعلقتها و
فكيت برقعي و طرحتي وبديت اتوضأ

حسيت نفسي انتعشت بعد الوضوء
اشهد ان لا اله الا الله وحده لا شريك له وان محمد عبدة ورسوله

اخذت طرحتي بألبسها الا هذي تركية جايه مقبلة علي بتتوضأ
صديت عنها بشكل لا ارادي واخذت برقعي بسرعه ولبسته

وقفت جنبي متبسمة بحرج
بتوضأ:
اذا بتصلين انتظرييني
نصلي جماعة
قلت وانا انزل كمام ثوبي على ذرعاني : زين انا انتظرتس
تركتها
ودخلت عند فاطمة بالمطبخ
:
بالله عليتس ارتاحي مانبي شي
قالت فاطمة : اصلا خلصت حطيت الشوربه على النار
دقايق وهي جاهزه انتي لازم تشربينها مع ليمون وفلفل اسود
قربت مني فاطمة وهمست
:
:بنت جادل شفتي المزيون ابو تركية
وغمزت لي
ناظرت فيها بإستغراب : لا وين ومتى شفتيه؟
ردت بهمس وعيونها على باب المطبخ
:قبل شوي وحنا راجعين ماشفتيه؟؟؟
موتن حمر وحطت اصبعها تحت عينها
(تعبير عن الزين والجمال)
هزيت راسي بالنفي
ظربتني على راسي بخفة : الله يخلف عليتس فاتس شكل الصخونة لعبت براستس ما قمتي تشوفين

قلت لها وانا اطلع من المطبخ
: وين ابو فراس يسمع ويشوف
لحقتني وهي تضحك
:يختي ماقلت شي ياربي
ماقلت الا الحقيقه
ورجعت تسوي نفس الحركة اصبعها تحت عينها : موووتن حمر الله يخليه لراعيته
ناظرت فيها وحبيت يدي وجه وقفا وقلت الحمد لله والشكر استخفت مرة اخوي
امشي امشي خلينا نصلي الظهر لايروح وقتها ماصلينا



.
.
.

البارت الخامس

.

.

.

" حتى فمان الله ما طاوعتني

ماغير بالدمعة ترجمت لها الحال "

غلبني الشوق وساقتني خطواتي بدون ما اشعر لقيت نفسي

ادخل واجلس واسولف مع عبد الرحمن

على امل اني اقابلها او حتى ألمح زولها

هي ذيك المره يوم جبت عبد الرحمن من المستشفى

تهربت فلوه مني وارسلت لي عمتي ام فياض اللي ماتغيرت علي

وكانت دايم معي ومع رغبتي ان فلوه ترجع لي فراقها جرح عميق لايمكن يبرا

.

.

.

هذا اخر ما بيني وبينك :

:طيب انتي علميني وش اسوي

سدت اذانيها بقوة وبصراخ وبكى

: مالي دخل والله ما اقعد بهذا البيت طلقني

طلاق مستحيل اطلقك افهمي :

انفتح باب الغرفة بقوه ودخلت علينا امي

خير خير اشوف صوتك يلعلع بكل البيت

وقفت بين امي وفلوة :يمة لو سمحتي انا واياها نتفاهم

اطلعي الله يرضى عليكِ

قالت امي وعيونهاعلى فلوة

اسمع كلامي وخله حلق بإذنك:

انت واياها بنت اختي هي الاصل

واللي مو عاجبه مع السلامة

سامعني

تاففت فلوة وتحرقصت مكانها

وطلعت امي من الغرفه بعد

ما عكرت الجو اللي شكله ماراح يصفى

لبست فلوة عباتها بغضب

امك انهت الموضوع خلاص :

ورقتي توصلني لبيت ابوي

وقفت بينها وبين الباب

ما ابيها تطلع

والله ما ابي غيرك بس الظروف حدتني

امي حلفت علي وابوي شرط رضاه علي بزواجي منها

صرخت علي فلووة : وينهم ماحلفوا عليك وانت ما تزوجتني ؟؟

ليه هاالحين ؟؟

والا عشان امك بتربيني زي ماقالت لي

مسكت ايدينها احبحبها : فلوتي تكفين لا تهدمين بيتنا وحياتنا

ودمعت عيوني

ردت وهي تمسح دموعها

: امك هاللي هدمت بيتنا

افهميني ياحبي:

والله ما اقدر من غيرك وكملت اترجاها :

لك اللي يرضيك

نطلع انا وانتي ببيت مستقل

وهي تجي تسكن مع خالتها

نفضت يدها من يدي

وصرخت ببكاء وقهر : لا يعني لا

تهقى امك بتخلينا

انا تصلت على ابوي واكيد انه برى ينتظرني

قطع كلامنا دخلت امي وهي مبتسمة بشماته وجبروت

: ابو الشيخة فلوه يقولها اطلعي

اخذت عبد الرحمن من سريره وطلعت وهي تبكي

ووانا وراها ابي احاول معها لاخره لحظه

.

.

.

يبه يبه:

ههيييي يبه وين وصلت

انتبهت لنفسي وانا في مجلس فياض

وولدي عبد الرحمن جنبي

قلت وانا احاول اجمع صوتي : قريب

الا خالك فياض متى بيجي لنا حول الشهر ماشفناه

خالي سلمك الله مشغوول :

اشترى مزرعه

ونقل مراح حلاله هناك

وتخبر هو متولع بالحلال

وشكل هوا الديره ناسبه

حتى جدتي معه من اسبوعين ماشفناها

رديت : ماشالله الله يزيده من خيره

*********

تركية: لميا بكره اذا جيتوا بالله جيبي معك

شنطتي السودا نسيتها اخرمره جيت

وفيها اغراض مهمة

لميا: طيب وش بعد

تركية :جدتي تقول جيبوا ملابس شتويه ترى مرره برد

وتقول لاتنسين فروتها

ضحكت لميا: اي ما يمسك قليب جدتي الا فروتها

تركية: اسمعي لممووووش في موضوع مهم لازم نتعاون فيه الموضوع يخص فرح

اللي هي امانه عندنا عقب وفاة امنا

لاننا بنسأل عنها يوم القيامه

لمياء بإنتباه : وش فيه

تركية : انتي شايفه وضع اختنا

وصلت مرحلة ادمان الاجهزة

هالاجهزة اللي غزتنا واشغلتنا حتى عن امور ديننا وانفسنا

لميا : أي والله صادقه طيب وش تبيني اسوي

تركية بجدية: حاولي تفتشين بأغراض فرح اي شاحن للايباد او الجوال اخفيه تماما

واذا قدرتي تخربينه مافي مشكله

لميا ء : طيب ابشري بس تعتقدين هذا حل

بتسطي على شواحنا

تركية : عادي انتي نفذي اللي قلت لك واذا جيتوا اقدر عليها ان شاء الله

لميا: طيب

**************

جالسين انا والجادل وفاطمة

مديت عليها اوراق البنك : المبلغ كله بحسابتس

خلاص تمت البيعه الله يبارك لتس

ناظرت بي الجادل

: طيب انا لي جزء بس الباقي لك ولجدي

رديت :جدي وعماني وانا متنازلين من زمان لتس

تذكرين من توفت جدتي

بعدها بفتره علمتس ان المزرعه لتس

والله يالجادل هذي وصية جدتي وبعد رغبة جدي

مزرعة ابوي تكون من نصيبتس انا الحمد لله عندي خير

الله مغنيني

دمعت عيون الجادل وقامت حبة راسي : الله لايخليني منكم

ضميتها بيدي اليمين : انت راس المال ياخيتي

الله لايخلينا منتس

وانا ان شاء الله بدور لتس ارض زينه

وعلى شارع تجاري وابنيها لتس محلات تترزقين الله بأجاراتها

قالت فاطمة : وهي تغمز للجادل

شراكة انا وانتي النص بالنص

الجادل : تستاهلين يا ام فراس كلي لتس

******

خلال شهر تغيرت المزرعه المهجورة

وبانت جهود فياض فيها

تحولت العقوم الترابيه الى اسوار حجريه

والبيت الطين تبدل لاساس فيلا صغيرة

ومن الجهه الثانيه بيت من البيوت الجاهزة الى ان ينتهي بنى الفلة

والارض انتعشت بفسايل النخل

والاشجار الجديده والارض تزينت بالممرات والاناره والثيل

والري فيها عن طريق التنقيط

تحولت لمزرعه عصرية بعد ماكانت مزرعه مهجورة تسكنها الكلاب

وبالمنطقه القرييه منها

امر فياض رعيانه يسون مراح الابل الجديد

وبيوتة الشتوية المتنقلة مع الوايتات كلها وصلت من اسبوع

استقر فياض وطاب له المكان

وعشان يتبارك المكان كانت امه معه

ومع تركية فرش البيت مثل ماتحب امه

"

"

وصل تركية للمدرسة ورجع لامه ومزرعته

جلس جنب امه في مجلسها اللي يطل بشباكه العريض على المزرعه

وقعد يهمز رجيلاتها اللي مغطتيها بشرشف الصلاة الاحمر :

هاا يا ام فياض عساتس مبسوطة

وقفت ام فياض تسبيحها : اي بالله مبسوطه يالله لك الحمد

بس باقي تكمل فرحتي وتخليني ادور لك بنت الحلال اللي تريحك

قلت :

الله يرضى عليس يمه هالموضوع لا عاد

تفتحينه معي والله مالي خاطر بالعرس ولا افكر فيه هو

انا فاضي!!

خلينا من هالموضوع وقومي معي اوريس الحلال

وقمت ومديت لها يدي انهضها معي

وبشرشفها ونقابها طلعت معه لبرى المزرعه

شوفي يمه هذي اللي شريتها اخر شي:

واشر على مجموعه من النياق الوضح

ماشاء الله الله يبارك لك:

يازين عطايا الله

سبحان اللي خلقها

وهو يفرج امه على ذوده

اقبلت ناقتة العذبه تتمسح فيه وهو يطبطب عليها

يمة عرفتيها هذي العذبه:

:اي ياربي ياحلوها حلوواه

تحبك وتقبل عليك

وقرب الراعي وناوله من العلف وصار فياض يأكلها بيده ويمسح على رقبتها

ناظرت امه بالفحل المعقل : وراكم معقلين الفحل

رد فياض : اذى الرعيان والله لو ماهو سلالة طيبه كان من زمان بايعه

ناظرت فيه ام فياض: الله يعطيك من خيره ويكفيك شره

: اييه ام فياض كثري لي من هالدعوات الطيبه

رفعت ايدياتها: الله يعطيك لين يرضيك ويسعدك ولا يشقيك ويرزقك ويغنيك

تناول يد امه وحبها : عساني ماخلى أي والله

وكملوا مع بعض يد بيد شوفتهم للحلال والمراح

********

على صلاة العصر وصلن بنات فياض

وفلوه جايبهن الدحمي

و سواق وسيارة الرنج حقت فياض

لميا بإنبهار تام : وش هالزين يا فياض ماشاء الله تمشي خطوة وتصور عشر صور

استقبلهم فياض وهو مشمر كمام ثوبه يكمل شغله الناقص

بس يحورف بالمزرعه

يحب كل شي مضبوط وبمكانه

انشرح خاطرة بشوفة بناته واخته

: ياهلا وغلا بحبايب قلبي اختي وبناتي من قدي اليوم

رد الدحمي: افى وانا مالي تهلي وترحيب

ضحك فياض : افى يا ابو فياض انت الاساس ونور العين ياولدي

لمياء : يووووه انتفخ من الوناسه وش عاد يفشه الحين بيشوف نفسه علينا يبه

ردت فرح: اصلا احسن واحد هو الدحمي وهي تركض للبيت وشايله ايبادها والشاحن اللي عطاها اياه الدحمي مادرى بتخطيط تركيه ولميا

وقفت تركية وتناظر بلميا نظرة لووم

رفعت لميا كتوفها بعجز واشرت على الدحمي بمعنى هو اللي عطاها

تركيه : ادخلوو بسرعه عن البرد تجمدت اطرافي وجدتي تنتظركم

قال فياض : ادخلوو بكلم السواق والرعيان وارجع لكم

**********

يالله مسا خير ناظرت الجوال والا رقم اخوي ابو فراس

: هلا

كلمني بصوت مرره متأثر باين فيه نبرة البكا :

الجادل:

ابشرس بولد اخو ابشرس بفرااس يالجاادل

ضحكت بفرحة وقلت : ماشاء الله يالله لك الحمد

بشرني عن فطوم

قعد يشاهم ويبكي ويالله قدر ينطق

: طيبه طيبه الحمد لله توها طلعت من غرفة الولاده بالله تعالي سنعيها امها بتجي بكره

قلت : ابشر بعزك ياخوي اسنعها تستاهل ام فراس ويستاهل ابو فراس هالحين اجي انا وجدي

وبسرعة سويت قهوة وقرفة وحليب و اخذت مرة وتمر ورشيت عليه حبة سودا ورشاد وفلفل اسود وسمن وعبطتها بسرعه كلش بسرعه ابي اطير لفطوم

دخل علي جدي ودموعه بعينه

وصوته متهدج : حبيت راسه قال

يالله لك الحمد اللي شفت ضناهم:

قلت : اي اللهم لك الحمد

قالي : وعقبال ما اسوف ضناتس يابنتي

سكت ما ابي اتجادل معه واتناقش مافي وقت

قلت وانا اشيل سلة قهوتي

توديني يم فطوم:

مسح عويناته وقال : يالله مشينا

ورحنا يم مستوصف القرية

اللي ولدت فيه فطوم

ونزلت من السيارة طايرة ابي اشوف فراس وامه وابوه

يااالله ياحلو لهفتي عليه هالنتفه

وصلت للغرفة اللي فيها فطوم غرفة الطوارئ

كانت الممرضه الهندية تفك المغذي من يد فاطمه

وفاطمة مسكينه ذبلانه و وجهها باهت ومحاجر عيونها غايره وسودا

وجنبها على سرير المواليد

ويبكي نتفة صغيرة ملفوف بالكافولة

وابو فراس واقف ومتكتف حايس بحاله مايدري كيف يتصرف

قلت : حبيب عمته النتفه

يااااويسي هالصوت طالع منك وقربت من فاطمة

وانا احب راسها : مبروك ماجبتي

ياعمري

وجدي واقف وراي اقبل عليه ابو فراس وحضن جده وانهار يبكي

وجدي يتعبر ويتغصص يالله ماسك نفسه

مبروك يا ولدي الله يجعله الولد المبارك ويبلغك فيه:

وخرت عنهم ولفيت حول سرير فاطمة ورحت اشيل فراس ياااااا تبل الولد تبلاه ( ياكبرالولد كبراه) شلتة بشووويش خايفه عليه

اول مرره اشيل نونو وورطت فيه ناظرت بالممرضة :تعالي ساعديني

تبسمت فاطمة بوهن : جادل هالنتفه انا وانتي بنتعلم عليه

ضحكت : اي والله لا انا ولا انتي نعرف الله يعينه علينا

قال ابو فراس : اجل الحمد لله عمتي بكره بتجي عشان تنتبه لولدي

قالت الممرضة مقاطعه كلامهم : بابا مدام خلاص خروج ومدت كيس ادوية

قلت لابو فراس: انتظرونا برى ألبس فاطمه عباتها

وطلع جدي واخوي وقمت اسند فاطمة بالراحة عشان نرجع بيتها

ولفت الممرضة فراس بكافولته وبعد ماجلست فاطمة على الكرسي المتحرك حطته بحضنها

وطلعت بهم لبرى المستوصف عند باب سيارة ابو فراس

الحمد لله بيت اخوي قريب

الله يعينس يا فطوم الليلة بررد:

كانت فاطمة واهنه وبردانه واضح مسكينة

وصلنا للبيت

وبسرعه دخل ابو فراس السيارة بوسط الحوش وشال فاطمة وانا شلت الصغير وبسرعه لداخل البيت اللي كان مثل الفريزر

شال اخوي فطوم ونزلها

على السرير اللي مجهزته لنفسها بغرفة الحريم

وفتح المكيف الحار ولحفها

بالبطانيه بعد ما نزل عنها عباتها وشبشها

استحيت منهم ونزلت النتفه فراس

ورحت اركض اجيب ترامسي وتميرتي

وناديت الخدامه قلت لها : ودي الدفاية عند مدام

وبعدها طلعي لحمة من الفريزر بسسرعه

هالحين اجيتس

قبل ما اوصل غرفة الجلوس كحيت

ابي انبههم اني جايه والله خجلت ادرعم

كان فراس يفحط بالصياح وفاطمة تئن من المغص

واخوي اول ماشافني قال عندتس اياهم

الله لا يخليني من هالزول

وطلع

اول شي سويته صبيت بكاسة حليب وناولتها فاطمة

ابي جوفها يدفى

وما يمسك القلب مثل الحليب الحار

ناظرت لي نظرة امتنان : الجادل

قلت لها :سمي

قالت :قولي اميين

قلت: آمييين

قالت وهي تتلذذ بالحليب وتتدفى بحرارته

ياجعلني ازوجس واشوف عيالتس قبل ما تخلص هالسنه:

ضحكت هههههههه

لا اله الا الله كل ذا عشان جبت لتس حليب:

قالت : ايييه والحليب هين

كل هذا وانا احاول اركز على اني شايلة نونو بيني ايديني اخاف يطيح

قلت لها: هالنتفه شكله جوعان بترضعينه والا تسوين له رضاعه

قالت :والله مافيني ارضعه خليني اقدر اسند نفسي الحين الممرضه علمتني شلون اسوي له حليب شوفيه بأغراضي

ونزلت النتفه بحرص شديد

والخدامة جت تتسحب تبي تشوف النونو

ناديتها: الله جابتس تعالي

وطلعت فطينه الحمد لله وعندها خبره وصارت تضحك علي انا وفاطمة إنا ما نعرف شي

سوت الرضعه ورضعت النونو وغيرت له وانا مفتحه عيوني

وفاطمه المسكينه نامت من التعب والاجهاد

نبي فاطمه تنام اخذنا فراس معنا للصاله انا والشغاله

و بعدين بديت اسوي مرقوق باللحم والخضار لفاطمة

خلصت الطبخه وغرفت لفاطمة وصحيتها تتعشى

وبعدها نامت ماتحيط من التعب

عشيت جدي واخوي وبعدها فرشت فراشي جنب سرير فاطمة ونمت عندها لو احتاجتني اكون قريبه

وانتهى يومي تعبانه ومرهقه بس هالتعب يهون وله لذه بفرحتي بفراس ولفاطمة واخوي يستاهلون كل خيير

*****

ليلة باردة وممطره بغزارة

ليلة انورت فيها الارض ولمعت بالسما البروق وضجت بالرعود ليلة فتحت السما قربها وسفحت على الوديان ماها

سبحان ربي من ساقاها وامرها

بالمطر يحي البلاد ويفرح قلوب العباد

يارب اجعلها صيبا نافعا يارب

لمع البرق ودوت بالسما رعوده

ولهجت بالدعا ام فياض :

سبحان من سبح الرعد بحمد والملائكة من خيفته

لا اله الا الله

كانو واقفين على باب البيت والمطر يرشرش عليهم بفعل الهوا البارد

جدا لكن لذة شوفة المطر ما منعتهم يتعرضون

تركية: بكره اكيد مافي دوام اللهم لك الحمد

لميا :من الله جتنا الاجازه الحمد لله

فياض لبس جكيته العازل عن المطر وغطى راسه بالقبعه ولبس يركض رايح للحلال

طلعته تفقدية للحارس والرعيان هم بخير متدفين

والحمد لله كانت امورهم بخير ورجع يلهث

وهو يفرك ايدينه ببعض

:الله يرحم حال الضعووف الليله ليلة طويله عليهم

الامطار غزيرة والبرد شديد

لميا وهي ترفع الكاميرا : لحظه لا تدخل ولقطت صورة لابوها وهو بذا الشكل تحت المطر

الله عليك يافياض احلى صوري تكون معك :

دفها بخفه وتركية

ودخلهم البيت وسكر الباب

برررد تدفووا يا بناتي:

وناظر بأمة جالسه ومتدفيه بفروتها وتسبح وتهلل

اي تدفي يا ام فياض الله لا يخليني من عويناتس:

طلعت من اخر غرفة فلوة وهي متلفلفة بالبطانية : وش فيكم ازعجتوني

قالت لميا : صح النوم ياعمة امطار ورعود وبروق وماصحيتي الا على سوالفنا

ضحكوا على فلووة لان نومها ثقيل وماتقوم بالساهل

الدحمي : فديت امي اللي نومها خفيف ما تصحيها قنابل

ظربته على كتفه : ولد دافع عني

**********

يالله لك الحمد نومه هنيه نمتها انا ونتفتي فراس

تلفت حولي لقيت الجادل نايمه

تأملتها نايمه على جنبها الايمن وحاطه يدها تحت خدها نايمة ومتلفلفه بجلال صغير لي سماوي فاتح

منفك عنها وجديلتها الثقيلة جنبها

وبانت لي ملامحها الناعمه

بالله ماهو حرام هالنعومه مالقت من يقدرها ياعزي عنتس ياخيتي

ليتتس تشوفين نفستس بعيوني

والله ياانتي تهولين القلب ماشاء الله

تململت بنومتها كأنها حست فيني

وانا رجعت تراخيت بفراشي ادور الدفى

الليلة الله العالم ابرد ليلة من دخل الشتا

بس فكرت اني اغمض عيوني

بدى فراس يطلع اصوات ويحرك رويسه الصغيرون وبكى فزت الجادل حبيبتي وقامت على حيلها تعطيني اياه ارضعه لازم ارضعه اصح لي وافود له

لبست برقعها الجادل

قلت لها امطرت ماشاء الله تصب

** وقفت وقالت بصوت نعسان

رضعي النتفه بروح اجيب لتس شي تاكلينه

****************

مرت الايام

وبعدما انتشر خبر ولادة فاطمة بدت الزيارات للمباركه

اول خمس ايام كانت ام فاطمه متواجده لكن بحكم انها ام وعندها صغار من زوجها الثاني ماقدرت تطول عند بنتها

استمرت الجادل بتواجدها اول النهار مع فاطمه وبالليل ترجع لجدها

عشان تكون مع فاطمه اذا زارها احد

واليوم

كان الزوار غيير

حريم عمانها

وام فياض وبناتها

من بعد صلاة العصر

فتحت الباب لحريم عماني

الاربع

بعد السلام والمجاملات

كعادتي معهن ما قدرت اقعد ابي اطيرللمطبخ

قالت مرة عمي الكبير

: الله يادنيا

شفتي حالتس علينا ياجادل

والا اللي تصير معه فلوس ما يناظربالناس

اقعدي وين انتي رايحه

قلت : قريب اجيب لي غرض من المطبخ واجي

واناظر فاطمه ابيها تساعدني

قالت

فاطمة :بالله اجادل جيبي لي معتس كافولة فراس اسألي عنها سيتي

قلت لها ابشري ورحت للمطبخ

دقايق ودق باب البيت الداخلي

كانت ام فياض

: ياهل البيت

رحت شبه اركض : هلاهلا

يوم شافتني ام فياض وهي تتبسم لي

: هلا بتس

وكان سلامنا حار بالاحضان احب ام فيااض مرره دخلت قلبي هالادمية

ودخلت معها تركية ولميا وفرح

ووحده اول مره اشوفها

سلمت عليهن

وعرفتني تركية

خالة الجادل هذي عمتي فلوة :

: ياهلا تشرفنا نور البيت

قالت فلوة : هلا بك اكثر والبيت منور باهله

ودخلتهم غرفة الحريم

تبادلوا السلامات

وعرفتهم فاطمه على بعض

انه هذي جدة تركية المدرسه عندها بالمدرسه

ولا قالت ان هالناس هم اهل فياض الفياض

اللي جا جديد على الديره واشترى اراضي فيها ونقل حلاله هنا

جلست معهم اقهويهم

ولميا وفرح كانوا ساكتين وتركيه تسولف مع عمتها فلوه

وام فياض معي وفاطمه

اما حريم الاعمام

فكانوا صامتين متفرجين مراقبين لادنى حركه اوكلمه

قبل صلاة المغرب استأذنوا المراقبين قصدي حريم اعمامي

وبقت ام فياض والبنات

بس قبل مايطلعن الا يسممن بدني بكلامهن

" انامدري على بالهن ما اسمعهن والا ما اشوفهن وهن يتغامزن علي

عيني عينك تقول بوجهي

وهي طالعه

الله اكبر وجه البوم تعرف تضحك وتسولف

اثر الفلووس تنطق حتى اللي مالهن لسان

قالت الثانيه

حظ القبايح لا قالوا

استغفرت ربي بعدما صفقت الباب وراهن

ناس عجيبه غريبه

خليني ارجع للناس الحبيبه

دخلت لقيت لميا هنا فكت وبدت

تسولف

: ما اعرف اخذ راحتي اذا في ناس تراقبني بعيونها وخصوصا اذا متربقعات

قالت فلوه تنهر لميا وهي محرجة من الجادل لانها ببرقعها

بنت :

وقالت لميا: لا الجادل غير

برقعهاغير وهي غيير

اسمحي لي اشوف اني اكبرك يوم اقول لك يا خالة احسك بعمرنا ماعاد بناديكِ الا الجادل

استحيت : ابدخذي راحتتس يالميا الله يسعدتس

قالت فلوة : وهي صادقه

مير يالجادل انتي وفاطمه

امي بس تهذري فيكن

حبيتكن من قبل لا اشوفكن

قلت انا وفاطمه بصوت واحد :الله يحبكم والله ماتحبون الا اللي يحبكم

قاموا للصلاة

ومديت لهم السجاجيد والشراشف

ورحت اجدد القهوه والشاهي

واطلع الفطاير من الفرن

على ما يصلوون

رتبت القهوة والشاهي والفطاير عند فطوم ورجعت فلوه وام فياض ولميا بعد ما خلصوا صلاة

اما تركيه وفرح فكانوا جالسين مع فاطمة وفرح

مبهورة بحجم فراس

ماسك اصبعها بيده والدنيا مو واسعتها من الوناسه

: ياقلبي شوفي تركية ماسك اصبعي

تركيه اعجبها ان في شي لفت انتباه اختها غير الاجهزه

وقالت تمزح بعد ماغمزت لفاطم

: اذا حبيتيه شرايس ناخذه معنا للبيت

ألتفتت مبسوطة: قولي والله نقدر ناخذه معنا

ضحكت فاطمة وتركيه

: لا طبعا

قالت ام فياض اللي جلست جنب فرح

الحين امه تنتظره من سنين وانتو تبون تاخذونه منها

هههههه

برطمت فرح شوي فقالت جدتها

بس نقدر نجي مره ثانيه تشوفينه

قالت تركيه الحين يالله قومي صلي

قالت :خالة جادل

وين اصلي

رحت معها

لاني ما صليت المغرب للحين

وفردت سجاده

كبيره وصليت انا وفرح مع بعض

بعد ما خلصنا صلاه و ابي افك شرشفي

قالت فرح

: خاله ممكن اطلب منك طلب

قلت لها وعيوني تبسم لها : امريني ياقلبي

قولي

قالت فرح بخجل وبنبرة رجاء

:ممكن تعلميني شلون تلفين شرشف الصلاة

امي الله يرحمها كانت تلف الشرشف مثلك

******

بعد شهر

الدنيا ربيع والفياض تلونت بالزهر والاطيار

وارتفع العشب يغطي الصحاري

سبحان من ابدع وصور

طالع من الصباح انجز اشغالي

وعلى الضحى وصلت للمزرعه

جاني يركض الراعي :

ألحق

ألحق ياعمي الفحل هاج على الراعي مرزوق

؟!؟!؟ : وش تقول عسى ماتعور

الراعي : الحمد لله جات سليمه

ورحت لمرزوق لقيت وجهه مجروح ويده

: سلامات الحمدلله على السلامة

قال مزروق: الله يسلمك ياعمي

ياعم هذا الفحل هاج و انجن ماقدرنا عليه

جيت اعقل رجوله لولا الله ثم مسعد كان روحتا فيها

لاحول ولا قوة الا بالله وينه هالحين :

ردوا الاثنين :هرب

ركبت الجيب وانا احاول اتتبع اثاره

خايف يأذي احد

ورا اثاره وورااه

الى ان بدت تختفي العشب غطى على الاثار

وقفت اتلفت اتشاوفه يمكن يكون قريب

مشيت يمكن ثلاثه كيلو على مهل امشي وادربل ادوره لين لمحته من بعيد واقف

انا امشي بالسياره ناصيه على مهل خفت ينتبه لي ويهرب

يوم قربت منه وهو يرفع راسه ويناظرني ويرجع يناظر قدامه ويركض وانا ورااه مسسرع

وانا ورااه انتبهت لسياره واقفة

وفي احد جالس قدامها

وكل ماقربت شفت الزول اكثر

هذي حرمه وبوسط البر وبسيارتها والجمل يركض قاصدها بينها وبين السياره امتار

تمشي وتنزل للارض وترجع تقووم

علققت البوري

ابيها تنتبه ا للي جاي ناويها

الله يستر

زدت السرعه ابي اقرب منه

ورجعت اضغط على البوري ابيها تنتبه لي

واخييرا رفعت نظرها لي

وشافت الجمل يوم إنه قرب منها

وقفت ماعااد يمديها تلحق نفسها

وانزل من السياره ركض ابي ألحق على المرة

والرشاااش معي

و اوقف بينها وبين الفحل وافرغ فيه المشط كامل

وطاح الجمل عند رجولي وهو يرغي ولهاته برى حلقه وثور سحاب من الغبار

وصرت انا بين الجمل والحرمه

ألتفت لها وأنا ألهث وبصراخ : انتي صمخا عمياء

ماتسمعين ولا تشوفين

ناظرتها لقيت عليها اثار الصدمة وعيونها مليانه دموع

قالت بصوت يتراجف وهي تأشر على البعير

: وش فيه وش صار

وبعدين ليش تغلط علي من تكوون؟

وبعز انفعالها

وبان ثغرها هبت هوا قوية ورفعت برقعها

نظره بس لثواني معدودة

وبعدها صديت

وبقلبي اقول

لااله الا الله وش ذا

انا ولدك يا بوي

راحت علومك يافياض

بري حالي

شهقت حسيت ان روحها بتطلع

:يافضحي

ومسكته بيدها وصرخت فيني : واسدلت برقعها على وجهها

اكسر عينك عمت عينك

حست بالاحراج بعد الصدمه والروعه اللي صارت لها

ركضت وركبت سيارتها

وانا وراها ابي افهمها

: اسمعي يابنت الاجواد الفحل اللي ذبحته تراه لي منطلق من الرعيان بعد ماهاج عليهم ولو ما لحقت عليس كان الله يعوض على اهلتس

سفهتي ومشت وخلتني

ما رمشت عيني الى ان اختفت سيارتها

ورجعت اناظر بالبعير

ونزلت امسح على راسه

انت اللي حديتني اذبحك

.
.
.




البارت السادس
.
.
.




أبي منه الخبر ويقـول لـلاه
لِفا المرسول وماعيَّـن محلَّـه

وقلبي تايهٍ مِـن عـام الاوَّل
ألا يالله يسَّـر مـن يدلَّـه

خذاه الَّلي على خدَّه علامه
سوادة غيم في شمسٍ مطلَّـه

سرقني مادريت إنَّه سرقنـي
سلبني و أحسب إنَّي فاطنٍ له

أنا يوم أرسل عيونه لقلبـي
عطيته مُهجتي والمعطـي الله

نصف زين الخلايق في عيونه
وباقي الزَّين في باقيـه كِلَّـه


الزمن : قبل اسبوعين

المكان : بيت الجد

الجادل مشغوله بالمطبخ تجهز الغدا اليوم
ابو فراس بيجي من الرياض
اتصل عليها وقال: جهزي الغدا بتغدا معكم

واقفه بالمطبخ وتتسمع اذاعة القران
بالها خالي من اي تفكير دام جدها وابوفراس
وفاطمه وفراس بخير


على صلاة الظهر
دخل عليها ابو فراس
وسلمت عليه بحراره
: ماكأنك تأخرت قلت يومين بس
والحين لك خمس ايام
ضحك ابو فراس وقال :كنت مشغول بس اراكض
ابي اخلص اشغالي
وسحب يدها : تعالي تعالي
واخذها لحوش الحريم
وتفاجأت بالسياره اللي بوسط الحوش
سيارة gmc غماره اخر موديل بلون فضي
ضغط ابو فراس بيده الريموت
واشتغلت السياره
قالت الجادل : ماشاء الله وش هالزين
بارك الله تتهنى يا اخوي
قرب منها وفتح يدها وحط الريموت بيدها :
مبروكه عليتس يختي الله يعطيتس من خيرها
ويكفيتس شرها
طارت عيونها من المفاجأه وتلعثمت
: لي انااا
تناظر بالسياره وترجع تناظر اخوها
قال ابو فراس : هذي هديه بسيطه لتس
ولا هو بقدرتس عندي
قالت وعيونها تغورقت بدموعها امتنان :
بس مرره كلفت على عمرك
وبعدين توك مهديني الشهر اللي فات
طقم ذهب وبذيك الحسبه
ضحك وقال: هذاك الطقم شراكة بيني وبين فاطمة
شفتها بتشتريه لتس قلت بالنص بيني وبينتس
شفت هالسيارة وقلت هذي اللي تليق باختي
اماسيارتس القديمة
خلاص تصير للعامل

وحاوط كتوفها وقادها للسياره
تعالي خليني اعلمتس عليها
وجلسها بمقعد السواق وهو جلس جنبها
واخذ يشرح لها كل شي عنها

ضحكت الجادل وهي فرحانه بالسياره
: الحين وين بسوقها مافيه الا هالبران
قال ابو فراس :اي عادي سوقيها بهالبران
يا أغلى من ساق سياره
الله لايخليني منتس ياخلف امي وابوي

.
.
.
بعدها بأسبوعين..
.
.

اليوم الجو صحو غيوم متفرقه
ودرجة الحراره منخفضة
بس دام الشمس ساطعه يصير البرد محتمل
بعد اسبوع ممطر
ربعت الفياض وازهرت
والعشب بكل مكان هو نفل هو شيح
والا خزامى والاحميض
والا رمث وقيصوم من كل شكل ولون
الربيع اغراني اروح أعشب و ركبت سيارتي
واتجهت للفياض القريبه من مزرعتنا
وقفت بروضة وانا اتأمل هالجمال
سبحان الله اللي احياها عقب ماكانت صحاري جرد
اخذت المحش والاكياس اللي اجمع بها
مشغله رادو السيارة على اذاعة القران تسليني
واخذه راحتي يالله لك الحمد امن وامان
ومنهمكة احش من هالاعشاب
واذكر الله على هالربيع

فجأه

رفعت راسي واخذت نظره على المكان اللي انا فيه
الا ذاك البعير اللي يركض ناحيتي مقبل علي
ووراه سياره جيب طااااايره ومعلق على البوري
مدري وش جاني رجولي حسيتها تخشبت
تصنمت ماقدرت اهج واهرب عن البعير
اللي يرغي ويزبد
لا ارادي نزلت برقعي على وجهي
وقلبي بينشلع من الرعب والخوف
قرب مررره البعير ماعاد الا يدعسني
وغمضت عيوني بقوووه ومن الخووف

ماعدت اسمع ولا اشوف ولا اتنفس
وبقلبي اتشهد
اشهد ان لا اله الا الله واشهد ان محمد رسول الله

وصم اذني صوت الرصاص
وراا بعض وصراخ رجال علي
فتحت عيوني بذهول
انتي صمخا عميا

ماتسمعين ماتشوفيين انتي

امتلت عيوني بالدموع
وعيوني على البعير اللي طايح
ودمه ملى الارض حوله
وبنبرة خوف على ذهول
لييه كذا
وش صار


وبعدين ليش تصارخ علي ومن تكون
قهرني وهو ينافخ علي


فجأة هب الهواء وارتفع برقعي وانكشف وجهي


شهقت
يافضحي فضحاه
ابي الارض تنشق وتبلعني
ابي اهرب
وتجي عيني بعينه
واقف بثوبه البني
ورشاشه بيده
وعيونه مانزلت عني
صرخت به : اكسر عينك عمت عينك
ركضت للسياره بسرعه ابي اهرب واختفي
وهو وراي يبربر مدري وش يقول
ايديني تتراجف يالله ماسكة الدركسون
ونبضات قلبي صمت أذاني
وصلت البيت ودخلت السياره بالحوش وسكرت البوابه
ودخلت للبيت ألهث
ياربي
رحت للمطبخ واشرب مويه ولا رويت
دخلت غرفتي فيني رجفه
توضيت وفرشت سجادتي ابي اهدأ
صليت ركعتين
والحمد لله كأني احسن
اخذت لي حول ساعه جالسه على سجادتي

:الجادل
ألتفت وراي الا هذا جدي
وقلبي قام يرقع
جدي وش جايبه هالحزه
ماهو بوقته
لايكون درى عن اللي صار


ابي اقووم اشوف وش يبي
تعقلت رجولي

جا هو وقعد جنبي : بسم الله عليتس
علامه لونتس مخطوف؟
قلت بسرعه
:لا مافيني شي
انت قلي وش فيه
غريبه ماهي بحزة جيتك

قالي
:جانا ضيف ابي القهوة
وان طاوعني يمكن يتعشى عندنا


فزيت على حيلي : ابشر هالحين اجهز القهوة

رحت للمطبخ وجدي راح لضيفه
جهزت القهوة والقدوع والاقط
اخذت الصينية ونزلتها عند الباب دقيت الباب
وانتظرت الى ان اخذها جدي ورجعت اشوف شغلي

طلعت برى البيت احط الخبز الناشف
عشان ياخذه الراعي
واشوف ذيك الشوفه اللي ماتسر

شفت جيب اللي ذبح البعير
واقف عند حوش الرجال

واحط الخبز بسرعه وارجع للبيت واصك الباب بيدين تتراجف
معقوله لحقني؟
معقوله عرف من انا؟


جلست بغرفتي ابي اهدا اخاف يجي جدي
ويشوفني بها الحاله

دقايق واتذكر اني وانا راجعه عيوني على المرايه
اشوف احد لحقني او لا
وغير كذا سيارتي داخل الحوش والباب مقفل

قلت لنفسي ابي اطمنها
ارتااحي محد لحقتس ولاعرفتس
اصلا ليش بيلحقني
الحمد لله والشكر
*****


بعد صلاة المغرب
جلسة رايقه تجمع الجده وفلوة و ولدها وبنات فياض
في المزرعه
فرح تلعب مع الارنب الابيض الصغير
مرررره مبسوطه فيه
واليوم اشترت له شريطة حمرا
والان تحاول تربطها له فيونكة على رقبتة
ناظرت بالدحمي
: تكفى تعال ساعدني
ترك كوب االنسكافة
وقرب من فرح واخذ الارنب من يد فرح
: هذاني مسكته لك يالله
واخذت الشريطه وربطتها
قالت الجدة : يابنتي لا تزنطينه فكي الشريطه
قالت فلوة : يمه ما راح تزنطه
بتحطها وماراح تشده على رقبته صح ماما

تقاربن تركية ولميا من بعض وحطن روسهن على بعض
قالت تركية بهمس ونظرة رضا
: لميا ملاحظة
ردت لميا وعيونها على فرح: اي والله تطور
ماكنت اظن انها بتسكت وتلهى بشي ثاني
بعد ما خربتي الشاحن الجديد
تركيه: الله يجزاها خير الجادل اللي اهدتها هالارنب

اثناء الجلسه
وصل فياض
ووجه ما يتفسر
فزت ام فياض على حيلها
: بسم الله عليك
وش فيك
وعيونها على ثوب فياض اللي مرشوق بالدم
واقبلت عليه بتحضنه
رفع ايدينه مايبيها تلمسه
وحاوطنه البنات والدحمي ونظرات القلق تملاهم
قال عبد الرحمن
:خير ياخالي عسى ماتعورت
رد بجمود : انا بخير
واشر على ثوبه
اليوم هاج الفحل وهرب واضطريت اذبحه
ورفع رشاشه اطلقت عليه
شهقت فلوة : عسى ما ذبح احد
قال فياض ومشهد الحرمة يتمثل قدامه
الله ستر وسلم
قربت منه فرح وضمته من وسطه بدون كلام
بس عرف وشتبي تقول وايش هو احساسها

قال: فروحتي انا طيب يا ماما
بس قرفان من نفسي
خلوني اتروش واغير
وابي ارتاح
من الظهر وانا اطارده
سحب كل طاقتي وحيلي

وتركهم وتوجه لغرفته
وبلحظات كان متروش ومغير ومنسدح على سريره
يحاول انه يرتاح

غمض عيونه
ونط هالسؤال لذهنه وين ممكن تكون اختفت؟
.
.
.


بعد ما راحت واتبعتها بنظراتي
لقيت نفسي اركب سيارتي وأحاول ألحق اثار سيارتها

مشيت الى ان وصلت لمزرعة
جد ابو فراس
طلع لي ولزم علي بالقهوة ولحقته بسيارتي
وعيوني تدور سيارتها الفضيه
دخلنا بيتهم المتواضع اللي مايبعد عن المزرعه كثيير

لي جالس مع الرجال نص ساعه وعقلي ماهو معي
سألته من حولكم جيرانكم
قال ابو فارس : اخر مزرعه مزرعتنا وقبلنا
مزرعة ال الناجي
تبعد عنا ثلاثة كيلو
وبعدنا ماتلقى الا النفود
قلت : كيف الربيع هالسنه ياعم
قال وهو يقرب لي القدوع
: الحمد لله خير هالسنه احسن من العام
جلست شوي معه و تشكرت منه انهيت الزيارة
ركبت سيارتي
وكل فكري
وين اختفت ومن تكون ؟؟

تقلب على سريره وكأنه على شوك

اشغلتيني يا بنت الاجواد
******

بعده بكم يوم

فاطمة شايلة فراس وواقفه عند الجادل بالمطبخ
:تعالي هنا قولي لي وين عقلتس
اكلمتس وما انتي معي ابد

قالت الجادل وهي تشيل القهوة وتتوجه برى المطبخ
: تعالي للحوش نتقهوى
واعلمتس
جلسن بالحوش
قالت الجادل وهي متردده تقول لفاطمة او لا
: قبل كم يوم صار لي موقف
ومن ذاك اليوم وانا قلبي منخرش
كل ما سمعت صوت سيارة هبط قلبي

قالت فاطمة : خيرر قولي اشوف
تلفتت الجادل وهي واثقه ان مافي احد حولهم بس زيادة تأكيد
:مو قلت لتس قبل كم يوم بروح اعشب
قالت فاطمة :ايه
ردت الجادل : رحت وحكت لفاطمة كل اللي صار

حتى وصلت لهبت الهوا ورفعت البرقع
صارت عيون فاطمة قلووب وضحكت وصفقت بيدينها
:اييييييه وبعدين
قالت الجادل وهي معصبه
:وش بلاتس استانستي

قالت فاطمة :خليني وكملي الحين وش صار بعدها
قالت الجادل :هربت وهو بعدها لقيته وراي جاي لجدي
قالت فاطمة بفررحه :
الله اكبر

لحقتس الفارس المغوار
ردت الجادل : مدري هو لحقني والا صدفه
ما سألت جدي عنه ولا ادري منهو
قالت فاطمة : اوصفيه لي وانا اقولتس منهو

ردت الجادل وحمر وجهها
:وش اوصف فيه رجال بلحيه و شعره طويل
فوق اكتافه
هذا اللي اذكره
قالت فاطمة وهي تضحك
:طيب دب نحيف ابيض اسمر طويل قصير
ردت الجادل بنرفزه :
والله مدري عنه ما اذكر الا لحيته وشعره
لاني ماقد شفت شعر رجال طويل وناعم كذا
قالت فاطمة :الله الله
ردت الجادل وعيونها تقدح شرر على فاطمة
:خلاص بس انسي اللي قلته لتس
بس انا اعلمتس يوم تقولين وش اللي مشغلني
والحين علميني متى تمايم فراس ان شاء الله
قالت فاطمة : بعد بكرة ان شاء الله الخميس
الحريم عندنا بالبيت
والرياجيل بالقاعة اللي قدام قصر الامارة
قالت الجادل :على خير ان شاء الله
ردت فاطمة :من بدري تعالي
وكملن كلامهن عن تجهيزات تمايم فراس


******
يوم الاربعاء

جدي

توصلني لبيت ابو فراس
فاطمة تبيني اقعد عندهم الى بكرة
قال جدها
:خلاص نروح العصر عشان اروح للديره اقضي للمزرعه
والمزارع يلحقني بسيارتي نحملها



و على صلاة العصر
وصل الجد الجادل بسيارتها لبيت اخوها نزلها
واخذ السياره عشان يتلاقى هو والمزارع بسوق الديرة


وهناك بالسوق وقف سيارته وراح يقضي اشغاله
وحمل سيارة المزارع باللي يحتاجونه
ولمن رجع لسيارة الجادل
لقى فيه سيارة جيب مقفله عليه مايقدر يطلعها

دقايق وجا صاحب السيارة
فياض الفياض
وهو يتعذر من الجد
******

صليت العصر وتوجهت لسوق الديرة اقضي للمزرعة
وتوني داخل السوق
واشوف سيارتها الجمس الغمارة الفضي واقف
وقفت ورا السيارة بالتمام
ابي اشوفها وابي اعرف منهي ومن تكون
نزلت من سيارتي
واخذت لي مكان اشرف منه على السيارة
عشان اول ما تركب سيارتها اكون قريب
مرت خمس دقايق
عشرة
ربع ساعه
نص ساعه
وانا واقف
جاني اتصال رديت كان طلال
ابو عبد الرحمن
حاولت اصرفه ما ابي افقد اثرها
لدقايق ألتهيت بالمكالمة وانهيتها
وارجع اناظر على السيارة لقيتها شغالة
رحت بسرعه ووقفت عند شباك السايق
وانكسحت يوم شفت لحية جد ابو فراس الحمرا
ما تصورت ان بتكون نفس موديل السيارة
عند احد ثاني
تعذرت منه وركبت سيارتي وحركتها
وقفت بموقف ثاني
ورحت اكمل مقضاتي اللي ما بديت فيها
وانا ألوم نفسي وتفكيري الي مسيطره عليه
ام برقع يهفهف

********

عصر الخميس
في مزرعة فياض

ام فياض وفلوة جالسات يتقهون
قالت ام فياض متى تبونا نروح للتمايم
قالت فلوة انا من الحين جاهزه جلابيتي علي
بس اخط الكحل واحط الروج وامشي
قالت ام فياض لاتحطين شي
يقعدن هالحريم يتمقلن بك
ضحكت فلوة : يمه وش علي منهن
انتي بس شوفي لميا وش بتلبس هي اللي نبهيها
لا تتهور وتنسى اننا في قرية
دخلت لميا وهي تتثاوب : والله لو ماهو خاطر ابلا فاطمة والجادل كان نمت جايتكم من الجامعه للمزرعه طيران

وناظرت بجدتها :لا تخافين ياجدة ماني منزلتن عباتي
وان نزلتها بكون لابسه فستان طويل وواسع
قالت ام فياض :عفية على بنيتي المزيونه
روحي تمددي شوي يابنتي
وعلى صلاة المغرب اجهزي لان العشا نصلي ونمشي

على صلاة العشا راحوا كلهم لتمايم فراس ام فياض وفلوة والبنات
وفياض وعبد الرحمن

عند بيت ابو فراس
قال فياض لامه قبل تنزل: يمه انا بعد العشا برجع للمزرعه
وانتو متى ما خلصتوا كلموا عبد الرحمن يجيكم
قالت ام فياض: ان شاء الله
ريوس عشان يرجع بطريقه
وشاف السيارة الفضيه واقفه
قدام البيت تنهد فياض من كل قلبه
وحرك سيارته متوجه لعشا الرجال

******
تزين البيت بالانوار
مثل ما زين فراس بيت امه وابوه
اليوم تمايم فراس بعد صبر عشر سنوات
ربي عوض عليهم بولد
وكل الدعوات بأن يكون صالح بار بوالديه

دخلت الجادل على فاطمه بالمبخرة تبخري وانا اختس
ولاتنسين تقرين على نفستس وعلى فراس

قالت فاطمه وعيونها تغورقت بدموعها وهي تناظر بفراس : اللهم لك الحمد كما ينبغي لجلالك وعظيم سلطانك الحمد لله اللي تم علي هالنعمه ورزقني بفراس
تأثرت الجادل بدموع فاطمه: ياقلبي الحمد لله اللي عوض صبركم خير
باست فراس واخذ المبخره

يالله ياقلبي الناس على وصول عشان تستقبلينهم
وبدأوالضيوف بالوصول وامتلى المجلس بالمحبين والمهنئين
ابلا فاطمه حبايبها كثيير والكل حاب يهنيها
بعد ما تعشوا الضيوف
و انتهت المناسبه ودارت الجادل ببخور العود
ومابعد العود قعود
بدأوالضيوف يتناقصون
دقت فلوه على الدحمي عشان يجي ياخذهم
لبسوا عباياتهم بيطلعون
مسكتهم فاطمه والجادل
: وين ماشين ماشفناكم ولا شبعنا منكم
قالت ام فياض تشوفكم العافية
وربي يصلح لتس ماعطاتس
قالت الجادل : خاله ام فياض اقعدوا شوي
والله ما جلست معكم
قالت لميا :جده شوي بس
قالت فلوة تتعذر: والله عبد الرحمن برى ينتظر
قالت جادل : انا اوصلكم
لمعت عيون لميا وتركيه وناسه
وقالت تركيه : جده حنا بنقعد شوي مع الجادل وفاطمة
قالت ام فياض بتعتذر :والله يابنتي كلفه عليتس
قالت الجادل: ابد ماعليتس ياخاله
اصلا انا ابي ونس للطريق
ابي ارجع للمزرعه وبيتكم بالنص
خلي البنات يونسني
قالت ام فياض :خلاص توكلنا على الله
انا وفلوة وفرح بنروح مع عبد الرحمن
وانتن تجن مع الجادل
عبرت لميا عن فرحتها: هييييي عاشت جدتي
بنفلها الليله مع الجادل
ضحكت الجادل : ابد تولمي يا قلبي

. .
بعد ساعه

فتحت الجادل السياره بالريموت
قالت تركيه
: عجييييب ماشاء الله
والله ماتمزحين يالجادل اخر موديل سيارتك
قالت الجادل : الله يسلمتس هذي هدية اخوي لي
لميا طبعا مبهوره بالسياره
وان الجادل بتسوق بهم
قالت بعد ماركبن السياره
وحركت الجادل في طريقها
جادل : تكفين علميني اسوق
قالت الجادل : ابشري
قالت لميا : اخ ليتهم يسمحون لنا نسوق
ردت الجادل : لا والله خلنا كذا احسن
انا ما سوق الا بالبر لاني لحالي ماحولي احد
بس لابغيت مشوار للديره
ما استغني عن جدي او اخوي ابد
يودوني
قالت تركيه : وانا بعد اشوف انه رحمه من الله
إنا مانسوق والله يصير اعتماد الرجل
على المرأة كلي
ويرفع يده من مسؤولية البيت
بحجة انه انتي تسوقين وتكفين وتوفين
قالت لميا :انا عني اتمنى اني اتعلم السواقه
وترى مافي فكه مني يالجادل
بتعلميني ان شاء الله
قالت الجادل :من عيوني شوفي متى تبين وانا حاضره
فجأه صرخت تركيه وهي تأشر على الطريق الترابي
:جربووع
قالت لميا :وينه
رفعت الجادل النور العالي الا جرابيع تتقامز قدامهن
ضحكت الجادل
:زين ماقلتي فار هههههههه
قالت تركيه زمان كنا نطلع للبر مع ابوي
وكنا نشوفها


وصلت الجادل لمزرعة الفياض
وكانت البوابه مفتوحة والانوار مضاءه
قالت : تركية ادخلي مع البوابه
ودخلت الجادل بسيارتها
ووقفت قدام باب الفلة ونزلن البنات
قالت لميا وهي واقفه عند شباك الجادل:
بكرة ان شاء الله اجيكِ
عشان نبدأ دروس السواقه
قالت الجادل: الله يحييتس
قالت تركية :بالله انزلي خلينا نكمل السهره
قالت الجادل :تنزل عندكم العافيه
لازم امشي مره تأخرت
وراي فطور جدي الصبح لازم اقوم بدري
يالله يا بنيات تصبحن على خير
وحركت سيارتها ودارت بالمزرعه
عشان تطلع مع البوابه
وكانت هناك عيون تراقب وهي منذهله من اللي تشوفه

راعية البرقع بسيارتها وقدام عيونه


.
.
.




البارت السابع



.
.
.








يارب مافي مثل تدبيرك

بعد ما يأست اني اعرف منهي ام السيارة
شانت نفسيتي
لايمديني اسأل ولا يمديني اشكي
شايل هواجيسي معي
وافكاري تلعب بي

طيب واذا طلعت متزوجه وام عيال؟!؟
طيب اذا ما لقيتها!؟!

حتى لو لقيتها وش السواة!؟ وعرفت منهي ؟!؟
كيف اتصرف؟!؟

جالس اهوجس لحالي في البيت
تعوذت بالله من الشيطان الرجيم
انا كيف وصلت لذي المرحلة
تلعب بي الافكار بوحده غريبه ماهي من محارمي
الله يستر عليها لله يستر عليها

من كثر التفكير ولوم النفس صدعت

انتظرت امي والبنات يرجعون عشان انام وانا متطمن.
.

دقايق وامي وفلوة وفرح وعبد الرحمن داخلين البيت
قلت :وين البنات تركية ولميا
قالت فلوة : بيلحقونا بعد شوي
عقدت حواجبي
:ومن بيجيبهم بهالليل ؟؟
وناظرت بساعتي الوقت مره متأخر وحنا بالديره
قالت امي وهي تنزل عباتها
:لاتخاف تركتهم بيد امينه ان شاء الله
تركتهم عند طيرة شلوى
قلت :طيرة شلوى !!! منهي ذي؟؟
قالت امي :الجادل
قلت وراها بإستغراب : الجادل وكأني اول مره اسمع بها الاسم
كملت امي كلامها : ايه الجادل بتجيبهن قعدن يساعدنها
قلت : مالتس حق يايمه ليه خليتيهن كان انتظرتوا ورجعتوا كلكم جميع
قالت فلوة: ماهن بمطولات ابد احسب لهن نص ساعه ساعه بالكثير وهن جايات ان شاء الله
تنرفزت وبان بوجهي
قلت : امرنا لله انا كنت انتظركم تجون عشان انا مصدع وابي انام
قال عبد الرحمن : خلاص ارتاح ياخال وانا انتظرهم
قلت وانا اقوم واخذ جكيتي وشالي الصوف
: لا انا بنتظرهن برى وامشي شوي بالمزرعه لين يجون
وطلعت اتمشى بالمزرعه

بعد ساعه الا ربع جالس بالظلام اذكر الله واستغفره
وافكاري مع بناتي اللي تأخرن
ماحبيت ان اكسر بخاطر امي مدري شلون وافقت انهن يقعدن
كنت فاتح البوابه عشان اللي يجيبهن يدخل بسيارته
ومايضطر ينزل البنات عند البوابه
دخلت السيارة اللي ماتوقعتها
ووقفت عند بوابة الفيلا وكشف الكشاف الي فوق الفيلا
بكل وضوح اللي داخل السيارة
كانت المبرقعه ولميا وتركية
بغى قلبي يوقف من المفاجأه مدري من الوناسه
نزلن البنات
وانا عيوني طايرات شلللوووون
منهي ذي وكيف بناتي معها لازم اعرف
مشت بسيارتها وانا عيوني تتبعها الى ان طلعت من المزرعه
ومثل المقروص فزيت واقف
وبسرعة توجهت للبيت ابي اسمع عنها من بناتي
دخلت البيت وناظرت بامي وفلوة وبناتي اللي للان بعبيهن
وعبد الرحمن يقولهن :يا ويلكن من خااااالي مره تأخرتن
قلت عبد الرحمن ووجهي عابس
: قم قم الله يصلحك ورح قفل البوابه وعلى فراشك
قام بسرعه : أبشررر على هالخشم
وراح
وقفت متكتف احاول اكوون ثقيييل
:من اللي جابكم ؟؟
ردت تركيه : الجادل هي اللي جينا معها
قلت :ومنهي الجادل ذي ؟؟
قالت لميا : يبه ذي اخت ابو فراس
وناظرت بالساعه كانت ١٢ قلت
: اذا هي زوجها وعيالها
عادي عندهم انها تتأخر انا ماهو عادي بناتي يتأخرون
الى نص الليل
تبادلن تركية ولميا النظرات
وقالت تركية :يبه ترى تو الناس دايم نتأخر
لبعد ذا الوقت اذا رحنا مناسبات او عزايم
تحرقصت من الفضووول ولا اشبعن فضولي بناتي
قلت بعصبيه : ولووو حنا بديرة صغيره كل شي ينقدون عليه
قامت امي على حيلها : فياض تعوذ من ابليس
وش جاك خلاص البنات وهذاهن عندك وماعاااد بيتأخرن
قلت : اذا غيري مايحاتي زوجته ام عياله انا احاتي بناتي واقلق عليهن
قالت فلوة وهي عاقده حواجبها مستغربه
:انت عن من تتكلم؟
قلت وانا ابعد عيوني عن عيون فلوه لانها راح تكشف
فضولي ولهفتي اني اعرف اذا هي متزوجه او لا
قالت لميا تصحح لي :لاااا يبه الجادل ماهي متزوجه ولا عندها عيال
"اه ياقلبي حسيت نبضي زاد وبديت اتعرق
وحسيت كل العيون علي تنتظر مني ردة فعل
قلت : اخر مره واذا بتتأخرن مره ثانيه انا او عبد الرحمن اللي نرجعكم زين !!
نطت لميا وحبت راسي : زين زين يا قلبي بس ترى بكره ابي اروح للجادل عندها شغل وابيها تعلمني عليه
قلت وانا رايح لغرفتي : يصير خير
لميا تغيرت ملامحها ممتعضه : لايكون بكره ما بيوافق اروح للجادل بكره اهم يوووم من الان الحماس عندي وصل للمليووون
قالت تركيه : الله يكفينا شر شفقتس
قالت ام فياض : وش عندكن تساسرن
قالت تركيه : ابد ياجده الجادل بتعلم لميا السواقه
بعد ما نشبت لها هالخبله
قالت فلووة :حتى انا اجل ابيها تعلمني

قالت ام فياض :لا بالله كدينا خيير
تعلمن منها اشياء تفيدكن
شلون تخبزن وشلون تحلبن والا تطبخن خلها تعلمكن السنع
شهقت فلوة وهي تبتسم : اجل يايمه مانعرف السنع
قالت ام فياض : توكن باول طريقه
الجادل الله يحفظها مدرسه بالسنع والذرابه
يالله اشوف قوميني خليني اصلي قيامي وانتن يالله
كل وحده تسنن قبل لاتنام يالله

*******

ثنين في ذيك الليله ماناموا
لميا من كثر الحماس انها بتتعلم السواقه وعلى يد الجادل

وفياااض من لخبطة المشاعر اللي صارت عنده
فرح على رهبه على فضول شعور ما يقدر يوصفه
شعور مخليه بس مبتسم

شعور خلاه يفتح اليوتيوب
ويسمع قصيدة
الله اكبر كيف يجرحن العيون
كيف مايبرى صويب العين ابد
احسبن الرمش لاسلهم حنون
اثر رمش العين ماياوي لاحد

يسمع ومايشوف الا الجادل وبرقعها
وياليل ما اطولك

**********

صباح الجمعه
من بدري ولمياء صاحيه ومجهزه القهوة والفطور
كل هذا مقدمات تبي تقنع ابوها يوديها للجادل


على الساعه٩
اجتمعوا على القهوة والفطور تحت ظل النخل
جالسين لميا تنظر احد يتكلم عشان تحول السالفه
لروحتها للجادل
وفياض ينتظر احد يسولف عن الجادل بدون ما هو يسأل

كلن ساكت من عنده ام فياض تقهوى وملتزمة التسبيح والصلاة على النبي
وفلوة تقلب بجوالها تقرا رسايل طلال
والدحمي نص نايم لو ما وراه صلاة الجمعه كان كمل نومته
فرح تاكل بسرعه تبي تخلص عشان تلعب مع الارنب
وتركيه مصدعه ولابسه نظارتها الشمسيه وتشرب قهوتها
ناظر فياض بساعته حس مافي وقت بيقوم يتجهز للصلاه
قال :لميا يبه جيبي لي المبخره بغرفتي
وراح
تململت لميا وقالت لتركيه :
شوفي لي حل شلون اقنعه يوديني عند الجادل
قالت تركية بهدوء : عادي قولي له مره ثانيه هو البارح كان معصب شوي الحين شوفيه عادي بيوافق ان شاء الله
قالت لميا : طيب يارب يوافق
وراحت للمطبخ وحطت الجمر بالمبخره
واخذتها لغرفة ابوها دقت الباب ودخلت
كان فياض يقفل كبكات ثوبه
ناولته المبخره
قالت لميا :يبه البارح قلت لك اني ابي اروح للجادل
اساعدها بشغلها وابيها تعلمني
وقف اللي كان يسويه وناظر بالمبخره
وتشاغل بحطت العوده عليها
مارد على لميا
تحرقصت بمكانها :يبه وش قلت
قال :بإيش؟
قالت :توديني والا الدحمي يوديني
ابتسم لها وقال :يعني انتي ضامنه موافقتي
ردت له الابتسامه وبنظرة رجاء : تكفى يبه وافق
لبس شماغه واخذ المبخره وضم شماغه عليها وتبخر
:طيب بعد صلاة العصر اوديكِ
بس ماقلتي لي هذي اللي اسمها الجادل
كم عمرها هي بعمرك او عمر تركيه
قالت لميا : مدري يبه بس انت ليه تسأل!!
لف عنها وتشاغل برش عطره
:كذا سؤال عادي

قالت لميا: مدري والله بس مع الكبار كبيره
ومع الشباب شابه ومع الاطفال طفله
عجيييبه يبه هالجادل
كل شي تعرف له
دق الباب ودخل الدحمي :ها يا خال جاهز
رد :فياض ايه يالله مشينا
واتجهوا للمسجد من بدري يلحقون الصف الاول بصلاةالجمعه

********
اتصلت لميا على الجادل
تذكرها بوعدها انها تعلمها على سواقة السياره
ضحكت الجادل : انا منتظرتس انت تعالي بس


.
.
.
على صلاة العصر كانت لميا في قمة حماسها
وفياض مايقل عنها
اخذ بنته وتوجه معها للمزرعة
وصلوا لبيت الجادل وكان الجد في المزرعه
والجادل ماخذه له القهوة وراجعه للبيت
وسمعت صوت السيارة اللي وراها تمشي متوجهه للبيت
ارخت الغطا على عيونها
وألتفتت وشافت
لميا تلوح لها بيدها من سيارة راعي الفحل
وصلوا البيت بنفس اللحظه نزلت بسرعه لميا
حتى بدون ما تنتظر ابوها يوقف السياره تماما
:الجااادل اناااا جيييت
اضطرت الجادل توقف حست ان انظاره عليها
مع انها ماتشوفه بس هذا احساسها
بهمس ردت على لميا: هلا بتس ياقلبي
نزل من السياره وسأل
الشايب بالمجلس:
ردت الجادل بهمس : جدي بالمزرعه
ردت لميا بصوت عالي : لا يبه بالمزرعه
تركت الجادل وتوجهت لابوها: بتنتظر هنا والا بتروح؟
قال فياض : انتي بتطولين
ردت لميا : مدري
ما اعرف اذا خلصت اتصل عليك
قال : خلاص انا بجلس شوي مع الشايب وارجع للمزرعه
واذا خلصتي دقي علي
وراح
ورجعت لميا لقت الجادل دخلت البيت
اثناء كلامها مع ابوها
دخلت وراها لقت الجادل واقفه وتهف على نفسها
وهي تقول : اليوم دفى واحتريت
قالت لميا :
انا جاهزه متى تعلميني
قالت الجادل : يالله اخذ مفتاحي وسلة القهوة عشان نتقهوى بعد برى

وراحت الجادل ولميا للنفود
وابتدأت رحلة تعليم لميا على يد الجادل
بعد محاولات كثيره كانت لميا تسوق والفرحه ماتسعها
قبل صلاة المغرب نزلن من السيارة وجلسن بروضه وتقهوون
قالت لميا : شكرا شكرا حققتي لي حلمي
قالت الجادل وهي تتبسم : العفو حبيبتي
لمياء: كم مره اطلب ابوي يعلمني والدحمي ويرفضون
ابوي مرره يخاف علينا
تلهت الجادل بفنجالها : الله يخليه لكم
قالت لميا : ابوي قبل وفاة امي كان كل شي يعلمنا اياه
وياخذنا لكل مكان معه
بس من بعد وفاة امي صار حريص مرره ودايم يروح لحاله وتباعد عنا
بس من تالي تغير واحس قربنا منه اكثر
وصرنا نشوفه اكثر
استرسلت لميا باكلام
والله مررره مبسوطه انه اشترى المزرعه ونجي عنده
من اول بس بالبر مع نياقه
سبحان الله قد ما كرهنا تعيين تركيه هنا الا انه كان خيره
قالت الجادل :
وعسى ان تكرهوا شيئا وهو خيرا لكم "
.
.


الجو والمكان والصحبه زيُن المكان بعين لميا
و قامت واخذت كامرتها تصور المكان والسياره والشمس
وقت الغروب والسحب كل شي كان جميل
فجأه وقفت وألتفتت للجادل
وش رايك بكره نكشت كشتتة حريم
جدتي مررره بتنبسط
قالت الجادل : ماعندي مشكله بس ماهو بكره
خليها وقت اجازه عشان تقدر تجي فاطمه
ونصير جماعه
قالت لميا :خلاص الاربعا الجاي اجي من الجامعه
على المزرعه والخميس نطلع و
بقول لابوي إنا معزومين عندتس
عشان مايرفض قالت الجال : تم ان شاء الله


وانتهت رحلة التعليم للسواقه بالتخطيط للكشته
من لميا و الجادل
ورجعوا للمزرعه وعلى الساعه ٨اتصلت لميا على فياض
وجا اخذها

اول ماركبت السياره قال:كان نمتي عندها
طولتي علي
وبعدين الدحمي ينتظر عشان يرجعكم
والا نسيتي ان بكره جامعه
قالت لميا : معليش والله مر الوقت ولا انتبهت
ركز بالطريق وقال : لهالدرجه جلستها حلوه هالجادل
قالت لميا بحماس : يوووه تجنن والله
ابتسم مايدري وش يقول اكيد جلستها حلوه
ناظر بيدها : وش هاللي بيدك
قالت لميا : الجادل مرسله لجدتي مضير
قال فياض : هاتي وحده وذوقيني
ناولته لميا حبة مضير ذاقه بتلذذ
:الله وش هالمضير ماشاء الله
قالت لميا : سواتها ماشاء الله عليها كل شي من يدها لذيذ
فجأه قالت لميا :
ترا الجادل عازمه جدتي الخميس الجاي
قال فياض: ماتعزمني انا بعد
ناظرت فيه لميا بنص عين
وشهههو!!
ضحك فياض على تعابير لميا وهو بقلبه ليته بس تعزمني

وقال :امزح امزح لا تاكليني
وصلو للمزرعه ولقت لميا جدتها تكلم الجادل
ويتفقون على الكشته الحريمي
الخميس الجاي

**********
انهت الجادل مكالمتها مع ام فياض واتصلت على فاطمة
بعد السلام والسؤال عن الصحه
قالت الجادل لفاطمه عندي لتس خبر
قالت فاطمة: قولي
قالت الجادل : تذكرين اللي قلت لتس ذاك اليوم اللي ذبح بعيره
قالت فاطمة اييه ابو شعر طويل ومسبسب وضحكت ههههه
قالت الجادل :ايييه هو عرفت من يكون
قالت فاطمه : ومن يكون ووين شفتيه وشلون عرفتي بسرعه قولي
قالت الجادل : شوي شوي على عمرتس
فاطمه : اخلصي منهو
قالت الجادل :فياض الفياض
شهقت فاطمة وقعدت تكح من المفاجأه
الجادل هههههه : بسم الله وش جاتس اجل لو شفتيه وش بيصير
قالت فاطمه وهي تحط كوب المويه بعد ماشربت
:بسسسرعه قولي شلون عرفتي
قالت الجادل : ابد والله شفته اليوم
وهو ينزل بنته لميا عندنا اول شي عرفت السياره
بغى قلبي يوقف يوم شفتها
ويوم نزل من السياره وشفته
قامت ركبي تصافق
والله ماتذكرت الا يوم يزاعق علي
قالت فاطمة : طيب عرف انه انتي اللي ذاك اليوم
قالت الجادل وهي تحسس خدودها اللي صارت حاره
: لا ان شاء الله انه ماعرفني
يااااوك تخيلي انه عرفني ياااااارب لا ان شاء الله
انا كنت راجعه من المزرعه وهو توه موصل بنته
وكنت مغطيه عيوني وسيارتي بالحوش
لا لا ياشيخه ما اعتقد انه بيعرفني

قطع كلامهم بكاء فراس
قالت الجادل :روحي لحبيب عمته واكلمتس بعدين
قالت فاطمه :يالله يوم زانت السوالف صحصح الشيخ
يالله مع السلامه
وانتهت المكالمه والجادل تهف على نفسها بس من مجرد
فكرة ان فياض يكون عرفها

**********

صباح الخميس الونيس

فاطمة : تركيه اليوم بتكشت بنا الجادل
تركية : لميا وفرح حتى عمتي وجدتي منتظرين هالكشته بفارغ الصبر

فاطمة : قبل شوي دقت علي الجادل
تقول اصرفي الطالبات بدري خليهم يطلعون بدري
وحنا نكشت بعد
اليوم الجو جو كشته وشبة نار
قالت تركية ؛ والله انها صادقه
شوفي الحين الساعه ١١ وماطلعت الشمس

ياحليلها الجادل البارح جدتي كلمتها تقولها وش نجيب معنا
قالت ابد كل شي جاهز بس انتو تعالوا ولا تنسون تدفون
ردت فاطمه :حتى انا تقولي لا تجيبن شي
موعدنا معها الساعه ١
نكون عندها وعلى الساعه ١
تجمعوا في بيت الجادل
نزلهم فياض وقال لامه : يمه متى اجي اخذكم
ردت ام فياض :ندق عليك اذا بغينا نرجع
وكانت سيارة الجادل واقفه قدام البيت
وهي محمله العزبه والحطب واغراض الكشته من فرش
وادوات القهوة والطبخ
قالت الجادل : يالله يالله ياحريم
خالتي ام فياض وفاطمة قدام عندي
وانتن يا بنات بالحوض
تقامزن فرح ولميا ونطن بالحوض وتركيه وفلوة وراهم
ركبت الجادل :هااا ياللي ورا جاهزين
ردت لميا وفرح بحماس:
جااااااااهزييين
وانطلقت الجادل صوب النفود والجميع مرتسمه على ملامحه الابتسامه
ام فياض تتأمل الجادل وهي تسوق : ماشاء الله يالجادل
سواقتس يابنتي راكزه
ضحكت فاطمة وقالت : اليوم راكزه والا دايم تصرقعبنا مع البران
قالت الجادل : ههههه والله هذاك اول يوم الددسن المقربع ادناة مطب تكسرت ظهورنا منه

.
.

ورى بالحوض
لميا وفرح يقولن للجادل اسرعي شوي
نبي المطبات تخضنا خض

قالت فلوة بصوت عالي: لااا تكفين انخضينا لين قلنا آمين

ههههههه زادت السرعه الجادل وشعللت حماس البنات
وصلووا للمكان و ونزلن
ونزلن العزبه وبدأت رحلة البحث عن الحطب الصغير لشبة النار
بعد ما فرشوا فرشتهم وشبن ناررهن
وبدت الجادل وبالتعاون مع الكل بتجهيز الغدا والقهوه والشاهي
مع انها جايبه بالترامس بس مامثل قهوة البر وشاهيه
وعلى جمر السمر والا الغضى
كل مال الجلسه تحلى بالسوالف والحكاوي

قالت ام فياض : عندي لكم لغز من تحله
قالن البنات :هاتي خلينا نسمع
قالت الجده :
انشدك عن.....
قمزت لميا وقالت :بنتن لها عشرين قرن!!!!
والله ياجده اي لغز زي كذا ما اعرف له
رفعت عصاها ام فياض ونغزت به لميا : اصبري يامال الصلاح اسمعي اول وبعدين تحلطمي
قالت لميا وهي تمسح مكان النغزه :طيب طيب ماينمزح معك جده
فلووة : اشش خلي امي تكمل كملي يمه
قالت ام فياض؛:
انشدك عن بيرٍ نزل فيه شخصين
والكل منهم قام حسب المهمه
تواعدوا بالبير على العسر واللين
والكل منهم موعده في متمه
الشخص الاول ضاع
والثاني مالقوا غير دمه
..

سكتت ام فياض:
ها من تحله يالله
قالت الجادل :انا عرفته بس ماني بقايله
قالت ام فياض :اشوه تعالي قولي لي
وقربت من ام فياض وعلمتها بالاجابه
تبسمت ام فياض وقالت :صح عليتس
حاولت فلووة تتسمع
بس ماقدرت قالت :طيب قربي لنا الاجابه
قالت ام فياض :ابد يالله شغلن مخكن
قالت فاطمه وهي تشرب الشاي : طيب هالشخصين فعلا اشخاص والا كذا وكذا
قالت الجادل : مانقوول
ضحكت فاطمه وهي تتوعد الجادل : طيب طيب
واستمرت المحاولات لحل اللغز الى ان جهز الغدا وتعاونوا على غرفه وكانت كبسه معتبره
.
هااااه من تحل اللغز ام فياض تسألكم
.
بعد العصر قامت ام فياض والجادل وفلوة يتمشن ويطلقن رجيلاتهن
وام فياض تسأل الجادل عن كل نبته تلقاها
رن جوال فلووه وكان الدحمي
:يمه ابوي جاي الليله للمزرعه
فلووة وهي توقف وتبعد عن امها بتتكلم براحتها
: وش عنده ابوك
الدحمي : انتي عارفه يمه خلاص وافقي تكفين
تنرفزت فلوة : معليش لو سمحت اسلوب الضغط ما يمشي
معي مره انت ومره امي
حتى جدتك ام طلال ما وقفت رسايل
دحمي : يمه ابوي قايل لي اقولك ان كل طلباتك مجابه
ردت فلوة: كلها كلها

رد بلهفه حس انها ممكن تلين: كلها
ردت فلوة :
قل لابوك يرجع السنين اللي راحت
قل لابوك يلم كسر قلبي
قلة يمحي من ذاكرتي وجع ذيك السنين
اذا قدر ارجع له

سكت مالقى جواب
قالت فلوة بتنهي المكالمة:
يالله مع السلامه انا عند الناس
انهت المكالمه
ولحقت بأمها والجادل
وتعكر مزاجها خلاص
فرح كانت جالسه مع فاطمه وكل تركيزها للصغير فراس
مررره تحبه وفاطمه هي اللي مرتاحه
لقت من يعاونها على ولدها
تركيه تلحفت بفروتها ومددت جنب النار
واخذت لها غفوة بعد الغدوة اللذيذه
بعد صلاة المغرب
اشتد البرد وبدت تهب الرياح
واضطرن انهن يلمن عفشهن وعزبتهن ويرجعن لبيت الجادل

قالت فاطمة : مادام كلنا بالسيارة وصلينا كلن لبيته يالله يالجادل
عطتها الجادل ذيك النظره وفهمت وش تحس به
عرفت انها خايفه تصادف فياض الفياض
وهذا اللي كانت تبيه فاطمه
منها تبي تشوف هالشخص
ومنها تبي تشوف وش بتسوي الجادل لو صادف وكان هناك

قالت ام فياض لا يابنتي تعبناتس اليوم
قالت الجادل : ابد والله ياخاله مامن تعب
ومزرعتكم قريبه
اصلا مسكت الخط لها شوفيها ذيك انوارها

وصلت الجادل للمزرعه
بعد ما ارخت غطى عيونها هي وفاطمه على براقعهن
ودخلت الى ان وصلت للبوابه
ونزلت فاطمه والجده عاونتها الجادل بالنزول
والبنات بعد نزلن من الحوض
قالت ام فياض مافي احد من العيال سياراتهم ماهي فيه
خذن راحتكن
واقلطن خلنا نكمل السهره
قالت الجادل :اسمحي لنا بوصل فاطمه واعود لجدي
قالت ام فياض: مسموحه و الله يونستس يابنتي مرره انبسطنا اليوم
قالت فلووة: احلى كشته في حياتي
واكدن البنات على كلامها
قالت الجادل :والله انا اللي مره انبسطت معكم
وحضنت لميا : يسعد ربي هالبنيه تراه هي اللي اقترحت
وانا بس نفذت
واذا تبون نكشت دايم ماعندي شي ترا
قالت تركيه : الكشته المره الجايه علينا هنا بمزرعتنا ان شاء الله
ردت فاطمة : تم ان شاء الله
قالت الجادل: على خير والحين يالله تمسوا على خير بنمشي
وركبت السياره ومعها فاطمة وولدها
قالت ام فياض : بحفظ الله ياقلبي
ومشت الجادل بسيارتها ودارت بالمزرعه
عشان ترجع للبوابه وتطلع
وفاطمة تناظر بفخامة المزرعه : ماشاء الله والله احيا المزرعه
فياض الفياض ماكنت اتوقع تكون بهذا الجمال
ووصلت سيارة الجادل عند البوابه
لكن قطع عليها دخول سيارة من الجههة المقابلة
وكانت سيارة فياض وكان هو اللي يسوقها
ظربوا فرامل بنفس اللحظه والا كان تصاقعت السيارتين

طارت عيون الجادل وفاطمه من المفاجأه
وهوى قلب الجادل وهي تشوفه قدامها والعين بالعين
نست انها كاشفة غطى عيونها
اما فاطمة بلحظه نزلت غطاها
وبعدها خففت من حضنها لولدها قبل الفرامل عشان ما يضرب بالطبلون

بالجهه المقابله
كان فياض بدنيا ثانيه بدنيا مافيها الا هو وعيون الجادل
بس تدارك نفسه بسرعه
اول شي سواه انه طفى انوار السياره
وبعدين ريوس ورجع على ورى
حتى يترك مجال للجادل وسيارتها انها تقدر تطلع من المزرعه
قالت فاطمة: والله انه خوش رجال طفى اللمبات وريوس يالله امشي وش تستنين ؟؟
قالت الجادل وكأنها صحت من غفوه : هه وش تقولين
قالت فاطمة : اقول امشي الرجال بيدخل مزرعته
حركت الجادل وطلعت بسيارتها وطلعت
وعيون الفياض تتابعها الا ان اختفت بظلام الليل
دخل بسيارته ووقفها وطفى السياره وجلس مبتسم
ياهالليله المبروكه اللي شفتس بها
و ضحك على نفسه
ونزل من السياره وهو يدندن ماهقيت ان البراقع يفتنني
الين شفت ظبى النفود مبرقعاتي



.
.
.

البارت الثامن
.
.
.



سقى الله بالعمر ليلة ...
ظهر في صفوها بدرين ..
قمرها ووجهك الفتان ..
وصرنا والفراق إثنين ...


.
.

ام فياض مسكت فلوة على جنب
انتي وش قلب مزاجك
قالت فلووة : يمه تكفين مصدعه وابي انام
قالت ام فياض: من اللي كلمك اليوم من بعده وانتي مختبصه
قالت فلوووة : الدحمي هو اللي كلمني

قالت ام فياض وهو اللي عكر مزاجك
اكييد قايلن لك عن طلال
ألتفتت فلوة لامها : يعني انتي داريه
انه بيجي الليله
ويجلس مع فياض
قالت ام فياض : ايه بلغني الدحمي
وطلبني اتوسط لابوه
بس انا رفضت عارفتك ماراح تسمعين مني
فلووه : ولا راح اغير رأيي انا وطلال مالنا رجعه لبعض مدري متى بيفهم خلاص خلصنا
قالت ام فياض : بالهون لا يطق لك عرق
قالت فلوة : اعوذ بالله من الشيطان الرجيم
شوفيني حتى اخذت اجازه
ما ابي ارجع مع ولدي صرت اتحاشا اقعد معه

دخل عليهم فياض متبسم
ومزاجه عال العال
: يا حيالله ام فياض نزل شماغه وانسدح
على رجل امه
تبسمت ام فياض وفلوه لا اراديا
:الله يحييك يا قلب ام فياض
قال: متى جيتوا؟
قالت :لنا يمكن ربع ساعه
سأل فياض وهو يتفحص ذراع امه واساورها :ومن جابكم ؟؟
قالت امه : جابتنا الجادل الله يحفظها
كان وده يسترسل بالاسئله بس
قالت فلوة : قابلت طلال؟
قال فياض : ايه قابلته وكلمني
واكيد انتي عارفه وش يبي
قالت فلوة :اي وش قلت له
قال فياض: انتي وش تبيني اقول له
اعتدل جالس
مانتظرها تقول اللي تبيه وقال :
اسمعيني اول وبعدين قولي اللي تبين

طلال متمسك بك وماعمره ارخص
خلاص حني عليه وحني على الدحمي
واللي كان زمان خلاص امر وصار بتقدرين تغيرينه ؟؟
ا بداً
عشان كذا ارجعي له كشخص جديد
ولايفوتكم العمر

سكت شوي وكمل : انا ادري انتي بعد مثل طلال تحبينه ويحبك ليش تطويلنها
استخيري وعلميني وش يصير معك

وانا معك باي قرار
*******

طلال مستبشر خير من مقابلته لفياض

صحيح ماوعده بشي لكن حس بلين من موقفه هالمره
حس إن فياض هالمره غير ومتحمس لرجعته لفلوة

.
.
.

بعد اسبوع

اتصل فياض على طلال وقاله تعالي للمزرعه


طلال " وانا ما صدقت على طول رحت له وهناك استقبلني وملامح وجهه عاديه ما استشفيت منه ليش مناديني
حتى عبد الرحمن يوم اتصلت عليه
كان ماعنده خبر وبالجامعه

جلس معي شوي واستأذن مني
وغاب عني لحظات ورجع ومعه
قلبي اللي من سنين ماهو معي
دخل علي وفلوه معه ولحقتهم ام فياض
دخلت علي فلووه وتفاجأت فيني وحاولت تطلع وتهرب من المكان
قالت بهمس : فياض ليه كذا
لكن فياض وقف لها
: هذا الرجال يبي يرجعك وانا
اضمنه لك خلاص
مضى عمركم وانتو متفرقين
اللي راح اياَ كان هو والا امه والا انتي ضيعتوه
بس الباقي من عمرك ان كان ما رجعتوا لبعض
انتي اللي بتضيعينه
ويكفي على عبد الرحمن ضايع بينكم خلاص

انا ابي جواب الان
بترجعين لطلال والا لا
نبي ننهي هذا الموضوع الان

وقفت ساكته ومنزله راسها
وانا استرق النظر لها وودي لو تعطيني نظره
بس تروي عطش قلبي المهجور
وطال سكوتها
لين قالت ام فياض :خلاص يا ولدي السكوت علامة الرضا
قال فياض : لا ابي اسمعها منها
ها يا فلوة موافقه ترجعين لطلال

ضحكت ام فياض : هههه قلت لكم السكوت علامة الرضا مبروك ياطلال واخيرا

استقام طلال واقف وحضن ام فياض:
الله يبارك بك ياعمه واخيرا اي والله
وتنفس براحه وبعدها حضن فياض
: والله ما اطلع من جزاك يا فياض
قال فياض : الان الاتفاق بينك وبين فلوة وتعرف وش طلباتها وتنفذها لها وريحوا قلب الدحمي الضعيف اللي متشتت بينكم
قال طلال بإبتسامه عريضة: ان شاء الله

وتم الاتفاق ان تكون رجعة فلوة لطلال بعد اسبوع يكون طلال نفذ شروط فلوة اللي هي بيت مستقل لها وان امه ما تتدخل بينهم ابدا

**********

بيت ابو فراس

وفي جلسة ود بين فاطمة والجادل
قالت الجادل لفاطمة
: الا وش اخبار تركيه وجدتها ام فياض
قالت فاطمه وهي تغمز للجادل
: وش اخبار تركيه هااا وام فياض ؟؟؟ اجل قولي وش اخبار الزين
قالت الجادل :وش زينه ما انتي صاحيه والله وانا صادقه وش اخبارهم اخر شي يوم كشتنا وبعدين مالهم حس بالعاده لميا تتصل والا ام فياض بس مرره مالهم حس
قالت فاطمه : عادي كل يوم تداوم تركيه ومافي شي ولا قالت شي بس انتي اللي مشغلن قلبتس شي ثاني
زعلت الجادل وبان في ملامحها
: فطوم والله ان عدتي هالكلام ماعاد ادخل بيتس احشميني ياختس
قالت فاطمه وهي تحب راس الجادل :اسفه والله بس والله اني اتمناه لتس الله يجعله من نصيبتس
اخذت عباتها الجادل:
خلاص مع السلامه دام هذي علومتس
وقفت فاطمه بوجهها: لا خلاص توبه والله ماعودها اجلسي تكفين
وجلست الجادل وقالت : ايه هالحين اجلس يله صبي لي فنحال قهوه
وصبت لها فاطمة وناولتها الفنجال
قالت الجادل: عطيني تمره
وناولتها فاطمه الصحن
قالت الجادل : لا ابيتس انتي تعطيني
قالت فاطمه بعد ما رفعت حاجبها : ما كأنتس زودتيها
وتبسمت الجادل وفكنها ضحك الثنتين
ما يستغنن عن بعض خوات وتوأم روح
رن جوال الجادل وكانت المتصلة ام فياض
ورفعت الجوال توري فاطمة من المتصل
قالت فاطمة :سبحان الله الطيب عند ذكره ردي عليها
فتحت الخط الجادل : هلا والله
ردت ام فياض :هلابتس يابنتي
السلام وعليكم السلام ورحمة الله وبركاته
ردت الجادل : وعليكم السلام ورحمة الله وبركاته ياهلا وغلا والله
قالت ام فياض: وينتس يابنتي ماعاد شفناتس ولا اتصلتي ولاحس ولا خبر
قالت الجادل :والله حتى افتقدتكم بس قلت يمكن مشغولين وتو سبحان الله اسأل فاطمه عنكم
قالت ام فياض :والله يابنتي من عقبكم وحنا مشغلتنا فلوة زوجها بيرجعها وهي تعبتنا شوي بس ابشررتس بترجع لابو ولدها
والبنات بيحتفلن بعمتهن ونبيتس معنا بالحفلة انتي وام فراس
قالت الجادل: ماشاء الله مبروك والله يتمم على خير ابشري نجي ان شاء الله متى ؟؟
قالت ام فياض : ان شاء الله يوم الخميس ابد ليلة ١٤
وانتهت المكالمة

*************
ليلة ١٤

ومن قبلها بيوم كانت التجهيزات
من البنات للحفلة في مزرعة فياض الفياض
قررن البنات تكون حفلة شوي بالمزرعه
والجلسه تكون برى نوع من الكشته تحت النخل
وجهزن جلسه بطاولات ارضية
وحولها خداديات كبار وثيرة للجلوس
بألوان زاهيه متناسقة مع مفارش الطاولات
وفوق هذا كله مظله مدعومة باعمده
تتخللها الاضاءه الصغيرة اللي اعطت للجلسه
جو حالم ورومنسي
كانت تركية هي المنسق وتقريبا المنفذ
اما لميا فكانت الضيافه عليها ماخلت حلى ولا موالح من الانستقرام ماطلبته
كل هذا وكان بدعم مالي من فياض
فرحان بأخته وبفرحة بناته بعمتهم
واكتشف ان امه عازمه الجادل ومرة اخوها ام فراس
فكان يقول حطوا احسن شي
انبسطوا ولايقصركم شي
كانت التجهيزات من افخم شي واغلاه احتفالا بفلوة وعلى شرف الجادل
*********
يوم الخميس

عند الجادل وفاطمة وفي بيت فاطمة
كانت الجادل من بدري عند فاطمه
كانت لابسه عادي وبسيط
ولا تكلفت ابدا لا في لبس ولا مكياج او شعر
على عكس فاطمة اللي كانت متأنقه على الاخر
بفستان انيق ومستشوره شعرها
اول ما شافتها فاطمه بلبسها شهقت
وقالت: عسى بتروحين بهذا اللبس ؟؟
ناظرت الجادل بلبسها وقالت: ليه وش فيه
قالت فاطمه :الناس مسوين حفله بزواج بنتهم
يعني عرس مصغر
قالت الجادل : اصلاً ماني منزله عباتي
قالت فاطمة : لا والله بتنزلينها وبتغيرين هاللبس
وبتغيرن هالطرحه والبرقع
تمسكت الجادل ببرقعها : والله ما اغيره خيير !!!
عسى تبيني اشيله بعد
قالت فاطمه: ادري مانتي شايلته بس ألبسي برقع المناسبات تعالي تعالي سلميني نفستس
وبعد جهد جهيد وكر وفر بينهن
كانت الجادل واقفه قدام المراية تتأمل نفسها
بفستان اسود قطيفه وبانت فيه رشاقة قدها وطولها وبياض بشرتها وشعرها الطويل ينسدل بنعومه وكثافه على ظهرها
مع صندل ناعم بكعب متوسط الطول ويغطي شعرها طرحة خفيفه من الحرير المطرز بنعومه
وبرقع خفيف قصير بعيون واسعه وزينت جيدها بسلسله ذهب ناعمه
قالت الجادل معترضه: لا ما اعجبني مو حلو البرقع يكشف نص وجهي
ردت فاطمه بعصبيه وهي تبخر شعر الجادل وتعطرها و :والله ماتغيرين شي يالله تأخرنا على الناس
بسرعه ابو فراس بينزلنا عند الناس وبيروح لجده
كحت الجادل من العطر :خنقتيني بالعطر
قالت فاطمه لاتخافين هالحين يبرد هذا وانا مختاره عطر خفيف
"واحلى خليط عطر وبخور تخيلوا الريحه بس "
وسحبتها معها وقفلت غرفتها
ولبسن عبيهن وطلعن متوجهات للحفله
استقبلتهن ام فياض وفلوة والبنات
كانت فلوه بفستان سكري ضيق بجكيت قصير مشكوك باللولو ومكياج خفيف وشعرها ملموم بنعومه على جنب
تركيه كانت بفستان ناعم اصفر وفوقه صدريه من الفرو الابيض اما لميا فكانت لابسه جاكيت قصير جلد اسود وتنورة شانيل
كارهات احمر واسود وجزمه طويله سودا
وفروحه فستان وجكيت وردي
طبعا الجادل ما جت ويدها فاضيه
صحن كبير من ورق العنب ومثله صحن فطاير
قالت ام فياض وراتس كلفتي على عمرتس
قالت الجادل :ادري البنات حبوا ورق العنب اخر مره قلت اجيب لهم
نطت لميا وخطفت الصحون هذي كلها لي احب شغلك
وبعد ما جلسوا تحت المظله وعلى الوسايد
قالت ام فياض : خذو راحتكم يا بنات مافي البيت احد عيالي برى
نزلت فاطمه عباتها واخذتها منها تركيه
ووقفت عند الجادل تنتظرها تنزل عباتها
انحرجت وترددت كثير تنزل عباتها
بس فاطمه ماعطتها فرصة
جادل نزلي عباتس تركيه تنتظرتس
وبكل حرج نزلت عباتها
وبان القد المياس والشعر الحرير
ماقدرت ام فياض تسكت
وماتعبر عن اعجابها بالزين اللي تشوفه
:ماشاء الله ماشاء الله تبارك الله
استحت الجادل وتمنت تنشق الارض وتبلعها
ماعمرها مرت بهذا الموقف
طول عمرها متكومه على نفسها
ولاعمرها سمعت كلمة مدح لا على شكلها ولا على شعرها
قالت فلوة : ماشاء الله يالجادل مخفيه هالزين عنا الله يبارك لك
اما لميا وقفت تتأمل فالجادل وعطتها تصفيره اعجاب
قالت ام فياض تنهرها: بنت اذكري الله
تركيه وهي تضحك على لميا : تستاهل الجادل لنا كم نعرفك اول مره نشوف ذا الزين ماشاء الله
قالت فاطمة :بس الحين بيغمى على الجادل خلووها
هههههههه ورفعت لهم فراس لابس بربتوز على شكل دبدوب
قالت :شوفو فروسي هنا الزين كله
في محاوله منها لصرف الانظار عن الجادل
عشان تاخذ نفس وتهدا لانها اكيد ودها تختفي اعرفها
وفعلا انصرفوا بالكلام لفراس
وتغير الكلام والحوار ودارت القهوة والضيافه
وشوي شوي بدت الجادل تهدا وترجع للجو
مع ام فياض وبناتها
وكل ما بغت تمسك تقهوي او تساعد
قالت ام فياض :والله ماتمسكين شي
والشوي البنات بيمسكنه انتي اليوم ضيفة الشرف
وابتدن البنات بالشوي وتجهيز طاولة الطعام
اللي كان على جانب جلستهم وكانت مليانه
بما لذ وطاب من مقبلات وسلطات وحافظات الشوي
وانواع المشروبات
كانت الاجواء العليله والنسمه البارده والغيوم الخفيفه
واخر ضوء النهار معطي للمكان والجلسه جمال
وانتهى الغدا وبعده الشاهي
على المغرب ابتدا الجو يزيد بروده
وكلن متدفي
الا الجادل كان لبسها يعتبر خفيف في مثل هالاجواء
وتكتفت تدور الدفى
وحست عليها تركيه : بردتي صح
قالت الجادل : شوي عطيني عباتي عشان تمسك قلبي
قالت تركيه: طيب
وراحت وجابت شالها الكشميري المفضل اللي كان هدية من ابوها
جابته وحطته على اكتاف الجادل
:خذي ياقلبي هذا بيمسك قلبك صدق دفاه حنون
قالت الجادل وهي تضم الشال عليها تدور الدفى : مشكورة ياقلبي
فلوة يوم سمعت اذان المغرب
قالت : خلونا ندخل نصلي داخل بالصاله
قالت لميا لا ما ابي الليله قمرا وابي اشوفها
قالت فلوة :تعالي للصاله واجهتها قزاز بتشوفينه لاتخافين ذبحنا البرد
وقامت فاطمه وفرح تعاونها على اغراض فراس
والجادل اول مادخلت عرفت انها كانت متجمده
راحت وجلست بحنب الدفايه
صلو المغرب وجابت لميا شاهي الزنجبيل
وكان لذيذ ولذته في دفاه
بعد ما تدفوا وسكنت عظامهم من بعد البرد
قالت فلوة وهي تتأمل القمر المطل عليهم من فوق جذوع النخل بمنظر مهيب وتتخلله الغيوم الصغير
يظهر مره ويغيب مرات
قالت :سبحان الله مأجمله
استغرب كيف الغرب ربطوا اكتمال القمر
بظهور مصاصين الدماء
قالت فاطمه : افكارهم دايم سخيفه
ويمكن يكون حصل اصل للحكايه لكن السينما الامريكيه تحب تملح وتبهر هالسوالف
قالت تركيه : ايوووه مصاصين دماء وقمرا ونخل وظلام
قالت لميا : وكلاب تعوي وجنون تطاير
خافت فرح ولاحظتها الجادل
وقامت وقفت على واجهت الصاله وتطل على المزرعه
واشرت بيدها هالمزرعه
صحيح ماعشت فيها بس كنت وانا صغيره احب ألعب هنا وهناك واشرت على زاوية مظلمة فيها اطلال البيت الطين
احلى مكان هالمكان
قالت لميا : يعني دايم كنت تجين هنا
قالت الجادل :اي دايم وكنت اتخيل حياتي شلون بتكون
لو اني عشتها هنا بين امي وابي الله يغفر لهم

قالت لميا وماتخافين؟؟
ردت الجادل وهي تناظر بعيون فرح
:لا وش يخوفني مافي شي يخوف
قالت لميا :يا بطله انتي بالله ماتخافين حتى بمزرعتكم وانتو ماحولكم الا النفود
ضحكت الجادل : ابد مافيه الاالعافيه
قالت لميا : ابي اتحداس واشوف تخافين والا زي ماقلتي شجاعه
ردت الجادل : تحدي
قالت لميا وهي تأشر على جهه بالمزرعه مظلمه
: شفتي هذيك الزاويه فيها بوابه تطل على النفود فوق البوابه كشاف اذا فعلا ماتخافين تروحين وتفتحينه وترجعين
قالت ام فياض تنهر لميا :بنت وش تقولين
قالت الجادل : خليها ياخالتي وناظرت بلميا بس على شرط انا اقبل هالتحدي وانتي بعد لتس عندي تحدي
قالت لميا :تم
صفقت فاطمه وفلوة بحماس
وتركيه قامت على حيلها تشوف
وطلعت الجادل وهي تلف الشال عليها
تتقي فيه برد الليل ولحقنها البنات ووقفن على الدرج
اللي يطل على المزرعه
وسمت بالله وانطلقت متوجهه لناحيه البوابه
وماعندها من الشيطان طاري
قلبها قوي بالله
رفعت برقعها لانه قصير ضايقها ماهو مثل برقعها اللي دايم متعوده عليه
وانزلقت طرحتها الحرير ونزلت على كتوفها
توغلت بالمزرعه كل ما مشت
كل ما زاد الظلام ومع الاشجار والنخل
غابت عن انظار المراقبين
كان باقي لها مسافه قليله وتوصل للبوابه
وسمعت صوت الباب يتحرك وتهزه الريح
هدت من سرعة خطواتها تبي تسمع زين
وماسمعت شي وكملت مشي ناصيه البوابه
وفجأه وقفت سمعت خطوات وراها
سمت بقلبها وبدت تتسارع نبضاتها
وارخت سمعها وركزت وسمعت صوت تكسر اغصان تحت خطوات احد يمشي
وتأكدت ان فيه احد حولها
ومافكرت ابدا رجعت لورى وراحت تركض الخوف معميها
وفجأه صدمت بجدار صلب
ودخلت فيه احتواها هالشي بدفاه وريحته العذبه وهو يقول بسم الله على قلبك هدي هدي ماعليك الا العافيه
بغى يزيغ عقلها من الخوف
ماتدري هو جن والا انس
اختفى صوتها تبي تصرخ وتستجد
ما فيه صوت غير انها محبوسه
ميته رعب من اللي قاعد يصير
محاوطها بقوة بإيدينه الثنتين
وهي تحاول تتفلت منه بعد ماخانها صوتها

حست انه مربطها ومقيدها بايدينه وهي ترافس
لين هو مسك دقنها بخفه ورفع وجهها له وهو يقول
: بسم الله عليك ياقلبي
وجت عينها بعينه
اول ما شافها فلتها من يده
وهي دفته من صدره
وابعدت عنه وراحت بكل خزي ورعب تركض مخنوقه ببكائها ومعميتها دموعها
********

الليله كانت بارده جدا
وفياض حس بالارهاق
وحب انه يرجع لبيته بدري
بس استحى من امه وضيوفها
انه يقطع عليهم وناستهم
عشان كذا فكر يرجع ويدخل من البوابه الثانيه البعيده
وبهدوء يدخل غرفته
دخل وكان متلثم ومتدثر بفروته عن برد هالليله الزمهرير
وهو يمشي شاف زول قريب متوجه للبوابه
تبسم عرف منهي وبقلبه يقول هالخبلة متى بتعقل
تختلهاوصار قريب منها
بس هي حست فيه وانرعبت وانطلقت تركض من الخووف
تلقاها هو بذراعينه المفتوحه وهي بكل قوه اصطدمت بصدره
ولفها معه بالفروة وضم عليها ايدينه
وقعد يسمي عليها ويهديها وهي تحاول تهرب منه بس ما فكها خايف عليها
ولماهدت انكمشت على نفسها رفع وجهها بيده وقال : بسم الله عليك يا قلبي انصدم من المنظر ماهو وجه لميا ولا وجه تركيه
بعد خطوة عنها وقعد يتأمل الوجه الملائكي
ونور القمر عاكس ضوه على شعرها المتناثر على وجهها بغرتها الطويله
و شامتها اللي فوق خدها وعيونها المذعوره
تلمست الجادل طرحتها تدورها على راسها ما لقتها ولا برقعها
و صدت عنه بسرعه وهربت متجهه للبيت
فياض كان بحالة ذهول مازال يتبعها بالنظر مثل كل مره يشوفها فيها يوم اختفت عنه لم الفروة على وجهه
وقال :سبحان من خلق وصور
لازال واقف ومبهور عرفها من عيونها
بس رجع يسأل نفسه وش اللي مطلعها بهذا البرد؟؟!!
وليه جايه هنا لحالها ؟!؟
وليه هالخوف كله ؟!؟
كل التساؤلات الي براسه والمشاعر المتضاربه داخله
تضاءلت عند شعوره بالسعاده الكبيره إنه شافها
وهالمره غير شافها بدون حاجز
شاف الوجه اللي كأنه بدر مصورر ,,
بس شعور ثاني غلب عليه وهوو شعوره بالذنب بأنه لمس وحده غريبه عنه ماهو بمحرم لها
قام يدور لنفسه الاعذار ويقول ما قصدت هالشي هي اللي جت بحضني
مشى بهدوء ودخل الفله من باب المطبخ وبخفيه تسلل الى غرفته
كانت الاصوات مرتفعه وصوت امه هو اللي طاغي عليها وهي تهاوش لميا
زين للي سويتيه بالبنيه الا تحدينها تقطع المزرعه لاخرها انتي خبله من يطاوعتس بس ؟؟
هذا هي رجعت ورجلها ملتويه ولولاالله ستر زين ما انكسرت
لميا وهي تدخل المطبخ وتاخذ ثلج من الفريزر: والله ياجده لو ادري انها بتتعور وتنصاب
ما تحديتها المسكينه منهاره من البكا
من كثر الوجع
قالت الجده: اخلصي بسرعه ودي الثلج
تحطه على رجلها قبل تنتفخ وتورم
تلقتها تركيه بسرعه واخذت الثلج ولفته بفوطه صغيره ووحطته على رجل الجادل
اللي من خوفها وخزيها من اللي صار صارت تركض ودموعها معميتها وهي تحاول تدور برقعها عشان تلبسه والحمدلله لقته محشور بين فستانها والشال الكشميري
فجأه تعثرت بغصن بالارض وألتوت رجلها وخبطت
بكل قوتها على الارض وامتلت يدها خدوش وتغبر فستانها
وانحاس شعرها
انهارت هنا من الصياح والبكاء
تجمعت عليها المشاعر السلبيه ألم وفشيله ورعب وخوف من انه بيلحقها ويشوفها مرميه كأنها تنتظره
تحاملت على وجعها وقامت تعرج
وهي تنفض شعرها وفستانها
وبس وصلت لبقعة الاضواء وشافنها البنات بهذا المنظر
ركضت لها فاطمة وتركيه ولميا
قالت فاطمة بخوف على الجادل : ووش فيه وش صار معتس
قالت الجادل وهي تحاول تسيطر على صوتها : ألتوت رجلي وتعورت قبل أوصل البوابه
تساندت على تركيه ولميا
وبشويش وصلنها الى داخل الفيلاا
وصلن وام فياض تقول بلهفه وخوف على الجادل : بسم الله عليتس يا بنتي بسم الله عليس
هاتنها هنا جنب الدفايه
قالت فلووة: بسم الله عليك وش اللي جاك خلاك تطيحين
ردت الجادل بصوت مهزوز : تعثرت بغصن بالارض ما شفته
قامت فلوة وقالت: معي شنطةللاسعافات
الاوليه بغرفتي بجيبها هالحين
وانتي يالميا روحي جيبي ثلج بسرعه
كدمات الرجل لازم كماده بارده
قالت الجادل لفاطمه بهمس :دقي على ابو فراس خليه يجي ما اقدر اقعد تعبانه
مسكت جوالها فاطمه واخذت زاويه تكلم زوجها
وبعد عشر دقايق كان ابو فراس برى
تحاملت على نفسها الجادل ومشت الى ان وصلت للسياره
ومن السياره الى بيت جدها وحلفت على فاطمه انها ترجع لبيتها وزوجها
ما تبي احد عندها دخلت غرفتها و
صكت البا ب و تركت المجال لدموعها تنزل
احساسها بالفشيله والخزي يتعاظم
وقعدت تلوم نفسها انا غبيه
انا اللي في كل مره اطلع له
الحين وش يفكر فيني
اخ لويدري جدي والله ان يطب ساكت


******

ام فياض بعدهالليله الطويله شالت هم الجادل اللي راحت وهي تعذر منها الليله انتهت
بغير ما كنت اتمنى
وتتأسف لفلوة انها خربت عليها الحفله
وجع هالبنيه وجع لي قلبي رحمتها

وناظرت بالساعه باقي ساعه على الفجر
وفياض مارجع قلقت على ولدها
مرت غرفته وفتحت الباب ولقت الابجورة اللي جنبه مفتوحه ونايم وملتحف فروته

يا عزي عنك يا ولدي نمت بالفروة هذا تعب والا برد
قفلت الباب بهدوء وتوجهت لغرفتها تتسنن وتنتظر صلاة الفجر
******







.
.

البارت التاسع

.
.
.

بين المفارق والسهر واشــهب اللال
روحي مـــواعيــــد اللقــا مــاروتها

عذب المشاعر كل يومـــن لها حــال
وان مرت ابها الفــاتنــه عطـــــرتها

الجادل اللي حسنــها ماله امثــــــال
تعشب خطاويها الدروب ان مشتها

جتني تخطى زولها يشــــــرح البال
ياحيها مع كل خطــــوه خطــتــــها

يوم أقبلت غنا لها القلــب مـــــــوال
فاعت لها خضرالجروح وســـرتها

في خدها الأيسر زهت حبة الخـــال
وفي عيـنــها ســــوالفن ما حكتها

لاسلهمت بعيونها كحلهــــا ســــال
والى ارمشت ورد الخدود جرحتها

تزهى الجواهر بين أساور وخلخال
وذابتـــــ ســـلاسيل الذهب برقبتها

فيها من اوصاف الحلا ألوان وأشكال
حتى الــــــدروب اليا مشت زينتها

فلت شعــــرها واقبل الحسن يختال
عنقاً جـــــدايلها الهبـــــوب انثرتها

ليلٍ عتيم وقلت ابســــريه لو طال
شعرن طبيعي قصـــته ما المستها

الى جلست غطى جسدها تقل شال
والى وقفــــــــــت قام يتثنى تحتها



.
.

لذة الدفى فاقت لذة النوم
شعور بين النعاس والحلم والصحيان
شعور بالسعادة بالابتسامة
فتح عيونه بكسل مع ابتسامه من القلب
ضم الفروة لحضنه اكثر
واتسعت الابتسامه اكثر مع ريحة الفروة ابعدها لثواني عن وجهه وسؤال لمع بذهنه
هي فعلا فيها ريحتها والا يتهيأ لي !؟!
رجع يتنشق الريحة العذبه
وانقلبت ابتسامته لضحكة
اعتدل جالس بسريره
وقال : ياولد صدق اللي حصل
ناظر بالساعه باقي دقايق على اذان الفجر
قام بسرعه من السرير وتوضأ
وراح يصلي مع الرعيان
ورجع بعد الاشراق بعد ما تفقد نياقه
دخل البيت لقى امه جالسه على سجادتها وفلوة تنزل صينية القهوة
: السلام عليكم ونزل يسلم على راس امه
ردت امه وفلوة السلام
جلس متلثم وفروته عليه
ويفرك ايدينه
:برررد
صبت فلوة لاخوها قهوة وناولته فنجاله
قالت ام فياض: متى جيت البارح ماشفتك يوم دخلت؟؟
قال فياض: جيت من بدري ودخلت من باب المطبخ
خفت اضايق ضيوفكم
قالت :الله يصلحك كان علمتني
طول ليلي قلقانه عليك
الى ان دخلت عليك بنص الليل ولقيتك نايم
قالت فلوة وهي تناول امها فنجالها
: يمه من وجهك باين انك مانمتي
قالت ام فياض :اي بالله ماذاقت عيوني النوم
قلقت على اخوتس وعلى الضعيفه اللي راحت البارح وهي تتوجع
قال فياض : من تقصدين ؟؟
قالت امه : الجادل البارح تعورت رجلها
فياض عقد حواجبه لقى نفسه يسأل عنها
ليه وش صار
قالت فلوة : مسكينه تعثرت وانلوت رجلها
وبقلب فياض:
" يالله اكيد يوم راحت تركض من عندي
رجع يسأل فلوة :
: عسى ماهو كايد وجعها
قالت فلوة : لا ان شاء الله انها طيبه
قلق عليها ومايدري كيف يطمن قلبه

قالت بعد لحظة هدوء : يمه قومي نامي لازم ترتاحين
العصر بنروح وابيك معي
اذا ما ارتحتي بنروح بكره
قالت ام فياض :لا بقوووم وانتي بعد نامي

قال فياض : كلنا ان شاء الله رايحين العصر
بنزفك عروس واخيرا
تبسمت وقالت : عقبال ما نزفك عريس يافياض
قال بضحكة : ههههه آمييين
قالت ام فياض وهي تقوم متجهه لغرفتها
: هه صدقتك وانت تأمن

*******

اخذت الكريم الطبي وبذهن غايب
دهنت رجلها اللي ظهرت فيها كدمة بنفسجيه
ألم الفشيله والخزي غطى على ألم رجلها
وماتحس فيه الا اذا مشت
غطت وجهها بيدينها تبي تختفي
المشهد يتكرر
بين ايدينه وبوسط حضنه ونظراته وصوته
ودفاه وريحته
عضت على شفايفها تمنع عبره تكومت
بحلقها وشهقت بكا
"يارب والله ما ادري وين اودي وجهي
نزلت دموعها حرى
مافي شي ممكن يزيل شعورها المر

**********

بعد صلاة المغرب
ليله من ليالي العمر

كان طلال كاشخ ومضبط العوارض وبغى
يتهور ويصبغ بعد
بس قعد له عبد الرحمن
: يبه كذا احلى معطيك وسامه
اخذ البشت الاسود ولبسه ابوه
:ماشاء الله يبه رزه ياحظ امي فيك
قال طلال: عقبال ما اشوفك عريس وألبسك البشت بيدي
حب عبد الرحمن كتف ابوه
وقال : ان شاء الله
والحين يالله ما نبي نتأخر على العروس
وتوجهوا لبيت فياض الفياض

********
في بيت فياض الفياض واخوانه
كان الكل فرحان لرجعة فلوة لزوجها واخيرا عقب كل هذي السنين

تركية تحط اللمسات الاخيره لمكياج عمتها
ورجعت لورا تشوف ناقص شي
قالت : تمام كذا ماشاء الله احلى عروس
قالت لمياء: عمه وصل العريس
اذاني الدحمي اتصالات يقول لا تأخرون امي
قالت فلوة بتأثر : حبيبي دحمي
تركية: عمه دقيقه بس لازم تصورين حرام هالزين ما توثقينه بصوره
لميييياء تعالي خذي صورة لاحلى عروس
: قالت لميا : للاسف ما اقدر اصور مهددني
دحمي اني اصور يبي هو اللي يصور امه وابوه

بس على مين ههههه ووقفت قدام عمتها
وقالت عمه قولي : جببببنننه
ضحكت فلوة وتركيه على خبال لميا
قالت تركية : خذي لي صوره مع عمتي
جت وقفت بالنص بين عمتها وتركيه
ورفعت جوالها وقالت :يالله سيلفي سريع لاني سامعه صوت الدب دحمي

دخلت فرح مثل الاعصار :وانا انا بعد ابي اصور مع عمه
واخذوا صور جماعيه وبكل الحالات

وانتهت جلسة التصوير السريعه بدخول
فياض وعبد الرحمن
: جلس فياض مقابل اخته
: ألف مبروك يا حبيبة اخوها
تبسمت فلوة : الله يبارك بك يافياض
وياارب افرح فيك عريس
سكت فياض
وردت لميا وهي معترضه : لا ان شاء الله .....عممممه !!!
وعطت عمتها نظرة إعتراض
قال عبد الرحمن : يالله يمه ابوي تحت استوى من الانتظار
قالت تركيه : دقايق واخذت صوره لابوها وعمتها وعبد الرحمن
وناظرت بالصورة : وه عساني ما خلى من وجيهكم

ضحك عبدالرحمن وقال: مع اني قلت بس انا اللي اصور
يشفع لكم اني نسيت كاميرتي تحت

قال فياض: يالله ياعروسه العريس بالانتظار

.
.
.
فتح عبد الرحمن الباب الكبير للمجلس الفخم واخذ جانب وبزغروطه مضحكه
: كللللللووويش مبروك يا عرايس
خشي برجلك اليمين
ياعروسه

ضحكت ام فياض اللي كانت جالسه مع طلال
واخوان فياض
: زينك يا الدحمي
وزين فرحتك ربي لا ينكد علينا
طلال واقف وقلبه ينتفض بصدره
وابتسامه عريضة تزيد مع قرب خطوات فلوة نحوه
وباقي خطوات وتوصل له ماقدر يوقف ساكن
اقترب بنفسه وتناول يدها من يد عبد الرحمن
وبدون شعور
رفع كفها وباسه بخفه
وهمس : واخيرا رجعتي لي


تبسمت فلوة بخجل لانها بين امها واخوانها وقدام ولدها
يدها بيده ويقودها لصدر المجلس
وقفت بفستانها الفخم المنسدل على جسمها
بأناقه وجمال تتقبل تهاني اخوانها وسلامهم
وطلال واقف يتأملها
وعقله ونبضات قلبه تقول
"ماينشبع والله من شوفتك يا فلوة قلبي
قرب منه فياض وهمس له
: اثقل ياخوك عيونك فضحتك
تبسم طلال ورد على فياض : عطشان شوفتها ومارويت خلني اخذ اختك وامشي
قال فياض: ابد مافيه بنسهر وبنلعبك بلوت

قال طلال : لاااا ان شاء الله ربع ساعه
وبعدها ما اعرفكم ولا تعرفوني

ضحك وقال فياض : الله يسهل لكم
وناظر بفلوة : فلووة عسى شنطتك مقفله وجاهزه
قالت فلوة : اي اخذها الدحمي
قالت ام فياض وهي تقوم
: يالله قوموا خلاص روحوا لبيتكم بحفظ الله
قالت فلوة : يمه هذي طرده
قالت ام فياض : حاشا لله بس خلاص الحين
ما اشوفك الا زياره
وانتبهي لطلال وانت يا ولدي امنتك فلوة
والله الله فيها
ولا اوصيكم ببعض عوضوا السنين اللي راحت وعوضوا الدحمي
قال عبد اارحمن : سامعين عوضوني وانتبهوا لي ودلعوني
قال طلال : ابشري ياعمه ويبشر الدحمي
قال فياض : يالله خلاص خذ مرتك وبيتك بيتك واياني واياكم اشوفكم الا زياره سامعين

.
.
.
في سيارة طلال واللي يسوقها ولده عبد الرحمن
كان طلال وفلوة جالسين جنب بعض
ماسك اطراف اصابع فلوة
ويكلم عبد الرحمن
:ماودك تخاوينا
ترى حجزت بعد يومين ان شاء الله
قال عبد الرحمن : شهر عسل وتاخذون عسل معكم اخاف يجيكم سكري
ههههههه تخاويكم العافيه
وراي مذاكره والاختبارات على الابواب وعندي مشاريع ماسلمتها
بس المره الجايه انا اللي بنسق الرحله ونروح جميع

خلال دقايق وصلوا الفندق
ونزلوا طلال وفلوه يد بيد وعبد الرحمن لحقهم بأغراضهم

حط عبد الرحمن الشنط عند الباب
وسلم عليهم وراح

فتح طلال باب الجناح
ودخل : تفضلي ياقلبي
وبدلال ورقه دخلت العروس
الجناح و نزلت غطاها وعباتها ورتبت شعرها
وطلال يتأملها ويذكر الله:
ماشاء الله ماااشااءالله
حبيبتي وقرب ماقدر يمسك نفسه ان يضمها
ضمه قويه كأنه بيعوض حرمان السنين
كان حضن متبادل حاضنين بعض شوقهم مايحتاج له كلام
عبروا عن شجونهم وحنينهم وشوقهم وحبهم لبعض

تأوهت فلوه من شدة حضن طلال خفف من قوة حضنه
ورفع راسها يتأمل جمالها وزينها
:عورتك ؟؟
شديت عليك بالقوه لاتلوميني
افتقدتك وماشبعت ....ماشبعت
ورجع يحتضنها كأنها بيزرعها داخل ضلوعه
******

.
.

وبعد رجعة فلوة لزوجها
اضطرت ام فياض
تقعد مع فرح ولميا عشان المدرسه والجامعه

ما راحت للمزرعه
فياض ياخذ بنته تركية للمزرعه هي للدوام وهو يشوف اشغاله ونياقه


مر اسبوعين

وتركية تشتكي من الوحده بالمزرعه دايم هي وفاطمه مجتمعات
لكن الجادل انعزلت عنهم بوجود تركيه
تعتذر بإنشغالها بجدها واشغاله
ماعادت تطلع بسيارتها
خوف انها تصادف فياض
وف يوم
اتصلت فاطمه على الجادل
وسألتها بصراحه
:انتي وش صاير معتس!!
قالت الجادل : ماصار شي ليش تسألين
قالت فاطمه بنبرة اهتمام:ابد من زمان ما زرتيني ولو ما اتصل عليتس ماسمعتيني صوتس
حتى تركيه تسأل عنتس اخر شي يوم حفلتهم
سكتت الجادل ماعندها رد

كملت فاطمه كلامها
: و ام فياض اليوم كلمتني تنشد عنتس
تقول تدق عليتس ماتردين
قالت الجادل :يوم تدق مشغوله اكيد
واذا خلصت شغلي ان شاء الله ارجع اكلمها

ناظرت فاطمه بالساعه
:الليله دور ابو فراس بدورية الشباب
القهوة والعشاء عندنا
ماتجين تساعديني ونتونس شوي حتى انادي تركية ما دام ابوها معزوم

هبط قلب الجادل بس من سيرته وعورها راسها
قالت وهي تمسك راسها
:والله مصدعه يا فطوم
وصاحيه من الفجر

فاطمة اخذت على خاطرها وقالت : طيب خليتس براحتس بس هذا وجهي اذا انتي مو صاير معتس شي وما قلتي لي عنه انتي منتي الجادل اللي اخبر

وانتهت المكالمه بينهن
والجادل تتنهد بضيق : اسمحي لي يا قلبي والله شي ماينقال انا كل ما تذكرت ودي الارض تنشق وتبلعني

******

في مجلس ابو فراس
وبعد العشا وحوالين الوجار اللي مصفوفه
عليه الدلال وبقايا النار بجمرها المتقد
كان فياض سرحان وعقله ابد مو معه مع الجادل اللي اسمها تردد كثير الفتره اللي راحت
من امه وبناته
عرف انها مختفيه
من زمان ماشافوها ولا حتى تكلمهم
ليش؟؟؟
وش اللي حصل
يكون عشان ذيك الليله ؟؟!؟؟!

اللي يعرفه انه حصل تقارب بين امه والجادل
وماقد سمع من امه مدح لاحد مثل ما سمع عنها
حتى بناته دايم يتكلمون عنها بمحبه
بس حسب ماسمع من مكالمة تركيه وامه
ان الجادل من حفلة فلوة ماعاد شافوها
ولا عادت تتصل ولا حتى ترد على اتصالاتهم

وهذا الشي مسبب قلق واستغراب عند امه وتركيه
بس اكد له سبب اختفائها
معقوله تتحاشاهم عشاني ؟!؟
معقول اكون انا السبب في اختفائها ؟؟؟؟

انفض مجلس ابو فراس وخلى المكان لهم
قال فياض لابو فراس بدون مقدمات
: لو اخطب منكم تزوجوني ؟؟
ناظر فيه ابو فراس بتفحص وعقد حواجبه
: تخطب من ؟؟
قال فياض : اختك
قال ابوفراس وهو تتضارب عنده المشاعر
اول مره تنخطب الجادل ومن اللي خطبها
فياض الفياض

: اممم والله الشور في هذا الموضوع لجدي
واكيد صاحبة الشأن
قال فياض :طيب انتظر منك الرد
رد ابو فراس: ان شاء الله
والله يكتب اللي فيه خير وخيره
وانتهى المجلس
على خطبة فياض للجادل

.
.
.

البارت العاشر

.
.
.

ليلة بات فيها احلى خبر بقلبي
ماعلمت فاطمه عارفها بتروح وتعلم الجادل
اول شي اكلم جدي
متأكد بيفرح مثلي
واخيرا ربي ساق للجادل زوج ومو اي احد
فياض الفياض
كلن يتمناه لبنته

طول ليلي اتقلب ما جاني نوم
انتظر يصبح الصبح واطير لجدي افرحه بهذا الخبر


صليت الفجر وركبت سيارتي وعلى مزرعة جدي
وصلت لقيت الجادل توها جايبه فطورها وقهوتها عند جدي
:صباح الخير يا خيتي
ردت :صباح النور ياروح اخيتك

اقبل علينا جدي من عند البركة
جلس قالت الجادل :
عوافي عليكم
وراحت للبيت
حسيت انها تعبانه او متكدره

افطرت مع جدي وفتحت الموضوع مافيني صبر
:جدي البارح كلمني فياض الفياض
يبي يخطب الجادل
ترك الجد قطعة الخبز من يده
وناظر بأبو فراس
: قل له ماعندنا بنات للزواج
تغيرت ملامح الفرح بوجه ابو فراس للاستغراب
: أيش
رجع الجد ياكل وقال
: ماعندنا بنات للزواج
قلت : طيب الجادل ماهو انت اللي كم مره تعرضها على عيال عمي وتدور لها رجال
قال الجد : الجادل ما بياخذها الا واحدن من عيال عمها
قال ابو فراس : بس ياجدي انت كذا ترخص اختي للي مايبونها
سكته جده برفعة يده قدام وجه ابو فراس
: اشششش قلت رأي واياني واياك تجيب
السيره هذي مره ثانيه

وترك الفطور وقام

لحقته : ياجدي الله يرضى عليك ماتنوخذ الامور بذالطريقة
عيال عمي بيردونك مره ومرتين وثلاث
وانا ما ارضى لاختي المهانة

مايبونها

وجاك اللي ترضى دينه واخلاقه
رد جده عليه بعصبية : تراددني
اخذت يده وحبيتها وتجمعت دموعي بعيوني مقهوور على الجادل ترجيته : تكفى ياجدي لا تقطع رزق الجادل تكفى
نفض يده مني وراح وخلاني
بس قبل لا يبعد عني قال : اياني وآياك تعصاني
وقفت اناظر مبهوت من جدي وموقفه اللي ماقدرت استوعبه

*****

في بيت فياض
مجتمعين على الغدا
ام فياض ولميا وفرح
نزل عبد الرحمن من فوق
شافته لميا وكشرت
: انت هنا ؟؟
خلاص ياخي رح بيتكم وش مقعدك عندنا !!!
رد الدحمي هو يتمغط بكسل: لاصرت قاعد فوق راسك تكلمي
قالت ام فياض بزعل لمياء: يالخبله وش هالكلام
قال الدحمي وهو يحب راس جدته
: صباح الخير بالظهر يا احلى جدة بالعالم
ردت ام فياض مبتسمه له : هلا حبيبي تعال وتأشر على الكرسي بجنبها : اجلس تغدا معنا
قال دحمي : ما ابي اتغدا ابي قهوة وتمر وطحينه
وناظرت بلميا : قومي جيبي للدحمي اللي يبيه
قالت لميا وهي تناظر بالدحمي من فوق لتحت
: قم انت الله لا يهينك جب لنفسك اللي تبيه
قال الدحمي : ماله طعم الا اذا انتي جبتيه
يالله قوومي لمووووش
قالت وهي تكمل اكلها :
احللللم
ناظر الدحمي بجدته وعطاها نظرة المسكين
: جده شوفيها ماتبي تجيب القهووة
قامت ام فياض : انا اجيبها خلاص
فزت لميا ورمت ملعقتها
: والله ما تقوميين انا هذاني قايمه خلاص
بس نفسي اعرف ليه ما يخدمون نفسهم العيال
ليش لازم حنا نسوي لهم كل شي
راحت وهي تتحلطم والدحمي يرفع حواجبه مبسوووط انه نرفز لميا
على كثر ما يتناقرون الا انهم ما يستغنون عن بعض



قالت ام فياض :الدحمي تودينا للمزرعة
رد عبد الرحمن : ابشري
متى تبين نمشي انتي بس آمريني
ام فياض :العصر عشان نوصل قبل الليل ما يمسي علينا
قالت فرح: اخيرا بروح المزرعه اشتقت لأرنوبي
واشتقت للجادل
قالت لميا وهي تحط صينيةالقهوة
: الجادل حي ذا الطاري والله
صبت فنجال للدحمي وناولته : بتودينا للمزرعه؟؟
هز راسه موافق اجل تستاهل من يجيب لك القهوة ويقهويك
قال الدحمي : راعية مصالح
عطته نظره واخذت جوالها وارسلت لتركية
: جاييينكم الليلة ان شاء الله
تبين شي

على طول اتصلت تركية : والله تسووون فيني خيير طفشانه لحالي هنا
بسسرعه هالحين تمشوون


*****
ضاقت بي الارض عقب اتصال ابو فراس
الصراحة كنت مستبشر خير
ابدا ما توقعت الرفض نهائيا
يوم قال لي مافي نصيب
هوى قلبي من ضلوعي
يعني الجادل ما بتكون لي
فكيت ازرار ثوبي محتاج اتنفس

اخذت قارورة الما ء وكبيتها على راسي
راسي يطبخ من القهر
لكمت الدركسون ابي افرغ شحنة الغيض والقهر
واثرني كنت مقهور بالحيل
آخ يالقهرر
ونفضتها من الوجع بس وجع قلبي اكبر
لييه رفضوني وياترى الرفض منها والا من جدها
دق الجوال اخذتها بيدي الثانيه
كانت امي الله يخليها لي : هلا
ام فياض: هلا بك يا حبيبي
وينك ؟
قلت وانا اناظر يدي اللي تعورني وصار فيها كدمة :بالمزرعه
قالت :انا بالمزرعه ماشفتك
تحركت نحو المزرعه طالع من عند النياق
قلت :جايكم هالحين
وقفلت

اخذت نفس عمييق ابي اروق قدام امي
عارفها بتسألني وش فيك من تشوف وجهي

وهذا اللي صار من دخلت عليها
فزت واقفه واقبلت علي
:وش فييك
حضنتها بيدي السليمه وحبيت راسها
الحمد لله على السلامة
رفعت لها يدي وقلت يدي تعورني
وبحنيه ورفق مسكت يدي : وش بها يدك
قلت :مدري تعورني
ودخلن علينا البنات من سمعن صوتي
وتسابقن للسلام علي
قالت امي : شوي شوي انتبهن يد ابوكن
قالت لميا بعد ما شافت يدي : اووف وش فيها يدك
اخذتها بحضني من زمان عنها طيب سلمي
زين وبعدين حققي معي
حبت راسي
وبعدها فرح حضنتني وحبت يدي
ضحكت : خلاص يمه طابت يدي بعد ماحبتها فرح
جابت امي شنطتها وفتحتهاوطلعت
الرفيق الابدي لها الفكس
:اشوف الله يخليك لي قرب ادهنها لك بفكس
مديتها لها وبكل حنية دهنتها : ياحبيبي تعورك
خايف انها تعورني وهي تدهن عليها

جابت لميا شاش وربطتها عليها
تركية : داخله بالقهوة والحلى : يبه حبيبي الله يخليك لنا انتبه لنفسك
قلت : بسيطه بسيطه لا تخافن بكرة ان شاء الله
تكون يدي طيبه
وبقلبي اقول "الوجع ماهو بيدي

الوجع بقلبي"
ولا ارادي يدي ارتفعت لقلبي
شهقت امي وقالت : وش بك
عسى ما تحس شي
قلت :لا مافيني شي
بانت نظرات القلق بوجه امي وبناتي
وخصوصا فرح اللي قربت مني واحتضنت ذراعي وسندت راسها علي
قلت لها شفتي ارنوب
رفعت وجهها وعيونها لي قالت : اي شفته اول ما وصلنا وشفت اخوانه مررره حلويين
واكلتهم
بس باقي بكره اروشهم
قالت لميا بصرخه : لاااااا
لا تروشينهم ماتذكرين يوم روشنا الارنب ومات
تبسمت على سوالف بناتي دايم يغيرن مزاجي
مر الوقت مع سوالف بناتي وجلستهم حواليني وامي طول الوقت عيونها علي بان قلقها علي
على الساعه ظ،ظ، دخلت غرفتي استعد للنوم

وانا على سريري هاجمتني
افكاري
"الحين تكون الجادل هي اللي رافضتني
معقول ان اخر موقف بيني وبينها يكون السبب
لا لا لاا طيب جدها
بس كم مره نتقابل يهش ويبش معي
تكون ..."
دق الباب وقطع علي افكاري قلت :ادخل
دخلت امي قالت : شلونك الحين
قلت لها وانا ارفع يدي واحرك اصابعي
: طيب طيب
تعورني بس احسن من اول
جلست جنبي على طرف السرير وقالت : وش فيك
وجهك علامه
تبسمت بتعب : مافيني شي يا ام فياض
قالت: إلا علمني وش صاير معك
قلت: والله يمه مافي شي بس تقدرين تقولين
من بعد مارجعت فلوة لزوجها
وتشتتنا انا هنا مع تركيه
وتركتك مع لميا وفرح هناك
وشغل هنا وشغل هناك

قالت امي : انت لو تطيع شوري
وتخليني اخطب لك
مسدت شعري من الصداع اللي لمع براسي مع خيال الجادل اللي تمنيتها
وقلت : من اللي بترضى فيني شايب وبناتي كبار
قالت امي : هوو وش شايب
توك بعز شبابك
تبسمت وقلت : تعرفين ردي اللي دايم اقوله لتس
هزت راسها بيأس منه ومن رفضه اللي دوم لفكرة الزواج مرة ثانيه عقب ام بناته الله يرحمها

قامت وقالت :لا تنام الا وانت موتر
يالله ياحبيبي تصبح على خير


طلعت عني وبقلبي اقول ليت تدرين يمه وش اللي صار
*******

في غرفة البنات
لمياء توقت الجوال على صلاة الفجر
: بكره ان شاء الله انا اللي بفطركم عازمتكم على احلى فطور تحت النخل
تركيه تعدل اللحاف على فرح
: الله يقويكِ بس وش عندك
قالت فرح : لمووش اذا بتسوين فطور سوي
مصابيب زي الجادل مررره لذيذذذذ
قالت تركية : الله مصابيب مره وحده لميا حدها جبن وزيتون واذا مرره تشطرت سوت بيض مسلوق
ناظرت فيها لميا من فوق لتحت وقالت "ماراح ارد عليك بس بتنذهليين
وانسدحت بسريرها وطفت الابجوره اللي بجنبها ومسكت جوالها ارسلت منه واتس
اما تركيه فأخذت حبوب مسكنه وكوب مويه وراحت تتفقد ابوها
دقت الباب ودخلت لقت ابوها نايم بس حس عليها : هلا تركيه
قالت يبه شلون يدك الحين
قال : الحمد لله
قالت هذي حبه مسكنه اذا شد عليك الوجع
قال بصوت ناعس خليها هنا وأشر على الكومدينه
اللي جنبه
وحبت راس ابوها وطلعت وراحت تنام

*********
عند الجادل
صلت وردها خلاص بتنام ووصلتها رساله
فتحتها لقتها من لمياء كاتبه فيها: جدوله حبيبتي تكفين ابي طريقة المصابيب
ابتسمت الجادل بس من خيال وخبال لميا العسل
كتبت لها الطريقه وارسلتها
وانسدحت بفراشها
رجعت لميا ارسلت لها
:طيب متى اعجنها ابيها فطور الفجر
ردت عليها الجادل
احسن اعجنيها الحين وغطيها
وبكرها تسوينها
ارسلت لها لميا
شكرا يا احلى جادل بالدنيا ï؟½ï؟½â‌¤ï؟½ï؟½
غطت عيونها الجادل بنعاس
رجعت لميا ترسل : جدوله
شرايك بكره نطلع كشته
بدون تفكير كتبت الجادل
انا مشغوله مره ثانيه ان شاء الله
ردت لميا âک¹
:طيب بالليل نتلاقى عند ام فراس
ردت الجادل :والله ما أقدر
ردت لميا: ï؟½ï؟½ بس ترى من زمان ماشفناكِ اشتقت لك
ردت الجادل : والله انا بعد مشتاقة لكم بس مشغوله ما أقدر اترك جدي
ردت لميا :تصبحين على خير واسفه ازعجتكï؟½ï؟½
ردت الجادل :تلاقين الخير ï؟½ï؟½

تبسمت الجادل
تحب لميا وتحب عفويتها وتحب شوفتها
"انا ليش حارمة نفسي من شوفتهم ؟؟
وش ذنبي وذنبهم !! ليش اعاقب نفسي على شي ماهو بمقصود !!
حتى فاطمة زعلتها مني
وفراس كم لي ما شفته ولعبته حبيب عمته
خلاص بكره من العصر وانا عند فطوم
واقولها تنادي تركيه وجدتها والبنات اذا كانو بالمزرعه
رجعت اخذت الجوال وارسلت لفاطمة واتس : فطوم بكره جايتتس ان شاء الله بنام عندكم اشتقت لفرووسي


******
اليوم الثاني
وفي بيت ام فراس
كان اجتماع الأحبه
اجتماع ام مع بنتها
كانت هذي مشاعر ام فياض
يوم شافت الجادل عقب غيبة
يا هلا والله ببنيتي
كان سلام واحضان
المحبه متبادله
الجادل مع ام فياض ذاقت احاسيس جديده
احاسيس مامرت عليها احساس حب الام لبنتها
والبنت لأمها مشاعر حلووة وفياضه
جلست ام فياض ويدها بيد الجادل
:تعالي جنبي والله يابنتي يعلم الله اني احبتس وناظرت بأم فراس :حتى انتي يا ام فراس
يشهد الله على غلاتس
ضحكت فاطمة وقالت : لا شكل الحادل تربعت بالقلب وماخلت لاحد مكان
قالت لميا وانا بعد احبكم
صادقة جدتي لكم غلى ومحبه ماهي لغيركم

قالت ام فياض للجادل وينتس يابنتي
لاعاد تبطين علينا
قالت الجادل : معليش سامحيني بس كان غصب عني كنت مشغوله مع جدي
بس ان شاء الله ما يبعدني عنكم الا الشديد القوي
قالت تركية :تكفين والله الفترة اللي فاتت
كانت طفش ضعيفه ابلا فاطمة ازعجتها كل شوي
وانا عندها والا داقه عليها
عقب رجعة عمتي فلوة لزوجها ما عادت جدتي
تقدر تجي مثل اول
بس خميس وجمعه
قالت ام فياض وهي تناظر بالجادل :ان الله اراد لقيت الحل اللي بيريحني ويريحتس ياتركيه

ودارت السوالف بينهم روح المحبه والألفه
وقبل لا يمشون راجعين بيتهم
اخذت ام فياض فاطمة على جنب وقالت لها
: كلمي ابو فراس تراني ابي الجادل زوجتن لفياض
تبسمت فاطمة وطارت فراشات السعادة بقلبها من اللي تقوله ام فياض واخيييرا تحققت امنيتها وبتزوج حبيبتها الجادل للي تمنته لها
قالت فاطمة تحاول تلم ابتسامتها وفرحتها شوي : يوصل ان شاء الله
قالت ام فياض انا ماحبيت اتكلم قدام الجادل اعرفها تستحي وقلت اكلمتس انتي اختها
وان وافقتوا نجي نخطب رسمي
ويكون كلام الرجال مع بعض
قالت :فاطمة ان شاء الله عطيني كم يوم
وارد لتس خبر والله يكتب اللي فيه خير وخيره
توادعوا عند الباب وقفلت فاطمة الباب والحماس عندها ملييييووون
بتنفجر من الوناسه
ان اللي تمنته بيتحقق
ودخلت للبيت والجادل وراها فكت ضحك هههههه قالت الجادل مستغربه : بسم الله وش يضحكتس
قالت فاطمه وهي تحضن الجادل : فرحانه مرررررره فرحانه
انتقلت الابتسامه للجادل : دووم يارب
طيب علميني وش اللي فرحتس فرحيني
قالت : لااا
انتظري اذا جا اخوتس اقولكم سوا مع بعض

*******
وصلت ام فياض والبنات للمزرعه
وكان فياض جالس شاب ناره في بيت الشعر
ومتلثم سلمن عليه البنات وراحن داخل البيت
وام فياض جلست جنب ولدها

متنكد ومصدع ومنغث باله
مافيه يسولف ولا يسمع
بس ما يقدر يبدي ضيقه لأمه
عارفها بتضيق لضيقته

جالس يقلب الجمر
قالت ام فياض : والله يا ولدي الدنيا ذي شفت فيها اشكال الناس وانواعهم بس
مثل ام فراس والجادل ما مر علي
حبيبات ونشميات
سكت ماعلق على كلام امه
وش يقول
"ماتدرين يمه

آه لو تدرين ماقلتي اسمها قدامي
تنهد من كل قلبه

قالت امه :بسم الله عليك وش هالتنهيده
كأنك شايل هموم الكون
قال : مافيني شي يمه بس مصدع
الله اعلم النار ودخانها اثرت علي
قالت ام فياض : اسمع تراني اليوم كلمت ام فراس اشوف رايهم بخطب لك الجادل
رفع عيونه لأمه متفاجئ وشك باللي سمعه: وشوو
عيدي ما سمعت وش قلتي
قالت : خطبت لك الجادل وانتظر ردهم عشان تخطب رسمي
فز واقف وكله ينتفض
"بيردوني مره ثانيه ماني حمل كسحة مره ثانيه"
:لييه يمه لييه
ليه ما شاورتيني قبل
قامت على حيلها ام فياض
:اعرفك لو بشاور ك بتقول
لا راح عمرك يا ولدي ابيك ترتاح وتكون لك زوجه تهتم بك وببناتك وببيتك والله يرزقك منها ان شاء الله العيال

مسح على عيونه حس بحرقه
:طيب بس كان شاورتيني
قالت :انت الحين شبيت علي للحين ماردوا
اللي يشوفك يقول بتعرس بكره
اصبر لين يردون علينا
وفياض بقلبه يردد خوفي عليتس يمه من الرفض
******
في صالة ام فراس وجلسه تضمهم الثلاث ابو فراس والجادل وفاطمه
صبت فاطمه لهم الشاهي
وجلست بجنب الجادل وقالت
:ابو فراس
قال :سمي
قالت بفرحه وهي تضم الجادل بيمينها : الجادل جالها عريس ويبون ردكم بسررعه
كحت الجادل من المفاجأه ضحكت فاطمة وقالت اححم بسم الله عليتس
وابو فراس نفس الحال تفاجأ للحظه
وسأل : من ؟
قالت فاطمة : ام فياض
تقول شاوري ابو فراس والجادل
وان وافقت الجادل فياض بيخطب منكم
تغير وجه ابو فراس
وقال : فياض كلمني ورديت عليه برد جدي
تغيرت ملامح الجادل وقلبها زادت خفقاته
: فياض خطبني من جدي!!!
قالت فاطمة : متى ؟! وشلون ؟! وش رد جدي ؟!؟
قال ابو فراس وهو يناظر بالجادل : جدي رفض
ام فراس وقالت بغضب : وليييه ان شاء الله
ليه يرفضه
قال ابو فراس بعد تردد : جدي للحين متأمل ان اللي بياخذ الجادل واحد من عيال عمي
هنا صرخت الجادل وقالت
: والله ثم والله لو على مووووتي ما اخذت واحد منهم
وطفرت دموعها ما ابي اتزوج لا عيال عمي ولاغيرهم
قالت فاطمه بعصبيه وهي مشفقه على الجادل : والله ما تاخذين غير فياض الفياض
هذا انا حلفت
راح عمرتس وجدي بيكمل عليتس مع عيال عياله
قال ابو فراس وهو يضم اخته ؛اهدي اهدي والله ما يصير الا اللي تبينه
عيال عمي انا اللي بوقف لجدي بهذا الموضوع
بس انتي فكري بكلام فاطمه وخطبة فياض
ردت الجادل وهي تشاهم متنكده
: تكفى يا اخوي كلم جدي لاعاد يرخصني قدام عيال عمي
تكفى
*******



.
.
.
البارت الحادي عشر
.
.
.
سهرت أعين ونامت عيون ..... في أمور تكون أو لا تكون
فادرأ الهم ما استطعت عن النفس ..... فحملانك الهموم جنون
إن ربا كفاك بالأمس ما كان ..... سيكفيك في غد ما يكون

.
.
.

مقهوورة
وش يعني يرفض فياض
وعشان مين !!
عشان احفاده
يحرم الجادل من ارتباطها بفياض
اخ بس
يا عزي عن الجادل
والله مانشفت دمعتها
تنكدت الله ينكد على العدو
بس افرك بيديني من قهري عليتس يالجادل

بس والله الذي لا اله الا هو ان ما تكونين الا لفياض
وانا بنت ابوي
من غبنتي على الجادل ما ذاقت عيني النوم
ابي يجي بكره بسرعه
حس علي ابو فراس ادور بالغرفه جلس وهو مثلي مانام

فطوم تعالي نامي بكره ورانا يوم صعب
ربي يقوينا ويقوي حجتنا ونقدر نقنع جدي
رديت : ما أظن يجيني نوم
نام انت انا بجلس مع فراس برى واذا اذن الفجر صحيتك

اخذت فراس وطلعت للصاله
واشوف الجادل واقفه على سجادتها تصلي تهجد

"اييه يالجادل اطلبي ربتس هو اللي بينصفتس وياخذ حقتس من الكبير والصغير
انتظرتها الى سلمت ورحت جلست جنبها
قلت لها:
جادل انا اعرف وش تحسين فيه
ووش اللي يدور بخاطرس
ومسكت يدها ابي احسسها اني معها قلبا وقالبا
حبيبتي ماهو عشان جدي قال انتس لواحد من عيال عمتس
ترفضين الزواج بكبره
وترفضين فياض
ردت علي قبل ما اكمل كلامي
وهي متردده
:يعني هي واقفه على رأيي انتي تعرفين جدي
وعناده
قلت لها :طيب لازم يعرف برأيتس بالموضوع
قالت الجادل : هو يدري اني رافضه طريقته وفكرته واسلوبه
معي ومع عيال عمي
و ما اظن بموافقتي على فياض او عدمها بتفرق برأي جدي
قلت لها : انتي وافقي وبعدها يصير خير
تنهدت وكأنها تبي تنهي الكلام معي موافقه بس جدي بيوافق !!
قلت لها وانا ابتسم : حللللوووو اهم شي بالموضوع انتس موافقه وجدي بإذن الله ربي بيقدرنا عليه ويهون عن رايه

*******
في بيت فياض
ام فياض ماسكه جوالها ومثل كل ليله
الاتصال اليومي بينها وبين بنتها فلوة
من بعد مارجعت لزوجها طلال

قالت فلوة
:يمه مررره اشتقت لكم واشتقت للمزرعه يمكن اجيكم اقعد كم يوم
قالت ام فياض : اقضبي ارضك واقعدي مع زوجك
ضحكت فلوه: هههههه يمه هذا انتي مره ماتبيني اجي
قالت ام فياض : تلوميني خلاص كني في بيتك
قالت فلوه : بإذن الله بجي انا وطلال
قالت ام فياض : اصبري على رزقك و بتجون كلكم ان شاء الله
قالت فلوة:خير يمه وش عندك
قصرت صوتها ام فياض وتلفتت حولها تخاف احد من البنات يسمعها
:خطبت لفياض
شهقت فلووه متفاجأه :من جدك يمه
قالت : أيه خطبت له و ان شاء الله تتم هالخطبه
قالت فلوه اصبري كأني عرفت من خطبتي له
ضحكت ام فياض :يالله اشوف منهي ؟
قالت فلوه : الجادل
ضحكت بصوت اعلى ام فياض: شلون عرفتي
قالت فلوه : لاني حتى انا فكرت فيها زوجه لفياض طيب شلون وافق فياض قلتي للبنات او لا
قالت ام فياض : اسكتي لو شفتي فياض يوم علمته اني خطبت له كأني ذابحته عصب وتنرفز
فلوة : ليه يمه انتي خطبتي وهو ما يدري ؟!
قالت ام فياض: ايه لوبنتظره مابيتزوج ابد
قالت فلوه يمه: والبنات طبعا اكيد ما يدرن
قالت ام فياض : مايدرن ولا راح اقول شي لين يردون علينا
قالت فلووه : الله يستر منهن مدري شلون بيتقبلن الله يستر بالله علميني اول ما يردون
قالت ام فياض: ان شاء الله والحين تصبحين على خير نعست
انهت المكالمة وما درت باللي كانت جالسه من اول عندها
وسمعت كل شي

**********

يالله صباح خير
يكون لنا فيه احسن المقادير ويزين لنا التدابير
وصلنا لبيت جدي على الساعه ظ¨الصباح
وكان بالمزرعه
نزلت الجادل ودخلت البيت
وانطلقت فاطمه متجهه للمزرعه
مسكتها بطرف عباتها : استني الله يرضى عليتس
ردت علي متنرفزه : وش استنى علمني وش انتظر
ياخي لا تقهرني ببرودك وهدوئك
قلت لها : روحي اجلسي مع الجادل وانا بكلم جدي واعلمه باللي صار
ردت علي :معليش ابو فراس انت اللي رح واجلس مع الجادل
و خذ موافقتها واضمنها واسمع منها البارح حسيتها
تبي تسكتني
لان بإذن الله زواجها بفياض بيتم وعلى يدي
وتركتني وراحت رجعت مسكتها مره ثانيه
:انتي اللي بتخربين السالفه جدي واعرفه زين
اصبري واذا ما صار اللي تبينه تدخلي ذيك اللحظه
قالت فاطمه : شف انا بقلبي كلام يقرقع ولازم اقوله لجدي واليوم
قلت لها انا الحين اللي بكلمه وانتي انتظريني الله يرحم والدينتس
تكتفت وقالت بعدم اقتناع :طيب بسمع شورك
واخليك انت تكلمه اول
والحين رح له
وانا بشوف الجادل

مشيت للمزرعه ودخلت عند جدي تحت العريش
توه جالس بعد ما اشرف على المزارع وعاونه

: صبحك الله بالخير يا جدي
رد علي بوجه جامد وجفاف
:هلا
حبيت راسه :شلونك يا جدي كيف اصبحت
رد علي :من الله بخير
وتفحص وجهي وقال: هااا وش عندك ؟؟

قلت له :البارح ام فياض خطبت الجادل من فاطمه
تقول شاورو جدكم والبنت
عطاني نظرة وقال : ماخلصنا من هالموضوع
قلت له :هذا اللي صار انا رديت على فياض
وامه كلمت فاطمه
زفر بسخط : ايييه وش ردت عليهم فاطمه
قلت :فاطمه قالت ارد لكم خبر
قال جدي :هو نفس ردي ماتغير ماعندنا بنات للزواج
قلت بتصميم على مناقشة جدي : بس ابي افهم
ليش متمسك بعيال عمي وهم كم مره يصدونك ويرفضون
قال :اول شي ماهو منا ولامن قبيلتنا ولا من ربعنا
وعيال عمك هم اللي بيخافون على الجادل
لانها من لحمهم دمهم هم اللي
وقطعت عليه كلامه
وقلت :متأكد ياجدي انهم بيكونون لها السند ؟؟
انت ياجدي عارف ومتأكد برفضهم لها مره وثنتين وثلاث
لا تمتهن كرامة الجادل اكثر
رد علي :صه ولا كلمه انا اخبربمصلحة بنيتي
وجاك العلم مالها الا واحد من عيال عمها

مسحت على وجهي اتلمس الهدوء والثبات بنقاشي مع جدي
وقلت :وهذا اخر كلامك ياجدي على خطبتهم الثانيه
ترى ياجدي لو مايبونها وماهم حريصين عليها ماخطبوها
مرتين الناس شاريه بنتنا ويكون هذا ردنا عليهم!!
الجد :حتى لويخطبونها عشر رايي هو هو
ابو فراس: حتى لو قلت لك ان بنتك موافقه
الجد وهو بيقوم على حيله:وشو!!
ورجع تساوى بمحله وقال تستذب علي ياولد
...بنتي واعرفها ماتطلع عن شوري ولا لها راي غير رايي
يقوله وهو يفكر ومستغرب من كلام ابو فراس
ابو فراس:ياجدي الله يخليك لنا ولايحرمنا شورك ورايك
..ليه مصر على رايك ترى لاهو عيب ولا حرام
انها تزوج واحد ماهو من قبيلتها ولا من اقاربها
لاتقطع نصيبها بنتك اللي تحبك وتغليك
تستاهل منك تدور لها احسن الرجال
والحمد لله اللي ماحدك تدور
هذا نصيبها الزين جاها لحد بابك
وهذا من رضى الله عليها يومك راضي عليها
سكت الجد وهو يهوجس ويشاور عقله
تقول الجادل موافقه ؟؟!!
قلت :أي يا جدي فاطمه علمتني انها موافقه
سكت وهويقلب الفكره براسه ماهو مقتنع
بس لازم يسمع اول منها
:يصير خير لاترد على خطبتهم الثانيه لين اقولك
ابو فراس نقز على راس جده يحبه
ويقول :الله يطول بعمرك ياجدي ولا يخلينا منك
الجد:ترفق ياولد انا ما وافقت
انا بكلم بنتي واصلي استخاره واشوف... هذي امانه ماهي لعب
.
.
.
.
قام الجد وراح البيت وتلقته فاطمه
بعد السلام قالت جدي
اسمح لي بكلمة راس معك
ناظر فيها ابو فراس وهو يهز راسه يعني لا
قال : فاطمه سوي لنا قهوة
جدي يبي يجلس مع الجادل وغمز لها
راح الجد لداخل عند غرفة الجادل
وفاطمه استلمت ابو فراس
هااا بشر وش قال؟؟

قال ابو فراس الله العالم انه لان وبيوافق
بس عسى الجادل ماتهون وتتراجع و تخرب علينا
وترفض فياض لاني قلت له ان الجادل موافقه


******
في غرفة الجادل
سأل بينه وبينها ماهو مصدق
قال: يا بنيتي انتي عارفه وش بقول
ردت عليه بحيا :سم يا ياجدي
قال وهو يتفحص ملامحها وعيونها يبي يستشف منهم ردها

:وان قلت لتس اني رافض فياض
واتمنى تاخذين من عيال عمتس
تجمعت دموعها بعينها
وقالت: جدي الله يخليك لي تكفى الاعيال عمي
اخذت يده وحبتها : انا ادري ما يبوني وانا ما ابيهم
وكم مره رفضو طلبك
ليش ترضى لي المذله والمهانه
وانهارت تبكي
قرب لها وحضنها
:ارفعي راستس
وعلميني انتي موافقه ؟؟
ردت بعد ما مسحت دموعها
وحاولت تستجمع نفسها وترتب كلامها
: انا يوم وافقت وافقت ولي اسبابي انا...
ترددت تكمل وبصوت يرتجف وهي تخفي السبب الاهم لموافقتها
:انا ياجدي انا لقيت لي عقب هالسنين كلها ناس تحبني عشاني انا
.. ناس عطتني فرصه ادخل حياتهم واختلط فيهم
ناس حسسوني اني بنتهم واختهم وصديقتهم
ناس حبوني وحبيتهم
ناس حبيت الحياه معهم ناس حكمت علي انا وحبتني انا
مهو على ظروف مالي دخل فيها ..
ناس لقيت في بناتهم خوات لي
وفي امهم ام لي حسيت بإحساس الام معها
وانهارت مره ثانيه بالبكاء

تأثر جدها من كلامها وحس لأول مره بمعاناتها الحقيقيه
اللي كانت غايبه عن باله وهو يحسبنه مكفيها عن العالم بحنانه وحبه لها

الجد بشجن حط يده على راسها يمسح عليه
: الله يكتب لتس اللي فيه الخير والصالح يابنتي
خلاص يابنتي والله مايصير الا اللي يرضيس ان شاء الله

طلع منها وراح يجلس مع ابو فراس وفاطمه
ونظراتهم ومشاعرهم متحفزه لكل كلمة منه
ياترى وش دار بينه وبين الجادل !!
وعلى ايش انتهى الحوار بينهم
رن جوال
ابو فراس واضطر انه يقوم يكلم بمكان ثاني
وخلى المكان لفاطمة وجتها الفرصه اللي تتمناها
قالت وهي تشحن نفسها بالقوه عشان تواجه جدها
: ياجدي انا عندي لك سالفه
اسمعني للاخير الله يرضى عليك
استقام الجد بجلستة وقال : اسلمي ام فراس
قالت : وش قولك ببنت يتيمه
كلن تولاها بالغمز واللمز يالشينه يالبوم يالنحس
وحملّوها ذنب وفاة امها وابوها وعمتها
وهي تسمع وتسكت
هي تسمع وتنجرح وتبلع عبرتها وتسكت
يوم تكبر عقلها وترفع عن سفاهتهم ما يخلونها
يزيدون بالجرح وتقول ماهموني
ويوم تأقلمت على وضعها معهم جاها جرح اكبر واعبر
من اللي ماتوقعت منه الجرح
سندها يعرضها عليهم واحد ورى الثاني يرفضونها
لا مره ولامرتين وهي تسمع وتشوف
يرضيك ياجدي
يوم الله زين حظها وجاها اللي مايعيبه لاخلق ولا دين
ولا اصل ولامال ولا جاه
ينرفض
وماهو بس كذا ..
لا
تنعرض مره ثانيه على عيال عمها
عشان يرجعون يهينونها مره ثانيه برفضهم

هنا كانت فاطمة مخنوقه بدموعها وقهرها على الجادل
: بالله ياجدي وش قولك
يرضيك حالها يرضيك ؟؟؟
اسألك بالله
وحطت عينها بعين جدها
بعد ما رفع راسه لها وكانت دموعه مغرقه لحيته
قال وهو يتغصص بالبكا ويمسح دموعه
: لا بالله مايرضيني لا بالله
يعلم الله اني مادريت باللي يجرى لها
ويشهد علي ربي ان ماعاد تشوف اللي شافته
ولا تضام وراسي يشم الهوا

دخل عليهم ابو فراس بعد ما خلص مكالمته
وانذهل من اللي يشوفه جده وزوجته متنكدين من البكاء عرف ان فاطمه ماخلتها بقلبها وتكلمت معه عن الجادل
قال : اذكروا الله
قالوا سوا : لااله الا الله
قال الجد بعد ما هدأ
اسمع يا ولدي
بعد ما استخير ان شاء الله اعلمك وش ترد على العرب

وقام منهم
جلس ابو فراس جنب فاطمه وحضن كتوفها بيمناه
وتبسم : سويتي اللي براستس
قالت وهي تبسم وتمسح خشمها الاحمر
: صدقني كان ضروري اقوله اللي بخاطري
هذي امانه ومسؤليه و حق الجادل علي اقول اللي قلته
ويارب ان كان فيه خيره للجادل ان تيسر امورها
وتتم هالزواجه على خيير


********

سبحان الله بعد كلامي معي جدي جاني هدوء ورضا عجييب
استخرت وطلبت من الله الخيره
مع ان نفسي كانت صاده عن الزواج بكبره
لكن ولا نار عيال عمي

تفكرت بحالي مع فياض
انا يمكن لوخطبني احد ثاني ما وافقت
لكن هو بالذات
يوم الله اراد يحفظني ويسترني عقب كل المواقف اللي بيننا
خلاني افكر اوافق
ورجعت بي الذكرى لذيك الليله
لحظة تجمع فيها القمر والعطر وحضن دافي
ارتسمت عيونه قدامي ورن صوته هويقول بسم الله عليتس
تبسمت وانا اغمض عيوني خجل من الذكرى
هفففف بس قومي واتركي عنتس الخرابيط
وطلعت اجلس مع اخوي و فطوم

*******************

في غرفة البنات
تركيه جالسه تشتغل على اللاب توب
ولميا منسدحه بسريرها وتتصفح حساباتها وترد على متابعينها

اما فرح كانت بحاله غريبه
حاضنه دبدوبها وتبكي بصمت
حست عليها تركية
قامت وجلست بجنبها ورفعتها لحضنها فروحتي وشفيك
ليش تبكين؟
قالت وهي تمسح دموعها
:تركية امس سمعت شي من جدتي
ورجعت تبكي اكثر
وشدت انتباه لمياء وجت وجلست معهم على نفس السرير
:فروحه وش فيه حبيبتي
قالت فرح وهي تشاهم
:جدتي تقول انها خطبت لابوي
تبادلن تركيه ولميا النظرات
قالت لميا :لا مستحيل انتي سمعتي بالغلط
وقالت تركية : مافي شي من هالكلام
قالت فرح : الا صدقني جدتي كانت تكلم عمتي وهي قالت لها
تراني خطبت لفياض
وقفت لميا: والله مايصير وعلى جثتي
تركية :يا شيخه مستحيل بتخطب له وماقالت لنا وعلمتنا
حتى ابوي ما اعتقد بيوافق بدون مانكون موافقين
لميا بغضب : على كيفها جدتي
شلون يعني تخطب له ؟؟ ابوي وش ناقصه ؟
وليش جدتي بتدخل شخص غريب بيننا
تركيه : اششش قصري صوتك واهدي ما ندري الحين وش الموضوع
قالت لميا وهي تأشر على فرح
:تقولك سمعت جدتي يعني الموضوع منتهي مادام خطبت له
وياترى من هي عروسة الغفله ؟؟
والله لانتفها تنتيف
فرح ما سمعتي منهي اللي خطبتها جدتي
هزت راسها فرح بالنفي وقالت :
ماقالت منهي
تركية : لميا يرحم امك اهدي شوي
قالت لميا ودموعها تتجمع بعيونها
: وشلوووون تبين اهدا والله يمكن اموت اذا تزوج
فاهمه يعني ايش ان ابوي بيتزووووج
ويجيب لنا مرة ابو
مستوعبه وش مرة ابو

انتفض قلب فرح وقالت برجا ودعاء: يارب لا يارب لا
ضمتها تركيه وناظرت بلميا : اهدي اهدي
زادت فورة غضب لميا وقالت : لا تقولين لي اهدي
اذا انتي عندك عادي ان ابوي يتزوج
انا اقولك من الان والله لاقلب البيت عليكم
تركيه زادت ضمتها لفرح
وبهمس اشرت لميا : اششش حرام عليك زدتي خوف البنت
قالت لميا هه بس من الخطبه تلخبطت حياتنا الله يستر من اللي جاي

************

قبل ما انام
دخل علي جدي حب راسي وضمني لصدره بحنان كبييير
وقالي : والله ما تضامين وراسي يشم الهوا يالجادل
وهذاني اسألتس للمره الثانيه وابي تردين علي
موافقه على فياض الفياض
هزيت راسي بخجل بالموافقه
قال: على خيرة الله بكره يرد عليهم ابو فراس
وان ربي اراد الملكة يوم الاثنين

.
.
.





البارت الثاني عشر 

.
.
.

فياض


فياض ......يبه فياض
قم الله يرضى عليك
كانت ام فياض تصحي ولدها اللي اخذ قيلوله قبل الغدا وكانت نومته عميقه
من يوم قالت له امه انها خطبت الجادل ومن وراه وعقب رد ابو فراس بالرفض
ماعاد نام ليله كله هواجيس
وتفكير ......ردوني اول مره وبيردوني مره ثانيه

فتح عيونه بكسل شديد وشاف وجهه امه متهلل
:فياض حبيبي قم صحصح معي
جلس وهو يمسح وجهه ويرجع شعره على ورى
وبصوت كسلان ومزاج خربان
:هلا يمه
قالت ام فياض : ابشرك العرب وافقوا
ويقولون تجيب المملك يوم الاثنين وتملك

غمض عين وركز بالثانيه يبي يستوعب وش تقول امه
: وش تقولين يمه
رجعت تقول امه : اقولك ردت علينا ام فراس وتقول الله يحييكم الاثنين عشان تملك
تسارعت دقات قلبه
وتلخبطت مشاعره
اعتدل بجلسته وتوقظت كل احاسيسه

:معليش يمه عيدي اللي قلتيه بشويش عشان افهم
تبسمت امه وقالت : الجادل ان قاله الله من نصيبك وافقوا على الخطبه والملكه الاثنين
غمض عيونه براحه لثواني
ام فياض ماعرفت كيف تفسر ردة فعله
:فياض وش فيك ؟
تنهد براحه ماهو قادر يوصف شعوره ولاعرف كيف يترجم وضعه قدام امه
قالت ام فياض برجاء
: هاا يا ولدي الناس وافقوا
لا تخرب علي فرحتي برفضك انت
تناول يد امه وحبها
: لا يمه انا بعد موافق شلون ارفض من اخترتيها لي
وحب راسها واحتضنها
وهي بعد لمت عليه
: الله يوفقك ياحبيبي والله ما تندم انك طاوعتني وخطبت الجادل
رد فياض :الله يخليتس لي يمه
قالت ام فياض الحين لازم تكلم بناتك والا تبيني انا اكلمهن مع اني عارفه مابيقولن شي لو عرفن ان الجادل هي عروسك
رد بهدوء :والله مدري يمه نكلمهن سوا انا وانتي بس اول شي انا عندي شغله ضروريه لازم اسويها
وقام بشكل سريع وتوجه لغرفته
ولبس وكشخ وتعطر
وطلع
واجهته لميا وهو طالع
:يبه ابيي اتكلم معك
رد عليها وهو يتفقد جواله ومفاتيحه
: من عيوني بس عندي شغلة ضروريه بسويها وارجع على صلاة العشا
وطلع وترك لميا واقفه
ركب سيارته واتصل على اخوانه وطلب منهم يحضرون يوم الاثنين من بدري
ورجع كلم طلال وطلب منه نفس الطلب
واتصل على عمه كبير عايلتهم وبلغه وطلب منه الحضور يوم الاثنين
اخر اتصال كان بابو فراس
اللي رحب وهلى بفياض
:هلا والله بالنسيب
رد فياض بإبتسامة عريضه : تحيا وتدوم
يعني انا اخطب تردوني وامي تخطبي لي تعطونها ؟!؟ هههههه
قال ابو فراس بود
:ههه ههههههه يوم الله اراد يبارك هالخطبه بركتنا ام فياض الله يخليها لك
قال فياض :اميين ..
اقول يا ابو فراس انا رايح لجدك انا لازم اجيه واخذ موافقته وابيك معي
قال ابو فراس : ابشر انا اصلا عنده حياك الله
قال فياض : خلاص ان شاء الله اقل من خمس دقايق وانا عندكم

كان الوقت على نهاية العصر
باقي وقت قليل وتظلم الدنيا
وصل فياض حدود مزرعة الجادل وجدها
واستقبله ابو فراس وكان استقبال حار تبادل في فياض وابو فراس السلام بود وحراره
مسك ابو فراس يد فياض ودخل معه لمجلس جده
وكان الجد ينتظرهم
سلم فياض عليه بإحترام كبير وتقدير
:حياك الله ياولدي
فياض: تحيا وتدوم ياعم
جلسوا
كان فياض يحس بالارتباك
رغم جو الحفاوة والترحيب من الجد وابو فراس
قال فياض بعد ما استجمع نفسه
: ياعم انا جايكم اخطب بنتكم وبعد موافقتكم اللي انعمتواعلي بها
حاب اعرف وش طلباتكم كم تبون مهر وايش هي شروطكم
قال الجد بهدوء : ابيك تعرف اول من بتاخذ انت بتاخذ قطعه من روحي بتاخذ الغاليه عشان كذا ابيك توعدني ما تضيمها ولا تكسرها مهما صار
قال فياض بصدق : ابشر ان شاء الله ماتكون الا مكرمه ومعززه
كمل الجد: اما باالنسبه للمهر اللي تجيبه وشروط مامن شروط الا انك تخاف الله فيها وبس
قال فياض : ان شاء الله وتستاهل اللي يقدرها ويعزها
قال الجد : زين ان شاء الله الاثنين موعدنا تصلي المغرب معنا
قال ابو فراس : على خير ان شاء الله ربي يتمم على خير

*******

في بيت فياض
كانت الجده جالسه على سجادتها تسبح وتهلل
تفاجأت بتركيه ولميا جالسات جنبها
قالت لميا جده انا كأني سمعت انك خطبتي لابوي
قالت ام فياض متفاجأه
:بسم الله من قالك
قالت لميا بغضب : يعني صحيح
قالت تركيه بهدوء
:جده الله يخليك لنا وش هالسالفه لاشاورتونا ولا اخذتوا رأينا
قالت ام فياض وهي تفك شرشف الصلاة : اي نعم خطبت له
قامت لميا على حيلها وقالت بزعل
: ليييه ياجده تخطبين له
قالت ام فياض : بنت قصري صوتك وخطبت له لاني ادري ابوكم محتاج زوجه
قالت تركيه بشرهه :جده انت كذا حطيتنا قدام الامر الواقع وفاجأتينا
قالت ام فياض :بعلمكن بس كنت ابي اضمن موافقة العروس وسكتت تناظر بوجيهن تشوف وش تعابيرهن وقالت
:ترى حتى ابوكن ماعلمته الا بعد ماخطبت وزعل مثلكم
قالت لميا بأمل ضئيل : يعني ابوي رافض يتزوج
قالت ام فياض : لا وافق والعروس بعد وافقت والملكة يوم الاثنين يعني بعد بكره تجهزن وابيكن تباركن لابوكن افرحن له
قالت لميا بصوت عالي
:ابارك له على ايش وبعد تبيني افرح
قالت تركيه بإحباط :طيب قولي لنا من خطبتي له
قالت ام فياض: وحده تحبنها وتحبكن
ألتفت لميا بسرعه على جدتها وبتعبير ساخر : تحبنا اي واضح ومن هي بالله ذي اللي نحبها وتحبنا
قالت ام فياض: خطبت لفياض الجادل
عم الهدوء من المفاجأه وانفتح باب الغرفه بقوة ودخلت فرح مثل الصاروخ : هييييييييه الجادل هي العروس هييييييييييه
تبسمت تركيه وتحولت ابتسامتها لضحكه من القلب هههههههههههه على تعابير وجه لميا اللي انصعقت وتفاجأت بأن الجادل بتكون عروسة ابوها تبدلت المشاعر من سلبيه وهجوميه وغاضبه لمشاعر فرحه ورضا وايجابيه
جلست جنب جدتها وقالت :يختي قولي من اول انها جدوله يا زين ما اخترتي
وحبت خد جدتها بقووووه اي هذا الاختيار الزين
قالت تركيه :صدقتي لموووش ونعم الاختيار
وبدون تفكيير ومن قلب محب فرحان اتصلت لموش بالجادل واول ما ردت الجادل : جدوله حبيبتي مبروووك كللللللللللوووويش والله ما تندمين ترى ابوي عريس لقطه ههههههههه وشفيييك سكتي وين حسك اكيد تهفين على نفسك من الحيا ههههههه
اخذت الجوال تركيه : جدوله حبيبتي مبروك الله يسعدكم
قالت الجادل المتفاجأه بالاتصال وبفرحة البنات اللي غمرتها اللي هزت مشاعرها : حبيباتي
قالت تركيه :والله باركنا لك حتى قبل ابونا تستاهلين كل خير جدوله وفرحتنا ماتنوصف
ردت الجادل بإمتنان كبير لمشاعر البنات
: ياقلبي انتن
اشرت ام فياض لتركيه هاتي اكلمها
واخذت الجوال
: يمه جادل مبروك ألف ألف مبروك
ردت الجادل بحيا وبدموع تتهدد بالنزول
: الله يبارك بتس
قالت ام فياض
:والله يافرحتي هذا كبرها
الله يتمم على خيرر ومبروك مره ثانيه ونجي ان شاء الله يوم الملكه يأحلى عروسه
قالت الجادل : تشرفونا الله يحييكم
انتهت المكالمه ولميا الفرحه ماهي سايعتها ماتدري وش تسوي
فرح استلمت تركيه اسئله يعني جدولة بتعيش معنا طيب وين بتنام ؟؟ ابيها تنام معي بغرفتي طيب متى بتجي ؟ بكره!!
قالت تركيه
: صح جدة متى العرس يعني متى بتكون جدوله معنا
قالت ام فياض :
والله مدري حسب ما يتفقون الرجال
ومدت جوالها خذي اتصلي على فلوه خليني ابلغها الاخبار الحلوة

*******
عند الجادل
كانت مشاعرها متذبذبه تميل للقلق والخوف
هي مقبله على خطوة كبيره بحياتها
كانت متخوفه من ردة فعل البنات بس من بعد مكالمتهن راح جزء كبير من الهم اللي جثم على صدرها
بقي التفكير الاهم
ان هذي الخطوة صارت جديه اكثر وانها فعلا بتتزوج وبيدخل من يقتحم خصوصيتها وعزلتها عن العالم
وقفت قدام المرايه تتأمل نفسها
حاولت تشوف نفسها بنظره جديده
فكت شعرها من ظفيرته
وتخللته بأصابعها
وانساب بطوله ونعومته على متونها
تأملت وجهها الخالي من الزينه
بشره صافيه عيونه لوزيه وحواجب تبارك الله طبيعيه
تحسست خدودها كل هالزين وللاسف ماتشوفه تنظر لنفسها بعيون منتقدينها بعيون من كرهوها ترن كلمه وحده بذهنها شيينه
لمت شعرها بسرعه وبعدم رضى
وابعدت عن المرايه اللي دايم تصدمها بحقيقتها حسب اعتقادها
رن جوالها وكانت ام فراس
وبدون مقدمات
: جادل وش بتلبسين بالملكه
قالت بتأفف :وش بلبس اي شي عادي
قالت فاطمه بعصبيه
: اي شي بعينتس لازم تكشخين انتي عروس
قالت جادل وهي تجلس بإحباط من افكار فاطمه
: يرحم والدينتس فكيني من تهاويلتس
قالت فاطمه : انتي اللي يرحم والدينتس صحصحي معي الرجال لو طلب شوفه بعد الملكه بأيش بتطلعين له
شهقت الجادل بغت تطلع روحها ؛ وش شوفته مافيه لو يحب السما
قالت فاطمه : امنا بالله ماتبين تطلعين له بتطلعين لامه وبناته وانتي شايفه شلون هم ناس كشخه وكاااش لازم تكونين على اخر شياكه واناقه انتي مو اي احد انتي الحين حرم الشيخ فياض
ردت جادل بيأس عارفه ان فاطمه لا يمكن تتركها
: فاطمه وش تبين هالحين
تبسمت فاطمه
: ابي تخاويني للسوق ندور لتس كم غرض عشان الملكه جهزي نفستس الصبح وانتي عندي بياخذنا ابو فراس تم ياقمر
ردت الجادل :امري لله تم
********

وصل فياض وفكره مشغول عدة امور لازم ينجزها قبل الاثنين ضروري
واول ما دخل بيته
تفاجأ ببناته واقفات مع امه
وتعابير الفرح غمرته
كانت لميا اول من حضنت ابوها مبروووك مبرروك ياحلى معرس
تبسم متفاجأ : الله يبارك بك ياقلبي انتي
وبعدها تركيه اللي ماملكت دموعها :مبروك يبه والله فرحت لك تستاهل الجادل وهي تستاهلك لايقين لبعض
حضنها بقوووه : الله يبارك بك ياعيون ابوك
اما فرح حضنت ابوها وقالت :متى بتجيبها عندنا انا احب الجادل مرره
حضنها بقووه وشالها : وانا بعد احبك وبقلبه واحبها
نزل فرح وحضن امه قالت :مبروك حبيبي الله يتمم لكم بخير
جلسوا جميع قال : بناتي حبيباتي مكانكن بالقلب والروح احبكن واحب امكن قبلكن لا تحسبون اني بزواجي من الجادل بنسى رفيقة الروح امكن لكن هذي سنة الحياه
وتحشرج صوته و مسح دموعٍ تلامعت بعيونه
وقال الله يرحمها

*****

يوم الاثنين
كانت الاستعدادات على قدم وساق من الطرفين
اول من وصل للديره اخوان فياض
وعمه وعيال عمه
كلن وصل بسيارته الفخمه اللي لفتت انظار اهل الديره
اتجه الموكب لمزرعة الفياض
وبعد ساعه كان طلال وفلوه اخر الواصلين
فياض احتفل بقدوم اخوانه وعمه وذبح لهم وغداهم
بأجواء حلوة تحت ظل النخل وفي بيت الشعر
كانت الاجواء حلوه
الكل مرتسمه عليه علامات الفرح لفياض
فلووه وصلت ومعها وصايا امها من صناديق الهدايا للعروس
قالت ام فياض : عسى ما نسيتي شي
قالت فلوة :جبت كل اللي قلتيه واكثر
وفتحت شنطتها
وطلعت كيس مجوهرات وفتحت العلبه اللي داخله
كانت عباره عن قلاده ذهب
من النوع الثقيل المشكوكه باللولو
شوفي يمه هذي الهديه اللي طلبتيها
تأملتها ام فياض برضا
: حلوه ماشاء الله تستاهل الجادل
فتحت كيس ثاني
وكان فيه عقد ضخم من الفل يمه جبت هذا اذا بتزينين العلبه مع صينية من الفضه وهذي الصينيه
اخذته ام فياض
:اشوف هاتي هذا حلوو ريحته يالله الجنه
وطلعت فلوه كيس ثاني ومدته لفياض اللي توه دخل عليهم وحب راس امه
: تفضل يا عريس هذا اللي وصيتني عليه
اخذه وفتحه
كان طقم ذهب أبيض فخم جدا جدا
:يمه شرايك
قالت ام فياض بإبتسامه من القلب
:بارك الله حلووو
مرره بيزهى على حبيبتي الجادل
قالت فلووه
:درت عشرين محل يمكن عشان ألقى شي يليق بعروستك
حضنت اخوها
وقالت بتأثر : والله يا اني فرحت لكم انتم الاثنين اخوي وحبيبي والجادل بعد غاليه علي الله يتمم بخير
ضمها اكثر وحب راسها
: الله يخليك لي يا تاج راسي
ناظر بأمه :يمه تكونون جاهزين قبل صلاة المغرب
قالت ام فياض: ابشر حبيبي انت لازم تريح شوي
قال فياض وهو يتفقد جواله
:والله مافيه وقت في شي انتظره اذا وصل او لا
وطلع عنهم
قالت ام فياض :الغرض اللي وصيتك عسى ما نسيتيه يافلوه
قالت فلووه :اكيد يمه كل شي وصيتيني عليه جبته
وفتحت الشنطه ومدت لامها الكيس الفخم وهذي هدية فاطمه اللي طلبتيها
فتحت ام فياض العلبه اللي داخل الكيس وكانت ساعه فخمه مرصعه بالالماس تستاهل ام فراس نشميه وبنت اجواد

*****

:الجادل وش فيتس؟
ردت بوهن
: مدري وش جاني احس اني مريضه
فاطمه تركت اللي بيدها
وقامت تتحسس جبين الجادل : بسم الله وش اللي جاتس
قالت الجادل وهي تقاوم
رغبة بالاستفراغ
: احس اني منغثه وراحت تركض تلحق تستفرغ بالحمام
وقفت فاطمه عند الباب بكوب مويه
اخذته منها الجادل
وتهاوت جالسه عند الباب مافيها حيل
رافعه برقعها عن وجهها
شربت المويه
وهي تمسك بطنها
نزلت لها فاطمه
:جادل حبيبتي وش تحسين
وهي تشوف وجه الجادل اصفر وشفايفها صارت بيضا
قالت الجادل : ما اعرف كل ما افكر ان اليوم ملكتي قلبي يرقع ومعدتي تثور علي
قالت فاطمه : ياقلبي انتي لا تتوترين
قالت الجادل ودموعها بعيونها
غصب عني ما اقدر وانتي تبيني اطلع لهم بشكل ماتعودت عليه ما اقدر
قالت فاطمه وهي تلوم نفسها : اهدي ياقلبي
ورجعت تقول
: وفكرة انه يطلب يشوفني بعد الملكه مسويه لي رعب
ماقدر فاطمه ماقدر
وانهارت تبكي
قالت فاطمه
: بس ياعمري انتي وحضنتها
:انتي بس لو تثقين بكلامي وتشوفين اللي اشوفه والله ياجادل انتس مبهره مو بس جميله ما ينقصتس شي زول وطول وجه حلو واهم شي روح حلوه
قالت الجادل
: تكفين يافاطمه ما ابي اطلع له ولا اشوفه
قالت فاطمه وهي محتاسه وماتدري وش تسوي
: اهدي الحين لا ينتفخ وجهتس وعيونتس تذبل
الرجال مدري عنه بيطلب شوفتس والا لا بس لازم تكونين جاهزه لمثل هذا الطلب بس لتس علي اكلم ام فياض
قالت الجادل برفض
: لااا ام فياض لا
كلمي ابو فراس من راسه لراس فياض
قالت فاطمه :ابشري اكلم ابو فراس ...الحين اهم شي تاكلين
ردت الجادل قالت :مالي فيه ما اقدر
قالت فاطمه :لازم لو كوب عصير
شي يرجع الدم لوجهتس
وقامت تجيب لها شي تاكله
بوهن قامت الجادل
وانسدحت على سريرها
وكل تفكيرها بالليله
"ياترى يقدر ابو فراس يمنع الشوفه اكييد جدي بعد بيرفض
عند هالنقطه
هدت شوي
جدي اللي بيمنع هالشوفه جت عينها على الفساتين
اللي تبيها فاطمه تلبس واحد منها الليله
الاول ما تبيه ما حبت نفسها فيه
والثاني عيبه انه ماسك مره وضيق
الثالث فاطمه ماحبته
بس كان اختيار الجادل فستان ناعم من الحرير باللون السكري
هذا اللي ممكن تلبسه اهون الاختيارات
تمددت تحاول انها تسترخي وتهدأ
الله يجزاها خير فاطمه
جابت شغالتها عشان الجادل تتفرغ لنفسها وليومها المهم

*******
قبل اذان المغرب كان موكب فياض واهله
واقف عند بيت الجد
وكان بإستقبالهم هو وابو فراس
كان ترحيب حار ودافي
واحتفى بهم الجد
وفرح بقدوم فياض وعزوته
وعرف ان فياض
قدرهم يوم جاب عمه واخوانه وعيال عمه
عرف ان هالرجال
يعرف الاصول ويعرف ينزل الرجال منازلهم وقدرهم
وعرف ان بنته بتكون ان شاء الله مع اللي بيقدرها
بعد الصلاه جلسوا في مجلس الجد
ووصل الشيخ اللي بيملك
وتمت الملكة
اللي تولى فيها الجد التوقيع عن الجادل بما انها موافقه
باركوا لفياض ودعوا له بالبركه والذريه الصالحه
بارك ابو فراس لفياض بالاحضان
: مبروك يا اخوي
الغاليه امانتك
قال فياض :بعيوني مايحتاج
جلسوا جنب بعض
تذكر ابو فراس وصاة فاطمه له
وقال : اخوي فياض ادري ان عندكم شوفه وحفله بعد الملكة لكن حنا ماعندنا هالشي وخصوصا جدي مرره مايحب اتمنى انك ما تزعل
تبسم فياض وبقلبه يقول "شفتها وانحفرت بقلبي وعقلي"
وقال : ابد يا اخوي لا تشيل هم انا شاري نسبكم وهالامور ماهي شي اساسي عندنا
قال ابو فراس : ما خيبت نظرتي فيك
كل ماعرفتك اكثر حبيتك اكثر واكثر
انا كسبت اخ لي
قال فياض بإمتنان لكلام
ابو فراس :ماعليك زود وانا بعد كسبت اخ وصديق اعتز جدا فيك
في هالاثناء دخل عليهم فالمجلس
اعمام الجادل وعيال العم
دخولهم كان مثل الهجووم
اول ما شافهم الجد
قام لهم
قال ولده الكبير
خيير وش عندكم
قال الجد
وهو يقرص عينه بعياله واحفاده بنظره مهدده ومتوعده
: حياكم
اقربوا وباركوا لزوج بنتكم و اختكم الجادل

.
.
.


البارت الثالث عشر 

.
.
.

ما لعيني كلما أغمضتُها
لاح في الأجفان طيفٌ من سناكْ
مالذي اصنعه؟! ماحيلتي ؟!
وأنا في كل ماحولي أراكْ

الحمد لله وتم المراد
الجادل لي
بس باقي تكون معي
دخلت عمامها وعيالهم ضيقت لي صدري واقبضت قلبي.
مافاتتني تعابير وملامح الجد
بعد مباركتهم لي
بإختصار
تقبلتها وجلسنا جميع في المجلس وكانت الجلسه تشع بالتوتر
بعد العشا
استأذن عمي واخواني
وانا مشيت معهم
وامي وبناتي عبد الرحمن تولى امر رجعتهم للمزرعه
بعد ما طلعت من المزرعه تنفست براحه

كنت متخوف من العمام وعيال العم يوقفون زواجي بالجادل
ويحجرون عليها
بس الحمد لله انتهت الليله بسلام

******

خلى المكان على الجد وعياله
ناظر بهم : يالله انطق انت واياه وش اللي جابكم اليوم؟؟!!
:زوجتها يايبه ومن دون ماتاخد شورنا ولا تعلمنا
رد الجد بعصبيه :اييه زوجتها ولا لكم شور ولا كلمه وهذا اللي جابكم!؟!!
: بنت عمنا ما تطلع للغريب
فز واقف على حيله الجد
: اقطع واخس . بنت عمكم وينكم عنها كل هالسنين كم مره طلبتكم وصديتوني الحين لاعاد اسمع لكم حس الجادل وزوجتها اللي يسواكم جميع ويالله ضفوا وجيهكم وعيني لاتشوفكم

******
في مجلس الجادل
كانت فاطمه مرره محرجه من الموقف السخيف اللي الجادل حطتها فيه
جت وجلست فاطمه وهي تفرك ايديها بإحراج
تبسمت وقالت :والله ياخالتي ام فياض مدري وش اقول بس الجادل مرررره مستحيه احاول فيها من اليوم انها تجي وتقعد معنا مافي فايده

قالت ام فياض : يابعد عيني بنيتي وينها فيه انا اروح لها بنيتي تستحي ماهي مثل هالبنيات
قالت لميا بضحك: افاااااا يا جده يعني حنا مانستحي
طنشتها ام فياض وقامت : وديني لها
راحت مع فاطمه لغرفة الجادل
قالت فلووه :عز الله راحت علينا وبتاخذ الجو جدولتنا
تركيه : ياحبي لها مستحيه تقابلنا اجل وش بتسوي بيوم الزواج
قالت لميا :بيغمى عليها هههههههههههههه

******

اقدم خطوه وارجع خطوتين
احس رجولي ثقيلة ما تطيعني
او يمكن انا بنفسي امنعها
فكرة اني اطلع للناس بدون برقعي فكررره صعبه عليّ
تعبت معي فاطمه جدا حتى قدرت تخليني ما ألبسه
فاطمة وهي تحط اللمسه الاخيره في مكياجي الناعم والخفيف
: ياهبلا من الحين فكي البرقع وتعودي وراتس عرس ورجال يبي يشوف الوجه المليح
قلت لها: قلبي يرقع حسبي الله على العدو لاتجيبين طاري الرجل ابد خليني باللي انا فيه هالحين
ضحكت فاطمة : هههههههه اجل بيرقع من الحين ليوم العرس
هههههه وهي تشوف وجهي وهو يحمررر وكملت: كل يوم بذكرتس وكل يوم بدربتس لين مررره وحده تنسين البرقع
قمت مفزوعه من الفكره : فطوم حرام عليتس والله اعرف نفسي ما اقدر خلاص هونت ماني بطالعه للناس الا ببرقعي
قالت فاطمه بعصبيه : هو على كيفتس اشوف وسحبت برقعي وشقته نصين كل ما مسكتي برقع بقصه والله وهذاني حلفت
الناس وصلوا ومن اول ينتظرونتس يالعروس
جلست ودموعي تهدد بالنزول وقلت : افهميني فطووم تكفيييين والله ما أقدر اطلع كذا ما أقدر
رحمتها فاطمه وعارفه وش تحس فيه بس لازم توجعها شوي عشان يتم التغييير
طلعت فاطمة وخلال دقايق رجعت ومعها ام فياض
استأذنت ام فياض بكل احترام وادب ورقي
؛يمه الجادل تسمحين لي ادخل
وقفت بسرعه الجادل مذعوره من شوفة ام فياض لها
وبصوت مهزوز متردد وعيون دامعه
:تفضلي خالتي حياتس الله
كانت الجادل تحاول ما تناظر مباشره بام فياض ولا ترفع راسها
قربت ام فياض وهي تذكر الله
منبهره من اللي تشوف
ماشاء الله لاقوة الا بالله
وقربت اكثر وحضنت الجادل بحنان وقالت: ماشاء الله بنيتي مزيونه ياحظك يافياض
هنا الجادل تهاوت كل قوتها وانهارت تبكي
قالت ام فياض بحنان كبيير : بسم الله عليتس
ولمتها بحنان اكبر
وصارت تمسح على شعر الجادل
: ياقلبي قلبتس علامتس بابنتي
قالت فاطمة تمزح
: الله العالم تحسب بنزفها الليلة
قالت ام فياض : ههههه تطمني ياقلبي فياض اتصل ويقول مافيه شوفه اتفق هو واخوتس ووكلني انا ألبستس الشبكه
قالت فاطمه بحماس
: ارتحتي يالله عاد اهدي هذا خالتي ام فياض جابت لتس احلى خبر هههههههه
"الصراحه هالخبر ريحني كثير وتصرف ام فياض وكلامها وهي تتأملني وتمدحني له الاثر الكبير برفع الثقه ولو للحظات
قالت ام فياض لفاطمه : يالله اشوف عدلي مكياج بنيتي خلينا نفرح فيها
ووقفت تشرف علينا
وفاطمه تمسح وتعدل بالخريطه اللي صارت من الدموع
حتى انتهت بنتيجه ترضيها
قالت فاطمة : وخلصنا يالله يا احلى عروسه
قالت ام فياض : ماشاء الله ماشاء الله ألف من ذكره
وتقدمت للجادل ومسكت كفها وطلعت بها والجادل بتموووت من الحيا
وفتحت فاطمة الباب
وقالت :كلللللللوووووويش العروسه وصلت يابنات
قامن البنات وعمتهن منتظرين ومتلهفين دخلت الجادل عليهم
ودخلت الجادل بطلتها الحلوة وام فياض وراها
حضنت كتوفها وصارت تمشيها معها الى ان وسطتها المجلس
قالت ام فياض : تعالن يابنات سلمن واذكرن الله على زينها
اول وحده كانت لميا مبهوره مبهوره جدا بالجادل
سلمت بالحضن على الجادل
:جدوله المزيونه ماشاء الله تهبليين تهبلييبن كنت احسب الزين داخلي طلعتي جامعه الزين من برى وجوى
مبروك ياقلبي انتي
فلوة :اشووف وخري خليني اشوف عروسة اخوي ماشاء الله بارك الرحمن قمر ألف ألف مبروك جدوله
واقبلت تركيه تتأمل جمال الجادل : ماشاء الله كنت اتوقعس مملوحه بس فاجأتينا بالزين مبروك يا احلى جدوله
تمتمت الجادل ترد عليهم من كثر ماهي محرجه صوتها ما يطلع
حضنتها فرح من وسطها ورافعه راسها تتأمل بإعجاب الجادل حضنت فرح لها اكثثر
وناظرت فيها : اشوف وابعدتها شوي تشوف فستان فرح : وش هالفستان الحلو والا الشعر ماشاءالله
وشالت طوق الورد اللي على شعر فرح وعدلته لها
كلهم واقفيين حوالين الجادل ومن احراجها ركزت على فرح تخفي حرجها وحياها منهم
قربت منها فاطمه وبهمس : اييه خليتس كذا تبسمي و سولفي كذا احلى
عطتها نظره الجادل وقالت : لاتذكريني بوضعي الحين خليني لاهيه
قالت فاطمه وبصوت عالي
:لميا وينتس ووين كاميرتس تعالي صوري العروس
وهي ترفع حواجبها للجادل
ما صدقت خبر لميا واخذت صور كثييره للجادل وام فياض ولفلوة وتركيه وفرح حتى فاطمه صورتها مع الجادل
وصورت ام فياض وهي تلبس الجادل شبكة فياض قالت ام فياض للجادل وهذي هديتي انا وحطتها قدام الجادل
وهذي هديتي لفاطمه والله ماهو بحقتس يابنتي
قالت فاطمه : مشكورة ياقلبي ليه كلفتو على انفسكم
انا فرحتي اليوم بالجادل كبيرره يوم الله وفقها وتمم لها وتزوجت
قالت ام فياض والله انتس صادقه فرحتي فرحتين بينتي الجادل وولدي قطعه من قلبي
..

انتهت الليله السعيده على خير
وكلن سرى لبيته
وقعدت الجادل لحالها
بعد ما اصرت على فاطمه ترجع بيتها مع ابو فراس
تمددت على سريرها بتنام او بتحاول تنام
وصلتها رساله على الواتس
فتحتها وكانت من فاطمة
صوره تجمع بين جدها وفياض
صوره ثانيه لفياض وهو يوقع على دفتر الملكة
صوره ثالثه لفياض وهو جالس بثقه ورسميه وبين اصابعه سبحة صفرا بهدب احمر
رمت الجوال من يدها برهبه
وانتبهت على نفسها وضحكت على نفسها هههههه "تراه بصوره ماهو قدامي ورجعت رفعت الجوال واخذت تتأمل هالانسان
حواجب سميكة وعيون سوادا عوارض سودا خفيفه يتخللها بعض الشيب
وابتسامه تشع من عيونه كأنه يقول لها انتي لي
وصلتها رساله من فاطمة : لقيت هذي الصور مع ابو فراس قلت اكيد تحبين تشوفين وتكحلين عيونس قبل لاتنامين عشان تحلمين احلام سعيده ههههههه
بعد دقايق ارسلت :نامي لاتقعدين تمقلين طول الليل ����
ردت الجادل : ترا نمت وانتي اللي ازعجتيني ��
يالله تصبحين على خير
وقفلت جوالها ونامت فعلا

******
نمت ما اشوف من التعب
وقمت والحمد لله مرتاح ومبسوط
رحت لامي ابي اخذ علومها وايش صار البارح
بس لقيتها لابسه عباتها وبتمشي مع فلوة وطلال وبياخذون البنات
قالت لي جاني شغل انا والبنات
قلت :يمه ما جلستي معي
قالت لاحق على خير الحين بنمشي في امان الله
ودعتهم
ورحت اوصل سيارة ابو فراس اللي شريتها له هديه
تفاجأ مني ومن هديتي
ابو فراس : ماله داعي يا اخوي
قلت وانا احط المفتاح بيده
:والله شي بسيط ما يجي عند قدركم وغلاكم انت والعم ابو محمد ( اخيرا عرفنا اسم الجد ^^)
وسيارته توصله ان شاء الله
قال ابو فراس :الله يكثر خيرك جدي دق علي اليوم يبي يسأل متى تبي العرس اذا رحت له اتفق معه على موعد
فياض : ان شاء الله هالحين بروح له دام فيها تحديد موعد
ضحك ابو فراس : ههههه الله يكتب الي فيه خير وخيره لكم ويرزقكم الذريه الصالحه
فياض : آمين
ركب سيارته : فمان الله
واتجه لمزرعته يقيل ويرتاح والعصر يروح لجد الجادل ويتفاهم معه
دخل للبيت وراح لغرفته يرتاح
لقى ظرف من لميا
مكتوب عليه
مبروك يا احلى عريس
هديتي لك
فتح الظرف و شاف اللي ما توقعه ابدا
مجموعة صور لامه وبناته مع الجادل
اكيد هذي هي
امه وهي تلبسها الخاتم
تركيه و فرح والجادل بينهم
فلوة ولميا والجادل بينهم
واخر صورة كانت
للجادل
كأنها تناظره عين بعين
آه ياقلبي
وش سويتي فيني يا لميا
انسدح ورفع لصوره يتأملها
بياض بشرتها مع سواد شعرها وعيونهها
الله يصبرني بس
.
.
.
العصر في مجلس الجد ابو محمد
مواعد فياض اللي بيجيه عشان يحددون العرس والجادل عنده تقهويه وناسي يعطي الجادل خبر
وصل فياض
وبصوته الجهوري ينادي ياعم ابو محمد
.. يرد الجد عليه حياك هنا ياولدي
الجادل تفز واقفه وهي تغطي وجهها بجلالها وتضفيه عليها ،الجد وهو يقوم على حيله ويشدها من جلالها اقعدي يابنتي ماهنا غريب هذا رجالتس
الجادل بإرتباك :خلني ادخل ياجدي الله يرضى عليك
..وقتها اقبل عليهم فياض وامتلا المكان بحضوره ..
سلّم وهو متفاجئ بالحرمه الواقفه
رد الجد السلام وهو يقول :
حيا الله ولدي اللي اخذ بنتي وهو يحط يده على ظهر الجادل ويقولها
:اقعدي يابنتي قهويني وقهوي رجالتس
انفردت اسارير فياض وبانت عليه الفرحه بشوفتها بهالسرعه وبهالقرب
الجادل قلبها بغى يوقف من طلب الجد وتحس غرقت من عرق الاحراج
امتثلت لامر جدها وهي ماتشوف من جلالها تحاول تقهويهم ..
احرجها جدها وهو يقول :ارفعي غطاتس عن وجهتس يابنتي وقهوينا ..
ودها الارض تنشق وتبلعها جدي اليوم شفيه
وبتردد رفعت الجادل جلالها عن برقعها
فياض بكل حواسه يترقب طلة وجهها تفاجأ انها بالبرقع اتسعت ابتسامة السعاده على وجهه وهو يقول بنفسه
"ياويل حالي زينه ببرقع او بدون انا مفتون ومتولع ..
اه ياقلبي سبحان الله كيف عشقتها بالحالتين كني تولعت بحرمتين فتنه بالبرقع ..
وجمال وحسن وبراءه بدونه
والله ان امي تدعيلي من قلب
الله يحفظتس لي يا ام فياض"
فياض تنبه على صوت جدها وهو يناديه
:سم ياعمي آمر
الجد بإبتسامه :ما يامر عليك عدو ياولدي اقول تقهوى !!
خذ فنجالك من بنتي
فياض وهو توه ينتبه ليدها وهي ماده عليه الفنجال ..
تمالك نفسه بسرعه وهو يتناول الفنجال من يدها ببطئ وهو يتقصد يمسك اصابعها ..احرجها ..
وكمل عليها الجد وهو يقول له
وهو يضحك ويقرص عينه فيه وهو يشرب فنجاله
:طارت عويناتك ببنتي وانت ما شفتها كيف لو كحلتهن بطلتها الصبوح!!
وضحك :
هههههه لاحق خير ياولدي يقولها وهو يكمل ضحكه
ويمد فنجاله للجادل
رد فياض بحرج :الله يحفظها ياعمي ويخليها لنا وهو يناظر الجادل
سكت شوي وهو يشوفها منزله راسها محرجه واضح من فركها ليدينها
قال فياض
:ياعم بشاورك بموعد العرس
وش رايك الاسبوع الجاي مثل هاليوم يناسبكم؟؟
الجد ماقدر يمسك ابتسامته لا توسع وقاله :ما لقيت اقرب من هالموعد ياولدي!!!
رد فياض :انا حاضر باللي تبون ياعم
قال الجد :ياولدي امر الله من سعه العرس يبي له تحضير وعندنا ربعنا وجماعتنا بعد يبون يجهزون ابشوف ربعي وارد لك الليله والا بكره
الجد وهو يناظر على الجادل اللي مدنقه وهي ذابحها الحيا والاحراج حب يلاطفها
وهو يقول :ها يالجادل متى تبون العرس !!!
الجادل شرقت من الصدمه وهي ترفع عينها لجدها
وقامت تكح وتكح بقوه..
قام فياض بسرعه وهو مايضيّع فرصه انه يقرب منها يطبطب على ظهرها
وهو يناولها الماء ويتبسم للجد ويقول :خف على حرمتي ياعم ابو محمد شوي شوي عليها تراني ابيها
طارت عيون الجادل فيه وهي كلها دموع!!!
وقامت من عندهم بتموت من الاحراج كل هذا صار قدام جدي يافضحي فضحاااه


.
.
.

البارت الرابع عشر 

.
.


هلا باللي تمنيته سنين وشافته عيني
انا شفتك حقيقه حلم هوجاس وسهر واحلام
كثير اجمل من اللي شفت وتخيلت بسنيني
كثير احلى من الواقع كثير اجمل من الالهام
انا جرحي حملته لك ، دخيلك بس داويني
ونسيني عنى شوقي وهمي ولوعة الايام
انا ظامي وتدري زين وش اللي منك يرويني
ابغرق في نهر قربك من اطراف القدم للهام
لمحتك قلت ماشالله ياشيخ المزايين
على روس العذارى تاج
وفي وسط الكلام انغام .. حسدت بشوفتك عيني
حسدت بلمسك ايديني .. ومن زيني ولو اني حاسدن نفسي
ترى مانلام .. خطفت من القمر نوره ، وصرتي دوم تضويني
ولا غيرك يهز القلب ولاغيرك بحضنه نام .. انا احبك
وانا مدري .. تبيني او تحبيني .. وكاد اني احبك حيل
وتموت بوصفك الاقلام

.
.

بعد ما ودع الجد ابو محمد نسيبه فياض اللي شافه كيف انبسط من شوفته للجادل (مسكين ابو محمد مايدري ان فياض حاصله من قبل اكثر بكثير من الشوفه)
تطمن بقرارة نفسه وارتاح باله انه مافرط ببنته للغريب لأنه توسم بفياض كل خير
حتى من قبل لا يتقدم لبنته

راح لبنته يشاورها..
دق الباب عليها،
شوي وفتحت له
انصدم الجد وهو يشوف عيونها الحمرا
:انا ابو محمد علامتس يابنتي!! وراتس ؟ ليه تبكين
الجادل بنفسها:
لا حول وش اقولك ياجدي اقول انك احرجتني قدام الرجال وفشلتني
والا وش اقول
الجد:يابنتي وش فيتس ليه ماتردين علي!
الجادل:ياجدي الله يرضى لي عليك
احرجتني مره قدام الرجال ..
ليه ماعلمتني انه بيجيك
كان فكيتني من هالموقف
اللي مدري وشلون قايل

ابتسم لهاالجد بحنان كبير ابتسامتها اللي تحبها منه ومسك يدها يسحبها معه
ومشى لبرى غرفتها يبي يطلعها من جوها
وقال:يابنتي لا تشرهين على جدتس ..تراني ما ابي الا مصلحتس وادور لتس الخير وان كان زعلتي علي عشان اللي صار اليوم انا بقولتس
اني ما ارتحت ولا تطمنت عليتس من ماتوا اهلتس
الا اليوم
يابنتي انا لي نظره بحكم سني وخبرتي بالرياجيل ونظرتي ماتخيب بإذن الله ..
وانا قدام ربي ثم قدامتس اقولتس انتي ان شاء الله بإيدين امينه اول وتالي
وهذا من فضل الله عليتس
لأنتس بنت حلال مرضيه ربتس ثم جدتس
والله عوضتس بالرجال اللي بيغنيتس عن الدنيا كلها
تهدج صوته وبكي من تأثره وفرحته بإحساس انه ادى الامانه بهاليتيمه
الجادل نست كل شي من خوفها عليه ماعمرها شافته يبكي
والا متأثر لذي الدرجه
:اذكر الله ياجدي
الجد:لا اله الا الله يابنتي انا بكيت من فرحتى فيتس
وقال لها وهو يبتسم لها:
اما اللي صار اليوم وانتس انحرجتي منه
فيا بنيتي اي شي مايغضب الله ولا يخالف العرف ماعليه منقود
وقال وهو يضحك لها ويطبطب عليها :ابيتس تعودين عليه ويتعود عليتس ..ماهو احسن يابنتي !؟
وقالها وهو يغمز لها ،
:اقعدي يابنتي وقولي لي متى تجهزين وكم يكفيتس
ولا تقولين احرجتني انا اقدر اردللرجال على طول بس عشان تعرفين انتس
اللي يهمني رايها وامرها .
قالت الجادل وهي متأثره مرره من حنان جدها ومحبته اللي بانت بوضوح لها الفتره الاخيره مع انها ماشكت طول حياتها بمحبته:الله يخليك ويطول بعمرك ياجدي
والله الموضوع غير انه محرج لي هو جديد علي
وما اعرف فيه شي
فانا ابي اوكل ام فراس وابو فراس هم اللي يردون نيابه عني والله لا يخليني منكم جميع قالته وهي تحب راسه ويده

*******
اسبوع مراثوني بالنسبه لام فياض والبنات
كانت ام فياض تسابق الزمن
تبي تغير غرفة فياض وتبي تجهزها كانت تبي تهيئ المكان لبنتها الجادل
والبنات معها في كل احساس وخطوة
غير تجهيز فساتين العرس
وفياض معاهم على اتصال ويروح ويجي عليهم
وفمره كان حوار خاص بينه وبين
بنته حبيبته اللي اهدته احلى واغلى هدية لمياء
اخذت الموضوع بضحك : هااا فياض يا حبيبي تسيف شفت عروستك؟؟
ضحك فياض: والله يا يمه زين ما اخترتي
ورفعت حاجبها بنظره متفحصه
: اقول اسمع وانا امك مو تنسانا لا شفت عروستك
قال: انتن الاساس يا حبيباتي
وضمها لحضنه بحنان جم

*****

بعد يومين
فاطمه وهي بغرفة الجادل
:ترى اخينا بالله حط المهر بحسابتس ماشاء الله ياجادل صرتي من كبار المستثمرين
ياخوفي بكره تشوفين حالتس علي وتقول من فطوم هذي
ما اذكرها هههههههه
وهي تضم الجادل وتقول :ياختي افرديها اضحكي وانبسطي ووسعي صدرتس
الله يوسعها عليتس
الجادل وهي تبكي
: والله يافاطمه اني باموت ياختي ماني قادره انسى كلامهن البارح

الجادل وهي تتذكر
وش صارلها امس
كانت لاهيه تفكر بمستقبلها والتغييرات اللي صارت
لها فجأه وقلبت حياتها .
مادرت الا الحريم اللي داخلات عليها
وهن بعيونهن الشر قالت كبيرتهن :انتي وش سالفتس مع الغريب جا يتقدملتس من بين كل اقاربه وقبيلته وبنات الديره
كلهن مالقى الا انتي !!!!!
اكيد ان فيه سر والا شي صاير اللي خلاه يسوي اللي سواه قولي انطقي.
كملت الثانيه :واضحه وضوح الشمس لا تحسبين عشان ماعندتس الا هالشايب وتارك لتس الحبل على الغارب تلعبين يمين وشمال على كيفتس لا ياحبيبتي صحصحي انتي وارتس اهل ولهم بنات وسمعتهم تهمهم
وبنظرات حقوده ونبرة صوت مثل السم :
ردي انتي وش مسويه؟؟ ويستلمنها وحده ورى الثانيه وهي منبهته بينهن ..
الين قالت وحده هو:
شايف وجهتس اللي ماحلاه ربي تراه ضعيف مايدري ان البرقع يزين حتى العنز والا تلقينه شايف زولتس وانتي اكيد ترززتي عنده بمكان خلاه مايشوف الدرب،
جاهن الرد من وراهن
:لا والله عشانها مرضيتن ربها عشانها مرضيتن جدها عشانها بنت حلال وعمرها ماضرت احد عشان نيتها الصافيه عشان حبها الخير للناس عشان صبرها عليكم طول هالسنين عشان نصيبها الزين
وبصوت حاد وقووي ونظره تهز
انتوا ماتخافون الله في هاليتيمه لاخيركم ولا كفاية شركم اعوذ بالله منكم الله يجعل ماسويتو وتسوون فيها بحظ بناتكم وعيالكم يالله الله ياخذ بحقها السنين اللي فاتت منكم ..
تعالت اصواتهن :
استغفري ربتس ياللي ماتخافينه ..
فاطمه:انا اللي ماخافه والا انتوا وبعدين انتوا خايفين من دعوتي وش دراكم انها ماتدعي عليكم طول هالسنين ..
الحريم كلهن بحركه وحده ألتفتن للجادل وهن مصدومات ماعمر خطر على بالهن انها ممكن تدعي عليهم وانها ممكن تكون مستوجعه او حاقده عليهم لهالدرجه
..
الكلام كان مر وعلقم ومثل الخناجرالمسمومه على الجادل من كبر التهايم ماقدرت ترد ابهتنها
راحت تركض لغرفتها وهي منهاره
والحريم طلعن وهن ساكتات بعد الحجر اللي لقمتهم اياه فاطمة بردها عليهن
******

بعد ثلاثة اسابيع

فياض وهو واخوانه منشغلين بالاشراف على بناء
خيام العرس بموقع قريب
من بيت الجد ابو محمد
والشغل على قدم وساق
بنفس اليوم
مر نسيبه الجديد ولقى ابو فراس عنده

فياض ناقصكم شي ياعم ترى لا يردك الا لسانك
الجد:جعلك سالم ياولدي لا بالله ماقصرت وعلمك غانم كل شي على متمه الله يبارك لك ياولدي وتراك تكلفت واجد
.فياض يرد باحترام وموده:لا والله ماهو قدركم ياعمي
الجد وابوفراس بصوت واحد :الله يكبر قدرك ويزيدك من خيره
فياض تنحنح:حياكم يالربع من بكره على الغداء والعشا بالخيام وانتم تراكم اللي تعزمون وحنا ضيفانكم ونتشرف لا يقعد احد من الاهل والربع الصغير قبل الكبير

*********
بعد كذا يوم
فياض قاعد مع امه في غرفتها وانظمت لهم فلوه
ام فياض:والله ياولدي ان ربك يحبك يوم خلى الجادل من نصيبك سبحان الله كانت خيره ويوم مبارك اللي تعينت تركيه عندهم هههههه تذكر يوم انك زعلان وكنت تبيها ماتوظف وزعلت اكثر يوم تعينت بقريه بعيده عنا وحاولت تقنعها اكثر من مره انها ترفض حتى انك عرضت عليها تعطيها شهرياً دبل الراتب اللي بيجيها بس ربك اذا حب عبده يسر له الاسباب..
فياض هز راسه موافق :
اللي حمسني للزواج من هالبنيه محبتس انتي والبنات وفلوه لها وحماسكم يوم تجيبون طاريها بكل سالفه اول كنت اقول الله يرحم حالهن من اجتماعات ومناسبات بأشكال وألوان الحريم وطبقاتهن وثقافاتهن لمجتمع محدود اكيد ولابد تتأقلمن معاه لأنه الخيار الوحيد وكنت متأكد انه بيخف حماسكم مع الوقت بس اللي شفته وصدمني انه زاد وصار ملحوظ ولو ما اعرفكن زين كان قلت يجاملن
ههههههه..
فلوه ضحكت من قلبها: لا والله انت اللي لو ما اعرفك كان قلت شايفها ومتمقل فيها زين زين قبل لا تخطبها لك امي حتى !! والله ياحماسك وفرحتك فرحة اللي بيقابل حبيبته..
انصدم فياض من اخته ومن نفسه لهالدرجه انا صرت مفضوح بمشاعري !!
تنحنح وهو يحاول يغطي شعور الحرج
:والله ما مفضوح الا انت ورجالتس نعنبوا بليسكم
سووا شوي كنترول على انفسكم !!حتى ولدكم صار كنه ولد الجيران
قاعد الضعيف يلف علينا
يدور الحنان وامه وابوه غارقين بالعسل ..
نجح فياض يقلب على اخته الطاوله لجمها ما قدرت ترد..
فياض يبتسم على منظرها
حب يغير الموضوع قال وهو يحك راسه :يمه وش رايتس وين اسافر انا والعروس والله محتار ؟
ردت امه:ياولدي ترفق ماهو الحين ..
البنيه ياولدي حياويه بزياده وانت بتاخذها من بيتها
ومن جدها اللي ماعرفت غيرهم
وتصدمها وتغير عليها كل شي بيوم وليله مايصير !!
انا اقول خلها بعدين
يامالك من السفرات ان شاء الله
وانا والله اني اشوفها مثل بنتن لي
مثل ماتمنى لبنتي بسوي لها
انا اشوف انا الرجال يخطي كثير يومه يلقط عروسته
ويسافر بها على طول ..
البنيه مابعد تعودت عليه وهو طاير بها
اجل لا يشره عليها اذا تعب معها
..اقعدوا بجناحك وخلها تعرف على اهلك وعايلتك كلها
وتتعود عليك وتعرفك
وشوي شوي لين تحس انها ببيتها ياولدي البنت يتيمه
وما كان عندها ام
وابتسمت وهي تذكر الجادل البنت اكيد بتستحي منك
ولو تموت ما طلبتك شي
خلها بيينا على الاقل
تقولي اذا تبي حاجه والا مشوره

قال فياض خلاص تم يا ام فياض بمشي على رايتس الله لايخليني منتس .
*************
ليلة الزواج

تقرر الزواج بالنسبه للحريم في قاعة افراح القريه واما الرجال فكانوا في المخيم اللي سواه فياض

بالنسبه للجادل
كانت فاطمة مجهزه لها كل شي ومن البارح راحت اغراضها وشنطها لبيت فياض في مزرعته
قررت فاطمة ان الجادل ما تنزف وكان هذا قرار مشترك بينها وبين ام فياض
الا ان فاطمه لها موال براسها وبتغنيه
ارسلت رساله لحريم الاعمام وبناتهم وحريم عيالهم ان زفة الجادل بتكون من بيتها وضروري وقفتهم معها قدام الناس مهما كان
وهي عارفهم ومتأكده انهم بيجوون ويتطمشون ويتشمتون
فاطمة جهزت كوشة ناعمه وزينه للغرفه وجابت مصوره كله لعيون الجادل
طبعا تعبت مع الجادل كثثير عشان تكسر خجلها وعدم ثقتها بنفسها ولا علمتها ان بيكون في حضور غير ام فياض وبناته
كانت الجادل بأبهى منظر بفستان ابيض انييق جدا وتسريحه ناعمه ومكياج هادي مركز على ابراز جمال عيونها
وطرحه ملكيه تكمل طلتها البهيييه
قالت :فطوووم تكفيين هذي انا
كانت ردة فعل الجادل على شكلها انها متفاجأه
تناظر بنفسها بإعجااب
وتتأمل زولها وتسريحة شعرها
اكثر شي كان عاجبها عيونها
ضحكت فطوم: لا انا.. اكييد انتي ماشاء الله الكوافيره طلعت فنانه ماهو خساره اللي دفعناه
ووقفتها وقالت : يالله ياقلبي الحين بندخل المجلس ام فياض والبنات ينتظرونتس
وبهدووء وثقه تهادت مع فاطمه وثوبها الابيض بذيله البسيط وراها الى ان فتحت فلووة الباب وزغرطت كلللللللووووويييش
:ماشاء الله ماشاء الله
وشغلو الدي جي على زفة
ودخلت الجادل
بأبهتها وجمالها واناقتها
وابهرت كل الحاضرين من محبين وحاقدين
ناظرت بالعيون اللي استقبلتها وكانت
ام فياض اول من حضنها وبارك لها
ومسكت يدها وجلستها على الكوشه
قالت ام فياض : اذكرن الله ياحريم ماشاء الله
الجادل ارتبكت للحظات وتوترت من وجود حريم عمانها وبناتهم
لكن من شافت ذهولهم ونظراتهم عرفت انها صدمتهم صدمة حياتهم
قربت منها فطوم وقالت : جدوله تهقين لو ارفع براقعهن ألقى افواهن مفتوحه
ضحكت الجادل بنعومه
وقالت: خلتس منهن وقول لي وين فرووسي لازم اصور معه
قالت فطووم وهي تغمز للجادل : ايييه اضحكي واحمسي كبود الحاقدين وفروس هالحين اجيبه ارزه معتس بكل صوره
كان لسان حال حريم الاعمام وين الجادل؟ هذي منهي وشلون كذا متى صارت كذا وش هالعز اللي مقبله عليه
طقمها اللي هي لابستها بالشي الفلاني اهل العريس يتمخترون بالذهب والالماسات

******

عند فياض كان زواج وحفل فخم حضور اصدقاء وجماعة فياض واهل الديره واميرها ما بقى احد كلن وده يحضر هالمناسبه ويجامل فياض ويتعرف عليه
كان حفل حافل بالشعار واصطفوا فريقين وعرضوا ورقص الجد ابو محمد وابو فراس واكيد العريس فياض
ومن بعد العشا قال الجد ابو محمد يالله ياولدي نسلمك عروسك
وركبوا سيارتهم واتجهوا لبيت العرس
دق ابو فراس على فاطمة
جهزي الجادل بندخل مع العريس
قالت فاطمة: ابشر كم بيننا وبينكم
قال ابو فراس :خلاص دقيقتين خلي الحريم يتغطن
ووقفت السيارات اللي فيها ابو محمد وابو فراس وفياض واخوانه وعبد الرحمن
وقفوا الشباب واطلقوا بالرشاشات فرحه بفياض
ووالجد بعد دخل البيت ورفع مسدسه واطلق بالهوا
تعبير منه لفرحتة بالجادل وزوجها
سمعن الحريم اطلاق النار
بعد ما تغطن
الجادل ذابت عظامها خلاص من الحيااااااااا
وبدت تتجمع دموعها انتبهت لها تركيه
:جدوله حبيبتي بسم الله عليك
وناولتها منديل : انتبهي تدمعين يخرب كل شي
تناولت يدها ومسكت فيها بقوه تكفييين خليتس لا تبعدين
ودخل الجد ببشته البني وشماغه الاحمر وابتسامته من قلبه
وابو فراس وقف على مدخل المجلس وقدم فياض تفضل :ياعريس
ودخل فياض بهيبته وطوله
ببشته الاسود وغترته البيضا
رزه وفخامه
وتقدم لداخل المكان واول مادخل اختفى كل شي وتلاشى الا البهيه عروسه
اللي من اول نظره لها شاف ارتعاشها
وتقدم الجد للجادل وهو يذكر الله عليها
اقتربت فاطمة من الجادل وسندتها بوقفتها
حضنها جدها وحب راسها
وهي ضمته وبدت تهل دموعها :مبروك يابنتي مبروك الله يوفقتس وتهدج صوته الله يجمع بينكم بخير
وألتفت على فياض اللي كان واقف وراه ينتظر بصبر بعد ما سلم على امه
اخذ الجد يد الجادل وحطها بيد فياض
وقال :بنتي امانة عندك وانا عارف انك قد الامانه
قال فياض وهو يضم بيده الدافيه يد الجادل المتجمده :بعيوني بنتك ياعم
الجادل تحاول تتملص من مسكة فياض بس على ميين فياض ما صدق
قرب منها وهمس لها :بالمبارك عليتس انا
طبعا الجادل صاده بحيا ومبعده لولا يدها اللي بيد فياض كان هربت
قرب ابو فراس مبتسم و قال :فك يد اختي ببارك لها
وارتمت الجادل بحضنه
وهو ضمها بحنان : مبروك ياقلب اخوتس الله يوفقتس ويجمع بينكم بخير
وهي تهل دموعها وعجزت عن الرد
حب راسها وقال : شوفي انا ما بوصي فياض عليتس لانه ان شاء الله مابيقصر بس بوصيتس عليه تراه اجودي ورجال ينحط على يمناتس الله الله انتبهوا على انفسكم وراعوا بعض الله يسعدكم وتأكدي يا ختي متى ما بغيتيني بس دقي علي وتلقيني تحت امرتس
قال فياض : ياخي لا تشيش مرتي علي
قال ابو فراس بضحكة : ما تنلام عريس ماني برادن عليك
ناظر الجد بأبو فراس واشر له يالله خل الرجال مع اهله واستأذنوا وطلعووا
حضنت ام فياض ولدها مره ثانيه وحضنت الجادل
وباركت لهم ودموعها على خدودها
قال فياض :هذا انتي يمه فرحانه زعلانه لازم دموعتس هذي ومسحها لها بحب وحنان
واقبلت فلوة وبناته وسلمن على ابوهن وباركن له
واشتغل الدي جي ورقصن بفرح لابوهن وهو واقف يصفق لهن
وكانت الجادل جالسه وجنبها فاطمة تمسح دموعها بحذر
وهي تهمس للجادل
:الحمد لله الكوافيرا طلعت ذكيه ومكياجتس ضد الدموع
قالت الجادل ؛فطوم تكفين احس قلبي بيوقف
قالت فطوم :بسم الله عليتس بس ترى عادي انا بعد يوم زواجي حسيت نفس الشي لاتخافين
قال فياض لامه :يمة بنمشي انا والجادل عطوها عباتها
تمسكت اكثثر بعباة فاطمة قالت ام فياض :فاطمة بنتي جيبي عباة الجادل
قالت :ابشري وهي يالله تفك نفسها من قبضة الجادل
وبسرعه راحت جابت عباتها ولبستها
ضمتها الجادل وهي تشاهم
قالت فاطمة : جدوله حبيبتي تعوذي من الشيطان
قربت منهم لميا وناولتها موية بأمر من فياض اللي منتبه للجادل وبكاها وصوت شهقاتها قطعت قلبه
قالت ام فياض فياض خذ بيد عروستك يالله
الله يحفظكم
واخذت يدالجادل وناولتها للفياض
وحضنت كتفها وتمشي معهم الى ان ركبتها السياره بجنب فياض بالمقعد الامامي
وقالت :يبه فياض
حنا الليله بنسري لبيتنا وانتوا خذوا راحتكم وننتظركم ان شاء الله بعد يومين
قال : ان شاء الله يحفظكم
وقفلت الباب على الجادل
وعم الهدووووء
كانت الجادل تسمع نبضات قلبها من كثر التوتر اللي تحس فيها
شغل فياض السياره واتجه لمزرعته اللي تزينت بعقود الاضواء
ترك الجادل تهدا بنفسها وركز على الطريق
الى ان توقفت سيارته قدام باب بيته
فتح لمبة السيارة
وألتفت على الجادل
وأخذ كفها الناعم المزين بنقوش ناعمة على اطراف الاصابع وباسه بخفه
وقال : نورتي دنيياي
ارتفع نبض الجادل
واتخذت من تصرفه معها
اخذ يمسح بخفه على كفها : ماشاء الله وش هالزين
ولثم اطراف اصابعها
سحبت يدها ومسكتها بكفها الثاني بتسيطر على رجفتها
تبسم
وقال وهو يفتح بابه :يالله تحي الجادل
ونزل واتجه لبابها وفتحه ومسك كفينها وسحبها بخفه ورقه الى ان نزلت
وتوجه معها لداخل البيت
وتفاجأت بالمنظر
اناره صغييره مع عقود الفل الابيض تغطي الجدران بطريقه حلوة وناعمه
مع طاولة صغيرة مجهزه بعشا خفيف
وقف فياض وقال: بناتي يحبنتس
طبعا ماكا ن فيه رد
كمل كلامه :كل هذا من تجهيزهن من الصبح وهن مدهرات
وألتفت عليها وشافها بعباتها وغطاها
قرب منها وهي ابعدت خطوة للورا
حضنها بيده اليسار وباليمين رفع غطاها
وقال :خلاص هذا ماله داعي بيننا
انتي الحين حلالي
انتفضت الجادل من دفا يده
ونظرته
تركها بخفه وما ابعد عنها رفع وجهها له بأطراف اصابعه وقال:نزلي عباتس وتعالي نصلي ركعتين مع بعض
قالت : ابي اتوضا وين الحمام
تبسم وقال:اخيرا سمعت صوتتس
باس راسها :تعالي معي
واتجه معها مع لغرفة النوم وفتح لها الحمام وقال :انتظرتس لا تأخرين علي
كانت فاطمه متفقه مع فلوة تجهز للجادل لبس تحطه لها بالحمام
وشرشف صلاة وسجاده على السرير
دخلت وقفلت على نفسها وتنفست براحه
اول شي سوته نزلت عباتها ونزلت فستانها وفكت طرحتها وفكت نص التسريحه صار شعرها مغطي كتوفها بطريقه مرتبه مثل ما علمتها الكوافيرا
لبست جلابيه بيضا فخمه وتوضت وبتردد طلعت متوقعه ينتظرها بالغرفه لكن كانت الغرفه فاضيه
ارتاحت شوي وهدت اخذت من عطوراتها اللي على التسريحه ورشت شعرها وشرشف الصلاه ولبسته
واختنقت من ثقل العطر
وكحت بقووه
دخل فياض بسرعه
:بسم الله عليتس وش فييه
كحت كحت الى ان هدت شوي وقالت بحيا: كتمني العطر
وهي تقاوم تكح قدامه
وقف يتأملها كانت فتنه ونطقت عيونه بإعجابه
قالت بصوت خفيض تتفادى نظرته : نصلي
قال : يااله تعالي للصالة
لبست شرشف الصلاة وشالت سجادتها لحقته وصلت خلفه ودعى وأمنت على ان الله يكتب لهم التوفيق والسعادة





.
.



البارت الخامس عشر 

.
.



وأجهلُ حين أكونُ بحضرة عينيك ماذا أُريد وما لا أريدْ.
‏ولم يكُن الحبّ شيئاً جديداً عليَّ
‏ولكنَّ حبَّكِ كان الجديدْ

.
.

بنعاس وكسل بعد نومه هنيه
فتحت عيونها
تفاجأت بعيون فياض وابتسامته
وبوسته على خدها برقه: صباح الخير يالكسلانه
غطت وجهها خجلانه منه
اعتدل فياض بجلسته جنبها على السرير وقال : ياحول الله رجعت تدس وجهها عني
حبيبتي
وبرقه رفع كفها عن وجهها
وابتسم بخبث : بيننا اتفاق
والا نسيتيه !!!!
فزت الجادل واعتدلت
بجلستها على السرير وضمت اللحاف لها
: لا خلاص
قالتها بصوت ناعس
ورفعت يدها ترفع غرتها الطويله اللي انسدلت بنعومه على وجهها

ضحك فياض على ردة فعلها
: بوستي وباخذها محد قالتس تدسين وجهتس عني
نطت الجادل من السرير بسرعه
وقالت : بدخل اتوضأ واصلي الضحى
وهربت بسرعه
ضحك فياض بقووووه ووقف على باب الحمام
وقال
:امي اتصلت تنتظرنا على الغدا
تجهزي بسرعه بنسلم على جدتس وبنمشي
ردت عليه : طيب

*******
على صلاة العصر كان فياض والجادل واصلين
وكانت ام فياض والبنات وزوجة ابوه بإستقبالهم الفرحة بعيونهم مشاعرهم صادقه
كانت الجادل مررره خجوله لان هذا الوضع لازال ثقيل عليها انها تستغني عن برقعها لكن بمسانده من فاطمه ودعمها النفسي ونظرات فياض اللي تعبر عن اعجابه الشديد وتعبيره لها بأكثر من مره خلال الايام القليلة اللي مضت رفعت ثقتها بنفسها
لكن اكثثر ما اثر عليها هو سماعها لكلام بنات عمها وهن يباركن لها والانبهار بملامحهن والله يالجادل طلعت مزيونه
اثرتس ملكة جمال وداستن نفستس بالبرقع لا انتي اجملنا واطيبنا
واليوم مع استقبال ام فياض والبنات وترحيبهم الدافي
شوي شوي ظهرت ثقتها بنفسها

بعد الغدا

فياض جته مكالمه وقام يكلم بمكان ثاني عن رجة بناته
وتنفست براحه الجادل
قالت لها تركية وهي تقلدها : هييييه خذي راحتس ياقلبي
وضحكت هي ولميا اللي مراقبات الوضع
تبسمت الجادل وتراخت : من العرس وانا رازه نفسي
خلني اتنفس شوي
فكنها ضحك
قالت لميا :لايكون بعد طول الوقت ماتاكلين
على الغدا لاحظتك مررررره ما اكلتي
قالت تركية : يالله فرررصه قبل لايرجع اغرف لك
تبسمت الجادل وقالت : كأنكن تشوفني ذبحني الجوع هههههه والله استحي اكل قدامه
انتبهت لهن ام فياض : وش يضحكن ضحكوني معاكم
ترجتهن الجادل بنظراتها لا تقولن شي
قالت لميا : ابد ياجده قاعدين ننكت
قالت ام فياض : الله يجعل الضحكة ماتفارقكن يابناتي
قالن : اميين ياجده
رجع فياض وجلس جنب امه وحضن كتفها وحب يدها وراسها
وقال: مشتاق لتس يمه
بشريني عن صحتس
قالت ام فياض وهي تحب يده
بخير الحمد لله دامك انت مبسوط وبخير
ورفع نظرته للجادل اللي جالسه مقابله وتركيه عن يمينها ولميا عن يسارها
قال: وين فروحه ما شفتها
سلمت علي وراحت
قالت لميا :فرح ماهي فاضيه مرابطه عند بيت عمي
تراقب النونو الجديد
والله اروح اجرها بالليل جرعشان تنام
ماتبي تطلع من عندهم
قالت ام فياض وهي ترفع ايدينها بالدعا
:يارب ياحبيبي ترزق ولدي فياض بتركي واخوان له
وتلقى فرح من تلاعبه وتستانس عليه
قال فياض :آمييين من كل قلبه وعيونه على الجادل
اللي تشاغلت برفع غرتها ومنها تخبي وجهها عنه ولو لثواني
قالت تركية تسأل جدتها : بكرة ان شاء الله بيكون عشا الجادل
قالت الجدة: اي بإذن الله
شوفن الجادل وش تحتاج كونفيره مدري كفيرا
بكره كل حبايبي ومعارفي عزمتهم
قالت تركيه : ان شاء الله ها جدوله تروحين معنا السوق لاني انا ولموش بنروح مع عمتي فلوة نكمل اللي ناقصنا
قال فياض : اذا الجادل تبي السوق انا اوديها
قالت الجادل :شكرا ياقلبي موجهه الكلام لتركية
قامن لموش وتركيه يتجهزن عشان السوق وبقت الجادل مع فياض وامه
رن جوالها بنغمة رساله وكانت من فياض
�� وانا
ردت برساله
وانت ايش ؟؟
رجع ارسل
��متى تقولين لي ياقلبي
قرأتها وتلووون وجهها
وما ردت
رجع ارسل
الله يحنن علينا
فتحت الرساله ونزلت راسها مافيها على نظراته
وخصوصا ان ام فياض ملاحظه اللي يصيير
قالت ام فياض: قم خذ مرتك واطلع وريها جناحكم
وانا ام محمد تناديني على القهوة عندها وقامت وتركتهم لحالهم
قام فياض وجلس جنب الجادل وشبك كفه بكفها : تعالي يا قلبي
وناظر فيها
ترى ماتعور هالكلمة
وتبسم على خجلها
وتغاضى عن اللي يطلبه منها وطلعوا جناحهم
كان بمنتهى الفخامة والذوق
: اعجبتس
قالت : اي ماشاء الله حلوو
قربها منه وعيونه تتأملها : احلى منتس مستحيل
لا أرادياً غطت وجهها بكفوفها
ضحك فياض هههههههه الشرط بيتفذ حالا ولا تهربين مافيه فكه
وهالمره بالعكس حاوط خصرها بيد ونزل كفوفها باليد الثانيه وقرب خده لها يالله بسسسرعه ابي بوستي
قالت بحيا ورقه : فياااااض
رد بهيام وحب : لبييه يا قلب فيااااض
قالت :خلاص اخر مرره
رجع ضمها اكثر وقال : لا مافيييه لازم تتعاقبين
وبسرعه خاطفه طبعت بوسه خفيفه وتملصت منه
رمى نفسى على السرير كأنه اغمى عليه ويده على خده راحت علومك يا فيااض

*******

مضت الايام وكل مالها تزداد حلاوة وروعه للجادل
وكأن الله ارسل لها فياض وامه وبناته تعويض لها عن مافقدته من ام وخوات وصديقات واكيد زوج محب مغرم
ام فياض
ارتاحت اخيرا وتطمنت على فياض وبناته انهم بيد امينه تحمد ربها دائما على وجود الجادل بحياتهم
تركية اتمت في القرية خمس سنوات واخيرا جاها النقل في نفس يوم زواجها
اما لميا فتخرجت من الجامعه وصارت مصورة مشهورة تسوي دورات وتشارك بمعارض وتفوز بجوائز
فرح في ثاني ثانوي وتغيرت تماما وكان للجادل دور كبير بحياتها
ام فراس وابو فراس الله رزقهم بتوأم بنات ولازالوا عايشين في الديره وفاطمة تفكر انها تتقاعد خلاص بتتفرغ لعيالها وتربيتهم
الجد ابو محمد لازال بمزرعته
وحريم عياله يتداورن كل يوم فطوره وغداه وعشاه على وحده وكل ما ذاق عيشتهم
دعى للجادل وهن يسمعن وقال ماش مامثل الجادل وسنعها احد

عبد الرحمن
متزوج ولازال يدرس ويحضر الدكتوراه مبتعث هو وزوجته

فلوة وطلال
الله رزقهم ببنت وولدين وعايشين حياتهم بحب مهما
كانت المنغصات من اللي حوالينهم

فياض والجادل
عشق ابدي بينهم
تغار عليه وتخاف عليه
تتفقده مثل المجنونه لو تأخر عليها شوي
ولا ترضى يغيب عنها ابدا رفيقته بطلعاته وسفراته
دائما نظراتها له تفضحها

فياض
لقى فيها توأم روحه وحب حياته كل شي فيها يفتنه حتى زعلها منه
اجتمع مع الحب تقدير واحترام يشوف معاملتها لامه وبناته
يحب فيها عفويتها وتلقائيتها
ودلعها اللي ماتظهره كثثير

الله رزقهم تركي عمره الان 4سنوات
يشبه الجادل كثيير
حبيب خواته وجدته واكيد امه وابوه
وسلطان عمره سنه اخذ عقل جدته تحبه وغلاته غير عن الكل
*********

لقطة النهاية

في مزرعة فياض الفياض
كانت الجادل تتعطر وتبخر شعرها بغرفتها
دخل عليها فياض وبعيونه نظرة الحب الابديه
حبيبتي طلبتتس
قالت وهي تفز له : ابشر ياقلبي
قال وهو يطلع برقع من دولابها
ألبسي لي هالبرقع احب اشوفتس فيه
ضحكت واخذت البرقع وقالت ههههه لو تدري فاطمة عنه جت وقصته بالمقص
ماخلت لي ولا واحد
وقفت قدام المرايه ولبست البرقع وعدلت شعرها اللي كساها : قالت بدلع : هااا حلو كذا
ووقف وراها وحضنها
يشوف عيونها الكحيله بالمرايه
وبهيام وحب : حلوووو وبس؟؟ الا يذبح
هذا اللي خبصني وخلاني ادورتس من مكان لمكان
اشهد بالله انتس سلبتي عقلي وقلبي
ألتفتت له وحطت راسها على صدره : حبيبي وانت بعد سرقت النوم من عيني
ضمها بقووه لصدره : الله لا يخليني منتس
قطع عليهم دخول مفاجئ من تركي
يبه يبه الراعي يبيك يقول الناقه ولدت
قال :الله يبشرك بالخير يا تروكي
برقه فلتها من بين ايديه وقال حبيبتي دقايق وراجع لتس
قالت الجادل : انتظرك ياحبيبي بجهز العشا لين تجي
******





وتمت بحمد الله